ال بۇگىنگى كورشىلەر ءبىر-ءبىرىنىڭ ۇيىنە باس سۇقپاق تۇگىلى, امانداسۋعا, حال-جاعداي سۇراسۋعا ۋاقىت تابا بەرمەيدى. وسىلايشا اتا-ءداستۇرىمىز اياق استى بولىپ, كوپشىل بولۋدى ۇمىتىپ بارامىز. بۇدان جۇرەك قاتايادى. ۇلكەنگە قۇرمەت, كىشىگە ىزەت تۇسىنىگى جوعالادى.
مىنە, وسى ورايدا قازاقستان سۋرەتشىلەر وداعى جانە ArtCom-نىڭ ۇيىمداستىرۋمەن كوپتەگەن ءىس-شارا جۇزەگە اسىرىلۋدا. ماسەلەن, «Korshiler», «تام, گدە حوروشو», «Aul picnic», «اتتراكتسيون پلەيحاۋس», «كوسموس ۆزايمودەيستيە», تاعى دا باسقا جوبالار قولعا الىنعانى قۋانتادى. بۇل شارالاردىڭ ماقساتى قالا ومىرىنە ۇيرەنگەن جەرگىلىكتى تۇرعىنداردىڭ كۇندەلىكتى تىرشىلىگىنە وزگەرىس ەنگىزۋ. قوعامعا كەرەك «New progress»-ءتى جاڭعىرتۋ. سونىڭ ىشىندە «مەنىڭ كورشىلەرىم!» «Korshiler», «تام, گدە حوروشو» جوبالارىنىڭ نەگىزىن قالاۋشى ايگەرىم وسپانمەن از-كەم تىلدەسۋدىڭ ءساتى تۋدى.
«بۇل جوبالاردىڭ ماقساتى – قالا تۇرعىندارىنىڭ, كورشىلەردىڭ تىعىز قارىم-قاتىناستا بولۋىنا اسەر ەتۋ. اتا-انالاردىڭ ۋاقىتتارى شەكتەۋلى بولعاندىقتان, ەكى جاقتى تەز ءتىل تابىستىرۋ ماقساتىندا بالالارىن ارالاستىردىق. ءبىز بالالارمەن سۋرەت سالىپ, ويىندار وينادىق. ۇلكەندەر باۋىرساق ءپىسىرىپ, ءدامىن تاتقاننان كەيىن بارلىعىنىڭ كوڭىلدەرى كوتەرىلىپ, كەزەكتى ءىس-شارامىز قۋانىشتى لەپپەن اياقتالدى», دەيدى سۋرەتشى ا.وسپان. اتا-سالتىمىزدىڭ ءتۇپ-نەگىزىن ساقتاپ, بۇگىنگى ۇرپاقتار ساباقتاستىعىن استە دارىپتەپ ءجۇرۋىمىز ءتيىس. ءوز اۋلامىزدان باستالعان يگى ىستەردىڭ جالعاسى بارشاعا ۇلگى بولۋى قاجەت.
ايىم بولاتقىزى
