قازاقستان • 30 ناۋرىز، 2020

تاۋلىك بويى جۇمىس ىستەيتىن ورتالىق اشىلدى

20 رەتكورسەتىلدى

نۇر-سۇلتان قالاسىندا باس ءمۇفتي ناۋرىزباي قاجى تاعان ۇلىنىڭ باستاماسىمەن قازاقستان مۇسىلماندارى ءدىني باسقارماسىنىڭ ورتالىق اپپاراتى جانىنان ءدىني اقپارات ورتالىعى (call-center) اشىلدى.

اقپارات ورتالىعىنىڭ (call-center) ءنومىرى – 33-30-30. ورتالىققا نۇر-سۇلتان قالاسىنىڭ كودى ارقىلى تەلەفون شالۋعا بولادى. وندا ءدىن سالاسىنىڭ بىلىكتى ماماندارى تاۋلىك بويى قازاق جانە ورىس تىلىندەگى سۇراقتارعا جاۋاپ بەرەدى.

ءدىني اقپارات ورتالىعىنا (call-center) ءبىر تاۋلىكتە شامامەن 50-60 سۇراق كەلىپ تۇسۋدە. بۇدان بولەك WhatsApp جەلىسى ارقىلى ساۋال قويۋشىلار دا بار. ستاتيستيكالىق مالىمەت بويىنشا، بۇگىندە ساۋال قويۋشىلاردىڭ باسىم بولىگى جۇقپالى ىندەتتەن ساقتانۋدىڭ جولدارى، وقىلاتىن ارنايى دۇعالار، جۇما نامازىنا قاتىستى ۇكىمدەر تۋرالى بىلگىسى كەلەدى. 

– پرەزيدەنتىمىز قاسىم-جومارت توقاەۆتىڭ حالىق ۇنىنە قۇلاق اساتىن مەملەكەت قالىپتاستىرۋ يگى جوباسى اياسىندا ەلىمىزدە ىزگى ءىس-شارالار قولعا الىنۋدا. قازاقستان مۇسىلماندارى ءدىني باسقارماسىنىڭ نەگىزگى جۇمىس باعىتتارىنىڭ ءبىرى – جاماعات تاراپىنان قويىلعان ءدىني سۇراقتارعا جاۋاپ بەرىپ، وزەكتى ماسەلەلەر بويىنشا ءپاتۋا شىعارۋ. قازىر ءبىز ەلىمىزدەگى توتەنشە جاعداي كەزىندە حالىققا ءۇمىت شۋاعىن شاشىپ، ولاردى جىگەرلەندىرەتىن، يمانىن كۇشەيتىپ، قۇلشىلىعىن ارتتىراتىن ناسيحاتتى كوبىرەك ايتۋىمىز كەرەك. وسى باعىتتا جۇزەگە اسىپ جاتقان ونلاين دارىستەر مەن ۋاعىز-ناسيحات جۇمىستارىن توقتاتپاۋىمىز ءتيىس، – دەدى ن.تاعان ۇلى.

ورتالىقتىڭ اشىلۋ راسىمىندە باس ءمۇفتي ەلىمىزدىڭ ءار ايماعىنان كەلىپ تۇسكەن ساۋالدارعا جاۋاپ بەردى.   

ايتا كەتسەك، call-center وسىعان دەيىن رەسپۋبليكالىق «ازىرەت سۇلتان» مەشىتى جانىنان اشىلعان بولاتىن. قازاقستان مۇسىلماندارى ءدىني باسقارماسىنىڭ الەۋەتى مەن شاريعات جانە ءپاتۋا ءبولىمى قىزمەتكەرلەرىنىڭ ءبىلىمى مەن تاجىريبەسى ەسكەرىلىپ، سall-center قىزمەتى ءمۇفتياتتىڭ باس عيماراتىنا كوشىرىلدى.

سوڭعى جاڭالىقتار

ۇقساس جاڭالىقتار