مال بورداقىلاعان ميلليونەر بولادى

ايماقتار • 26 ناۋرىز، 2020

مال بورداقىلاعان ميلليونەر بولادى

1249 رەت كورسەتىلدى

دەرەككە سۇيەنسەك، بۇگىندە الماتى وبلىسىنداعى ءىرى قارا مالدىڭ باسى 1 ميلليوننان اسادى ەكەن. ال ەسەپكە الىنعان ۋاق جاندىقتىڭ ۇلەسى 4 ميلليون باستىڭ ۇستىندە كورىنەدى. ياعني، جەتىسۋدىڭ ويى مەن قىرىنا ءورىپ شىعاتىن ءتورت ت ۇلىكتىڭ جالپى سانى جەتكىلىكتى. ەندىگى مىندەت تۇياقتى ت ۇلىكتىڭ باسىن كوبەيتىپ قانا قويماي، مال شارۋاشىلىعى ونىمدەرىن ءوندىرۋدى جولعا قويۋ بولىپ وتىر.

قالماحانبەت مۇقامەتقالي

قازىر وبلىستا شارۋالار اراسىندا مال بورداقىلاۋ الاڭدارىن اشۋعا ىنتا جوعارى. ويتكەنى، مال باسىن كوبەيتۋگە كەتكەن شىعىننىڭ ەكى جاعدايدا عانا جىلدام وتەلەتىنىن جۇرت بىلەدى. بىرىنشىدەن، مالدىڭ كۇيلى بولۋى ەتتىڭ ساپاسى مەن سالماعىنا اسەر ەتەدى. سوندىقتان، ءىرى قارانى ىزىنەن قالماي باققاننان گورى، مالدى ءبىر ورتالىقتا ۇستاپ جەمدەۋدىڭ تيىمدىلىگى جوعارى. تاجىريبە بويىنشا، جايىلىمدا 3 اي بويىنا ەركىن ءجۇرىپ ەت جيناعان مالدىڭ كۇيىنە قاراعاندا 1 ايعا جەتەر-جەتپەس مەرزىمدە بورداقىلانعان مالدىڭ سالماعى مەن ەتتىلىگى جوعارى بولادى ەكەن. ەكىنشىدەن، مال شارۋاشىلىعىندا تۇقىم اسىلداندىرۋ ءىسى ناتيجەلى بولىپ تۇر. شارۋانىڭ ەسكەرەتىن باستى ۇستانىمىنىڭ ءبىرى وسى بولسا كەرەك. انىعىندا، سويىسقا ارناپ وسىرگەن مالدىڭ ەتتى بولۋى ءتيىمدى، ال ءسۇت ءوندىرۋ باعىتىنداعى ساۋىن مالىنىڭ تۇقىمىن اسىلداندىرۋ كوپ ويلانۋدى كوتەرمەسە كەرەك-ءتى. سۇيىنەرلىگى، جەتىسۋلىق شارۋالار وسى نەگىزگى باعىتتى دا دامىتىپ وتىر.

سوزىمىزگە پانفيلوۆ اۋدانىنداعى «Esenbai» شارۋا قوجالىعىنىڭ تىرشىلىگى دالەل. قوجالىق 2015 جىلدان بەرى مال شارۋاشىلىعىن ىلگەرلەتۋگە كۇش سالىپ كەلەدى ەكەن. بۇگىندە 600 باسقا ارنالعان مال بورداقىلاۋ الاڭى جۇمىس ىستەيدى. قورا-جايداعى تىرلىكتى 7 جۇمىسشى تىندىرادى، قاجەتتى 7 تەحنيكا تاعى بار. بىلتىر قوجالىقتىڭ ارنايى الاڭىندا 600 باس وگىزشە جەمدەلىپ، بورداقىلانعان. اۋەلگىدە تىرىدەي سالماعى 200-250 كيلوگراممنان اسپايتىن ءىرى قارا جەمدەۋدەن كەيىن 500-550 كيلوگراممعا دەيىن ەت جيناپتى. ياعني، بوردالانعان وگىزشەنىڭ ءار باسى 60-80 مىڭ تەڭگەگە دەيىن تازا تابىس اكەلگەن. ال قوجالىقتىڭ وتكەن جىلىعى تازا تابىسى 42 ميلليون تەڭگەنى قۇراپتى. دايىن ەتتى وبلىس پەن الماتى قالاسىنىڭ تۇتىنۋ نارىعىنا جونەلتكەن ەكەن.

- بيىل تاعى 600 باس وگىزشەنى بورداقىلاۋ الاڭىنا بايلادىق. ءىسىمىزدىڭ تابىستى بولارىنا سەنەمىز. شارۋاشىلىقتىڭ ىرگەسىن كەڭەيتىپ، بورداقىلاۋ الاڭىنان بولەك ەت دايىندايتىن ءوندىرىس ىسكە قوسساق دەيمىز. بيىل اكىمشىلىك قوسىمشا جەر بولسە، مالدى ءوزىمىز سويىپ، ەتتى وڭدەپ، دايىن ءونىم جاسايتىن كاسىپورىن اشۋ جوسپارىمىزدا بار. بولاشاقتا وتاندىق نارىققا عانا ەمەس، شەت ەلدەرگە دە ەت ەكسپورتىن جولعا قويۋدى ماقسات ەتتىك. ال كاسىپورىنعا جۇمسالاتىن قارجىنى ءوز ەسەبىمىزدەن شىعارۋعا دايىنبىز، - دەيدى «Esenbai» شارۋا قوجالىعىنىڭ باسشىسى نۇركامال نۇراحمەت.

ەت ەكسپورتى دەمەكشى، بىلتىر الماتى وبلىسى 8 مىڭ توننا ەتتى الىس-جاقىن شەتەلگە جونەلتكەن. قۋانىشتىسى، وتاندىق اگروونەركاسىپ مال ەتىن تىرىدەي نەمەسە سويىلعان كۇيىندە عانا ەمەس، تولىقتاي وڭدەلگەن ءونىم ءتۇرى رەتىندە دە ەكسپورتتاي باستادى. وتكەن جىلى جەتىسۋدا ىسكە قوسىلعان ەكى ءىرى كاسىپورىن – «يمپەريا فۋد» جانە «قايىڭدى» ەت كومبيناتتارى سويىلعان مالدىڭ ەتىن تولىقتاي وڭدەپ، سۇيەگى مەن تەرىسىنە دەيىن ىسكە جاراتاتىن قالدىقسىز ءوندىرىس كوزىنە اينالدى. ال وبلىس بويىنشا بيىلعى ەت ەكسپورتىنىڭ مەجەسى 25 000 تونناعا دەيىن جەتەدى دەگەن ءۇمىت بار.

الماتى وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز