24 اقپان مەن 3 ناۋرىز ارالىعىندا اتىراۋ, الماتى, شىعىس قازاقستان, باتىس قازاقستان, قوستاناي, ماڭعىستاۋ وبلىستىق اۋماقتىق ينسپەكتسيالارى رەسەي فەدەراتسياسى مەن ۆەتنام مەملەكەتىنەن جوعارى فيتوسانيتارلىق قاۋىپ-قاتەرى بار وسىمدىك ونىمدەرىن زاڭسىز الىپ كەلۋدىڭ جولىن كەستى.
كارانتيندىك باقىلاۋ بارىسىندا ينسپەكتورلار 76 توننادان استام كارتوپ, 55 توننادان استام جەمىس-جيدەك جانە كوكونىس تۇرلەرىن, 19 تونناعا جۋىق بانان, 2 مىڭ گۇل جانە 600 دانا گۇل كوشەتتەرىن, سونداي-اق, ۆەتنامنان 25 تونناعا جۋىق كەشيۋدى جاڭعاعىن فيتوسانيتارلىق سەرتيفيكاتسىز الىپ كەلگەندىگىن انىقتادى.
وسىمدىكتەر كارانتينى سالاسىنداعى زاڭنامالاردىڭ تالاپتارىنا سايكەس, اتالعان ونىمدەردى قازاقستان رەسپۋبليكاسى اۋماعىنا تاسىمالداۋعا تىيىم سالىنعان. كىنالى تۇلعالار اكىمشىلىك قۇقىق بۇزۋشىلىق تۋرالى كودەكسىنىڭ 400-بابىنا سايكەس اكىمشىلىك جاۋاپكەرشىلىككە تارتىلدى.
