قازاقستان • 27 ناۋرىز، 2020

1200 ەرىكتى ءتارتىپ ساقشىلارىنا كومەكتەسۋدە

76 رەت كورسەتىلدى

ىشكى ىستەر ءمينيسترى ەرلان تۇرعىمباەۆ قوعامدىق ءتارتىپتى ساقتاۋعا اتسالىسىپ جۇرگەن ۆولونتەرلەرمەن كەزدەستى. ولار ەلىمىزدە توتەنشە جاعداي رەجيمى ەنگىزىلگەن العاشقى كۇننەن باستاپ پوليتسيا قىزمەتكەرلەرىمەن بىرگە قوعامدىق ءتارتىپتى قاداعالاۋدا.

بايلانىس ورناتۋ ءۇشىن ولار ارنايى كەۋدەشەلەرمەن جانە راديوستانسالارمەن قامتاماسىز ەتىلگەن. جۇرتشىلىقتى، سونىڭ ىشىندە ەرىكتىلەر قوزعالىسىن وسى ءتارتىپ ساقتاۋعا، ىزدەستىرۋ ءىس-شارالارىنا جانە پوليتسيانىڭ ۋچاسكەلىك ينسپەكتورلارىنا كومەك كورسەتۋگە تارتۋ جونىندەگى باستاما ەلىمىزدىڭ بارلىق ايماقتارىندا ەنگىزىلدى.

ەرىكتىلەر جوعالعان بالالار مەن قاريالاردى ىزدەۋگە، رەزونانستىق قىلمىستاردى اشۋعا قاتىسادى، ءتۇرلى وقيعالار كەزىندە كومەكتەسەدى. بۇگىن، ەلدە توتەنشە جاعداي ەنگىزىلگەن كەزەڭدە ەرىكتىلەر رەيدتىك جانە الدىن الۋ ءىس-شارالارىن جۇرگىزۋگە جۇمىلدىرىلعان. ولار ۋچاسكەلىك ينسپەكتورلارمەن جانە پاترۋلدەرمەن بىرگە كارانتينگە بايلانىستى ەنگىزىلگەن شەكتەۋلەر تۋرالى ءتۇسىندىرۋ جۇمىستارىن جۇرگىزۋدە. جالپى پوليتسيا قىزمەتكەرلەرىنە ەلىمىز بويىنشا 1200 ەرىكتى كومەك كورسەتۋدە.

– ءبىز بۇرىن كەزدەسپەگەن قاۋىپكە تاپ بولىپ وتىرمىز. ىشكى ىستەر مينيسترلىگىنىڭ بارلىق قىزمەتتەرى مەن بولىنىستەرى – پوليتسەيلەر، قۇتقارۋشىلار مەن ۇلتتىق ۇلاننىڭ اسكەري قىزمەتشىلەرى قوعامدىق ءتارتىپتى ساقتاۋعا جۇمىلدىرىلعان. بۇل كۇندەرى ازاماتتارىمىزدىڭ تاراپىنان كورسەتىلەتىن كومەكتىڭ ماڭىزى ەرەكشە. مەن وتانشىلدىق پەن ازاماتتىق بورىشىنا ادالدىعىن ىسىمەن تانىتىپ، پوليتسەيلەرمەن بىرگە قوعامدىق ءتارتىپتى ساقتاۋعا قاتىسىپ جۇرگەن ادامداردىڭ بارلىعىنا العىسىمدى بىلدىرەمىن.  بىرلەسكەن كۇش-جىگەردىڭ ارقاسىندا ءبىز وسى كۇردەلى كەزەڭدى ەڭسەرە الامىز. مەملەكەت باسشىسى قاسىم-جومارت توقاەۆتىڭ 2020 جىلدى – ۆولونتەر جىلى رەتىندە جاريالاعاننان بەرى ەرىكتىلەر قاتارى تەك تولىعا تۇسەتىنىنە سەنىمدىمىن، – دەدى ە.تۇرعىمباەۆ.

ءوز كەزەگىندە ەرىكتىلەر دە وسىنداي الدىن الۋ ءىس-شارالارىن وتكىزۋدە تيىمدىلىگىن كورسەتتى. ولار كارانتين كەزىندە ۋچاسكەلىك ينسپەكتورلارمەن بىرلەسىپ، ازاماتتارعا بۇل كەزەڭدەگى قاۋىپسىزدىك شارالارى جانە توتەنشە جاعداي تالاپتارى تۋرالى ەسكەرتۋدە.

وسىلايشا ءىىم وكىلدەرى جاستاردى قوعامدىق ءتارتىپتى ساقتاۋعا جۇمىلدىرا وتىرىپ، تۇرعىندار قاۋىپسىزدىگىن قامتاماسىز ەتۋ جونىندەگى جۇمىستىڭ تيىمدىلىگىن ارتتىرۋدا. سونىمەن قاتار ولاردىڭ قوعام الدىنداعى بورىش سەزىمىن نىعايتىپ، قۇقىقتىق ساۋاتتىلىقتى ارتتىرۋدى كوزدەپ وتىر.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار