باسىندا دارىگەرلەر اۋرۋحاناعا تۇسكەن ناۋقاستا تىنىس الۋ جەتكىلىكسىزدىگىنىڭ بەلگىلەرى بار پنەۆمونيانى انىقتاعان. ول بىردەن وقشاۋلانعان رەانيماتسيالىق بوكسقا ورنالاستىرىلعان ەكەن. بىراق, جۇرگىزىلگەن قارقىندى تەراپياعا قاراماستان, ساعات 07.10-دا ونىڭ جۇرەگى سوعىسىن توقتاعان.
اۋرۋحاناعا تۇسكەن كەزدە ناۋقاستان بىردەن كوروناۆيرۋستى انىقتاۋ ءۇشىن ءتيىستى اناليزدەر الىنىپتى. ال قايتىس بولعاننان كەيىن ونىڭ اتالعان ينفەكتسيانى جۇقتىرعانى راستالعان.
«مەديتسينالىق قىزمەتكەرلەر بارلىق قولدانىستاعى حاتتامالاردى ساقتادى. قازىرگى ۋاقىتتا ەپيدەمياعا قارسى قاجەتتى ءىس-شارالار جۇرگىزىلۋدە», دەپ اتاپ ءوتتى ەرجان نۇرلىباەۆ.
قايتىس بولعان ەر ادام قاراعاندىنىڭ تۇرعىنى ەكەن. تەمىرتاۋ قالاسىندا ازاماتتارعا نوتاريالدىق قىزمەت كورسەتىپ تۇرعان. دارىگەرلەردىڭ قولىنداعى دەرەكتەرگە قاراعاندا, مارقۇم ەل شەكاراسىنان ەشقايدا شىقپاعان, سونداي-اق ول نۇر-سۇلتان جانە الماتى قالالارىندا بولماعان.
قازىرگى ۋاقىتتا قايتىس بولعان ازاماتتىڭ 56 اداممەن بايلانىستا بولعانى انىقتالدى. مارقۇمنىڭ جاقىن تۋىستارىنىڭ شەڭبەرى وقشاۋلانىپ, ولاردىڭ بارلىعى باقىلاۋعا الىنعان.
بۇگىنگى تاڭدا قاراعاندىدا 13 ناۋقاستا كوروناۆيرۋس ينفەكتسياسى بار دەگەن دياگنوز راستالعان. ولاردىڭ جاعدايىن دارىگەرلەر قاناعاتتانارلىق دەپ باعالايدى. سونداي-اق, 598 ادام تاۋلىك بويى باقىلاۋعا الىنعان. ءۇي كارانتينىندە 1 076 ادام بار.
قاراعاندى وبلىسى
