- مىنا ۆيرۋس بىزگە بارلىق پەندە بالاسى بىردەي دەگەندى ەسكەرتۋدە. ياعني, ءبىزدى ءبىر-بىرىمىزدەن ەرەكشەلەندىرىپ تۇراتىن: ءدىن, مادەنيەت, كاسىپ, قارجىلىق دەڭگەي, اتاق-ابىروي, ت.ب. دۇنيەلەر ۆيرۋستىڭ الدىندا دارمەنسىز, ءبارىمىزدىڭ بىردەي ەكەنىمىزدى بىلدىك.
- COVID-19 ادام بالاسى ءبىر-بىرىنە بايلانىستى ەكەنىن ەسكەرتتى. ءبىردىڭ الەگى مىڭعا تاتيتىنىن بىلدىك. الا باعانا ورناتىپ, تەمىر تورمەن قورشاپ قويعان قۇدىرەتتى شەكارامىز دەرتتەن قورعامايتىنى انىق بولدى. ۆيرۋسقا تولقۇجاتتىڭ قاجەتى جوق ەكەن. دەرت ءبىزدىڭ ءالسىز ەكەنىمىزدى دالەلدەپ, تاۋبامىزعا ءتۇسىردى.
- دەنساۋلىقتىڭ قۇنى قىمبات ەكەنىن ەسكەرتتى. اس-اۋقاتىمىزعا ساپاسىز ءارى حيميالىق زات قوسىلعان تاماق پەن سۋدى پايدالانىپ, دەنە قۋاتىمىزدى السىرەتىپ, ۆيرۋس الدىندا دارمەنسىزدىك تانىتتىق. ءسويتىپ, دەنساۋلىققا ءمان بەرمەگەنىمىز اشكەرەلەندى.
- ءومىردىڭ قىسقا, ءولىمنىڭ بار ەكەنىن ەسكە سالدى. ادام ءۇشىن ەڭ باستى قاجەتتىلىك ءبىر-ءبىرىن, اسىرەسە, قارت ادامداردى سىيلاۋ, اۋرۋ-سىرقاۋ جاندارعا كومەكتەسۋ بولىپ تابىلادى. پەندەنىڭ ءومىرى تەك دارەتحانا قاعازىن ساتىپ الۋدان تۇرمايتىنىن بىلدىك.
- ءبىزدىڭ سانامىزداعى دۇنيەقۇمارلىقتىڭ دەڭگەيى ناقتىلاندى. قيىن جاعدايعا تاپ بولعاندا التىندى الەم-جالەم دۇنيە-م ۇلىك قۇتقارا المايتىنىن تۇسىندىك. تەك قاراپايىم تازالىق پەن تابيعي تاماق, شىن ءدارى قاجەت دەگەندى تۇسىندىك.
- وتباسىلىق ءومىردىڭ قۇنىن بىلدىك. ۆيرۋس ءبىزدى ۇيگە قاماپ, الشاقتاپ كەتكەن وتباسىلىق قاتىناستى جاقىنداستىرۋدا.
- سابىرلىق پەن ۇرەيدىڭ اراجىگىن اجىراتتى. بىرەۋلەر بۇل وتكەن عاسىرلاردا قايتالانعان تاعدىر سىناعى ەكەنىن ۇعىنسا, ەكىنشى بىرەۋلەر ۇرەيگە بوي الدىرىپ, ءوزىنىڭ دە, باسقانىڭ دا بەرەكەسىن كەتىرۋدە. سوندىقتان سىزگە دۇرىس تاڭداۋ جاسايتىن مۇمكىندىك سىيلادى.
- ءبىر ۆيرۋس كۇللى الەمدى اۋىرتا الاتىنىن اڭعاردىق. الەم اۋىرسا, ءبارىمىز امان بولماعىمىز قيىن ەكەنىن بىلدىك.
- قانداي ءبىر قيىندىقتان سوڭ جاقسىلىق كەلەرىن ۇمىتپاڭىزدار! ءومىر اعاشتىڭ بۇتاعى سياقتى. ۋاقىتى كەلگەندە كوكتەيدى. بۇگىنگى بولىپ جاتقان وقيعا سول ۇزىن بۇتاقتىڭ ءبىر بۋناعى عانا. ۇركىپ-قورقۋدىڭ قاجەتى جوق. بۇل دا وتەدى.
- كوپ ادامدار COVID-19 ۆيرۋسىنا «تاجال» رەتىندە باعا بەرۋدە, مۇمكىن بۇل «تۋرا جولعا» باستاۋشى شىعار. ءبىزدىڭ شەكتەن شىققان ارەكەتىمىزدى تىزگىندەۋگە كەلگەن بولار. كىم قالاي تۇسىنەدى, ءوز ەركى.
دايىنداعان بەكەن قايرات ۇلى
