وسكەمەندەگى ا.پۋشكين اتىنداعى وبلىستىق كىتاپحانا قىزمەتكەرلەرى «تۋعان جەرگە - تاعزىم» جوباسى اياسىندا شىعىس قازاقستانداعى جەر-سۋ اتاۋلارىنىڭ شىعۋ تاريحىنا قاتىستى ءبىراز دەرەكتەردى جيناستىرعان ەكەن. بۇگىن ءبىز «ەگەمەن» وقىرماندارىنىڭ نازارىنا سونىڭ ءبىرىن ۇسىنۋدى ءجون كورىپ وتىرمىز.
***
كاتون وڭىرىندە مايەمەر دەگەن جەر بار. شەجىرەشىلەر وسى اتاۋدى مايا بيمەن بايلانىستىرادى. ولاردىڭ ايتۋىنشا, مايا بي جانە قاراتاي ەلىنىڭ تاعى ءبىر بەلدى ادامى, بايى ەسبول قۇراتاي ۇلى مەن باتىرى جانىبەك شاقاباي ۇلى ۇشەۋى 1750 جىلدارى ءبىر شوعىر ەلدى باستاپ اكەلىپ, ولاردى وسى وڭىرگە قونىستاندىرادى. كوشى-قونمەن جۇدەپ-جاداپ كەلە جاتقان ەلدىڭ مالىن نارىندى بويلاپ, ورلەي ايداپ, ءبىر جاسىل جازىقتىڭ شەتىنە ىلىنە بەرگەندە كوشتى توقتاتىپ, تۇنەمەلگە كىدىرەدى.
ىڭىرشاعى شىعا باستاعان مالعا ەرتەڭگىلىك ءوڭ ءبىتىپ, قۇلپىرىپ سالا بەرگەنىن بايقاعان مايا بي:
- اش-ارىعىڭ تويىناتىن جەر ەكەن, وڭشەڭ سەمىز سويىلاتىن جەر ەكەن, ءبىر-اق كۇندە شىر قوناتىن جەر ەكەن, كوزدەرىڭە نۇر قوناتىن جەر ەكەن, ءورىس كۇندە قۇلپىراتىن جەر ەكەن, جۇمباعى مول سىر تۇناتىن جەر ەكەن, ات سوڭىنان تاي ەرەتىن جەر ەكەن, ال ادامدار ماي ەمەتىن جەر ەكەن, وسى ارا مايەمەر بولسىن, - دەگەن ەكەن.
مايا ءبيدىڭ وسى ءوڭىر تۋرالى: «قولشاتىرى باسىندا, جانتورسىعى قاسىندا, وسىدان ارتىق, جەر ۇيىعى بار ما؟» دەگەنى دە قازىر ەل اراسىندا قاناتتى تىركەسكە اينالىپ كەتكەن ەكەن.
دەرەكتەردى جيناستىرعان – كىتاپحانا قىزمەتكەرى گۇلبارشىن ابىلعازينوۆا.
