1430.kz سەرۆيسى – پاتسيەنتتەر مەن دارىگەرلەرگە ارنالعان ونلاين الاڭ. ول ەلىمىزدە تەلەمەديتسينانى دامىتۋ بويىنشا قولعا الىنعان Start-Up جوبالاردىڭ ءبىرى. رەسپۋبليكاداعى 700-دەن اسا بىلىكتى دارىگەر قىزمەت كورسەتەتىن سايت وسى جىلدىڭ قاڭتار ايىنان بەرى جۇمىس ىستەپ كەلەدى. بۇگىندە تسيفرلاندىرۋ بارلىق سالانى دەرلىك قامتۋدا. مەديتسينا سالاسى دا بۇدان قالىس قالماق ەمەس. اسىرەسە كوروناۆيرۋستىڭ تارالىپ, توتەنشە جاعدايدىڭ جاريالانۋى تسيفرلاندىرۋدىڭ ماڭىزىن ودان سايىن ارتتىرا تۇسكەنى انىق. ونىڭ ۇستىنە #BizBirgemiz دەپ ۇرانداتقان قايىرىمدى جانداردىڭ دا قاتارى مولايىپ, جۇدىرىقتاي جۇمىلعان جۇرتشىلىق قيىندىقتى بىرگە ەڭسەرۋدە. 1430.kz سايتىنا تىركەلگەن مەديتسينا ماماندارى دا حالىققا تەگىن قىزمەت كورسەتە باستادى.
«مۇندا تۇرعىندار ەمحاناعا بارماستان دارىگەردىڭ كەڭەسىن ونلاين الادى. كەزەكتە تۇرىپ, جول ءجۇرىپ ۋاقىت جوعالتپايدى. دارىگەردىڭ بىلىكتىلىگى, ساناتى, كورسەتىلەتىن قىزمەتتىڭ باعاسى جانە باسقا دا تولىق اقپارات 1430.kz پاراقشاسىندا كورسەتىلگەن. ياعني كەز كەلگەن تۇرعىن وزىنە قاجەتتى دارىگەردى سايتقا تىركەلۋ ارقىلى تاڭداي الادى. ونلاين كەڭەس العاننان كەيىن پاتسيەنتتەر سول دارىگەردىڭ جەكە قابىلداۋىنا دا جازىلۋ مۇمكىندىگىنە يە بولادى. ال كورسەتىلگەن قىزمەتتىڭ اقىسى تىكەلەي دارىگەرلەرگە تولەنەدى», دەگەن جوبا اۆتورى جاندوس باقتىباەۆ مۇنداعى دارىگەرلەر كارانتين كەزىندە تەگىن مەديتسينالىق كەڭەس بەرە باستاعانىن جەتكىزدى. ونىڭ ايتۋىنشا, بۇل دارىگەر مەن پاتسيەنتتەردىڭ اراسىندا بايلانىس ورناتۋدىڭ ەڭ ءتيىمدى ءارى قاۋىپسىز جولى.
وفتالمولوگ, پەدياتر راۋشان قۇلجاباەۆا كۇنىنە 30-عا جۋىق ادامدى ونلاين تەگىن قابىلدايدى. «اسىرەسە COVID-19 ىندەتى تارالعان وسىناۋ كەزدە ونلاين مەديتسينالىق قىزمەتتىڭ ارتىقشىلىعى دا, ماڭىزدىلىعى دا, قولايلىلىعى دا, تيىمدىلىگى دە وراسان زور. بىرىنشىدەن, ناۋقاس ۇيىنەن شىقپاستان دارىگەردىڭ كومەگىنە جۇگىنە الادى. ەكىنشىدەن, كارانتين كەزىندە ناۋقاس تا, دارىگەر دە قاشىقتىقتى ساقتاي وتىرىپ, ىندەتتىڭ ۋشىعۋىنىڭ الدىن الادى. ۇشىنشىدەن, شالعاي ەلدىمەكەندەردە تۇراتىن حالىققا مەديتسينالىق كومەك قولجەتىمسىز جاعدايدا, سونىمەن قاتار مەديتسينالىق كومەك شۇعىل مۇقتاج ادامدارعا العاشقى مەديتسينالىق كومەكتى وسى سايت ارقىلى كورسەتەمىز. مۇندا بۇكىل ايماق بويىنشا دارىگەرلەر تىركەلگەن. زەرتحانالىق سىنامالار مەن اسپاپتىق تالداۋلاردى, تەكسەرىستەردىڭ ناتيجەلەرىن تالداپ ەمدىك نۇسقاۋلار جازىپ بەرەمىز. ارى قاراي ءوزىمىزدىڭ نەمەسە جاقىن ماڭىنداعى دارىگەردىڭ تىكەلەي قابىلداۋىنا جازىلۋىنا مۇمكىندىك جاسايمىز. سوندىقتان مەن بارلىق ارىپتەستەرىمدى وسى سەرۆيستى پايدالانىپ تەگىن قىزمەت كورسەتۋگە شاقىرامىن», دەيدى ر.قۇلجاباەۆا.
جالپى تاجىريبەلىك دارىگەر انار نۇرباەۆا دا بۇگىندە پاتسيەنتتەرگە تەگىن كەڭەس بەرەدى. ءبىر ءوزى كۇنىنە 10-نان اسا ادامدى ونلاين قابىلدايتىن ول قازىرگى ۋاقىتتا حالىقتىڭ كوپشىلىگى كوروناۆيرۋس تۋرالى سۇراقتاردى ءجيى قوياتىنىن ايتادى. «ولار كەز كەلگەن ۋاقىتتا بىزگە جازىلا الادى جانە جىلدام كەڭەس الادى», دەيدى ا.نۇرباەۆا.
