نيدەرلاندىداعى ازاماتتاردىڭ قازاقستانعا قايتىپ كەلۋ مۇمكىندىكتەرى قاراستىرىلۋدا

الەم • 26 ناۋرىز، 2020

نيدەرلاندىداعى ازاماتتاردىڭ قازاقستانعا قايتىپ كەلۋ مۇمكىندىكتەرى قاراستىرىلۋدا

بۇل تۋرالى ءسىم ءباسپاسوز قىزمەتى حابارلادى

«وزدەرىڭىز بىلەتىندەي، الەمدە COVID-19 كوروناۆيرۋسىنىڭ تەز تارالۋى جاعدايىندا شەت ەلدەردەگى كوپتەگەن وتانداستارىمىزدا ەلىمىزگە قانشالىقتى جىلدام جەتۋگە بولادى دەگەننەن باستاپ، ولارعا قازاقستانعا قايتۋدىڭ قاجەتتىلىگى بار ما دەگەنگە دەيىن ءتۇرلى ساۋالدار تۋىندادى. كوپ جاعدايدا ءبىزدىڭ شەتەلدەردەگى مەكەمەلەردە جەدەل جەلىلەردىڭ تەلەفوندارى شامادان تىس جۇكتەلىپ كەتكەندىكتەن ازاماتتارىمىز قوڭىراۋ شالا الماي، نارازىلىق بىلدىرە باستادى، ماسەلەلەردى شەشۋ ۋاقىتى سوزىلا باستادى. ءاربىر وتانداسىمىزعا جەكە كوڭىل ءبولۋ قاجەت بولدى.

ءبىزدىڭ نيدەرلاندتاعى ەلشىلىگىمىز قالىپتاسقان جاعدايدان شىعۋدىڭ جولىن تاپتى. تسيفرلاندىرۋ ەۋروپادا كوروناۆيرۋستىڭ قارقىندى تاراۋى كەزىندە كومەككە كەلدى. 24 ناۋرىزدا قر ەلشىسى ماعجان ءىلياسوۆ «Zoom» ونلاين كونفەرەنتسيا-پلاتفورماسىندا وسى ەلدە تۇراتىن وتانداستارىمىزبەن ارنايى بەينەكونفەرەنتسيا وتكىزدى.

ءىس-شاراعا ءبىزدىڭ ستۋدەنتتەردىڭ اتا-انالارى مەن تۋىستارى دا قوسىلدى. ونلاين ءىس-شارا كەزىندە ەلشى قر ازاماتتارىنىڭ شەتەلدە قاۋىپسىز بولۋى ماسەلەلەرى بويىنشا سىرتقى ىستەر مينيسترلىگى مەن قازاقستاننىڭ بارلىق شەت ەلدەردەگى مەكەمەلەرىنىڭ جۇرگىزىپ وتىرعان جۇمىسى تۋرالى، سونداي-اق ءبىزدىڭ ازاماتتارىمىزدىڭ نيدەرلاندىدان قازاقستانعا قايتىپ كەلۋ مۇمكىندىكتەرى تۋرالى حاباردار ەتتى. م. ءىلياسوۆ ءبىزدىڭ ازاماتتارىمىزدىڭ بارلىق سۇراقتارىنا جاۋاپ بەرىپ، كارانتين ەرەجەلەرىن ساقتاۋعا شاقىردى.

جالپى، ەلشىلىكتىڭ بۇل باستاماسى وڭ قابىلداندى. وسىلايشا، تسيفرلاندىرۋ جانە قاراپايىم ينتەراكتيۆتىك سۇحبات پاندەميا جاعدايىندا ازاماتتارىمىزدى قورعاۋ بويىنشا جۇرگىزىلىپ جاتقان جۇمىس تۋرالى كەڭىنەن اقپاراتتاندىرۋ ماسەلەسىن شەشۋگە كومەكتەستى»، دەلىنگەن حابارلامادا.