ەكى قولىمدا مەديتسينالىق قولعاپ, بەتپەردە, قالتامدا – انتيسەپتيك. ارىپتەستەرمەن الىستان امانداسامىز. «امانسىز با؟», «ەسەنسىز بە؟»... امان-ەسەن. جالپى, سوزدەردە, ۇعىمداردا ۇلتتىڭ مىڭ جىلدار بويى كەشكەن تاريحى تۇرادى. ءسوز – حالىقتىڭ جادى, تاريحي جادى. ارحەتيپتىك سانا سوزدە تۇر. ءسوز ولسە, ارحايزمگە اينالسا, سول ءداۋىردىڭ دە ولگەنى. ءبىر سوزبەن بىرگە تۇتاس ءبىر كەزەڭ جوعالادى. يسلاممەن بىرگە «امان» ءسوزى كەلدى, وعان دەيىنگى داۋىردەن جەتكەن تۇركىنىڭ ءوز «ەسەن» ءسوزى بار. ەكەۋى قوسىلىپ, «امان-ەسەن» بولدى. ەكى ءداۋىر, ەكى بولەك جاد, ەكى بولەك الەم ءبىرتۇتاس سوزگە, قوس سوزگە اينالدى. امان ءسوزى اماناتتان شىعادى. اماناتىڭىز – ارابتىڭ ساقتاۋ, ساقتالۋى. «امانبىسىڭ؟» - «ساقتالىپ تۇرمىسىڭ؟» دەگەنى.
ادامداردىڭ ءبىر-بىرىنەن ساقتانۋى – ءبىرىن ءبىرى ساقتاۋى. ۆيرۋستان قورعانامىز, قورعايمىز. اۋىز-مۇرىندى تۇمشالاپ, قولدى قاپتاپ, قايتا-قايتا جۋعاندا, ءبىزدىڭ اربىرىمىزدە باسقا دا «ۆيرۋستار» بار ەكەنىن ەرىكسىز ويلايسىڭ. مىنەزدەگى, سەزىمدەگى, ويداعى, ءىس-ارەكەتتەگى ۆيرۋستار. ولار دا جۇقپالى. ورتاڭنان جۇعادى, ورتاڭا جۇقتىراسىڭ, بالاڭا جۇقتىراسىڭ. تۇتاس بۋىنعا جۇقتىراسىڭ. قوعامعا, ادامزاتقا تاراتاسىڭ. وسى ۆيرۋستاردان ءبىز قورعانامىز با؟ وزگەنى قورعاۋعا تىرىسامىز با؟ كەرى, تەرىس مىنەزدەر, كەرەناۋ سوزدەر, ءتىپتى ادەتتەر – وسىنىڭ ءبارى ءبىزدىڭ ۆيرۋستارىمىز. ميداعى, جۇرەكتەگى ۆيرۋستار. ولار دا ادامدى ولتىرەدى. كەمباعال قىلادى. رۋحاني مۇگەدەككە اينالدىرادى. ءبىز رۋحاني ۆيرۋس جۇققان ادامداردان دا اينالا قاشامىز. «بالەسى جۇعادى» دەيمىز, «بالەڭىز» – سول ۆيرۋس.
بەتپەردە كيگەن كوكتەم. كۇن جارقىراپ تۇر. بىراق, ءبىر كوڭىلسىزدىك بار. ەۋروپانى كەزگەن كوممۋنيزم ەلەسىندەي. ول دا ۆيرۋس بولاتىن.
