مەرەكەلىك قۇتتىقتاۋلار باق جانە الەۋمەتتىك جەلىلەردە جاريالاندى. موڭعوليانىڭ مەملەكەت باسشىسى حالتمااگين باتتۋلگا قۇتتىقتاۋىن قازاق, موڭعول تىلدەرىندە جازعان. ولاي بولسا باتتۋلگا مىرزانىڭ قۇتتىقتاۋىن قاز-قالپىنشا كەلتىرەيىك:
«ناۋرىز مەيرامى قۇتتى بولسىن! قازاق حالقىن ناۋرىز مەيرامىمەن قۇتتىقتايمىن! كوكتەم ايىنىڭ شۋاعىن الا كەلەتىن ۇلىستىڭ ۇلى كۇنى ناۋرىز مەيرامىن تويلاعالى وتىرعان قازاق حالقىنا ارنايى ۇندەۋىم: ء«بىز سىزدەردى اعايىن-تۋىستارىڭىز بەن امان-ەسەن قاۋىشىپ, اقساقال قاريالاردى قۇرمەتتەپ قۇتتىقتاعاندا, وزىق تەحنولوگيالاردى قولدانا وتىرىپ, قاۋىپ قاتەردەن ساقتانۋ ءۇشىن ەلەكتروندى سالەمدەسۋ جانە قاشىقتىقتان سالەمدەسۋ تۇرلەرىن قولدانۋدى سۇرايمىن.
دۇنيە جۇزىندە كەڭىنەن تاراپ جاتقان كوروناۆيرۋس ىندەتىنەن اقساقال قاريالارىمىزدى ساقتاۋ ءسىز بەن ءبىزدىڭ ەڭ باستى مىندەتىمىز. سوندىقتان تويدىڭ كۇندەرىندە دە قاۋىپسىزدىك شارالاردى جالعاستىرىپ, ۇيىمداستىرۋعا شاقىرامىن! ناۋرىز مەيرامى بەرەكە-بىرلىكتىڭ بەلگىسى بولعان قارتتارىمىزعا قۋانىش سىيلايتىن, عاسىرلار بويى جالعاسقان اۋىرلىعى از, اراق شاراپتان الىس, ەرەكشە مەرەكە بولعاندىقتان قارتتارىمىزدى بارلىعىمىز قاۋىپ قاتەردەن ساقتاعانىمىز ءجون.
كۇن نۇرىن دا توگىپ, ك ۇلىمدەپ تىنىشتىقتا كەلە جاتىر. وتانىمىز تىنىش, ەلىمىز امان بولسا ءالى تالاي-تالاي ناۋرىز مەيرامىن بىرگە تويلايمىز. بارشا قازاق حالقى سىزدەردى ناۋرىز مەرەكەلەرىڭىزبەن قۇتتىقتاي كەلە بارلىق جاقسىلىقتى تىلەيمىن»-دەلىنگەن قۇتتىقتاۋ حاتتا.
ال ۇكىمەت باسشىسى ۋحنااگين حۇرەلسۇحتىڭ دە قۇتتىقتاۋى وسىعان ۇقساس. ول: «جايماشۋاق كوكتەممەن جارىسا كەلەتىن قازاق حالقىنىڭ ءداستۇرلى ناۋرىز مەيرامىمەن, بارلىق قازاق حالقىن ۇكىمەت اتىنان جانە ءوز اتىمنان قۇتتىقتايمىن! جىلىنا ءبىر-اق رەت كەلەتىن بۇل كۇنى بارلىق ادام كوڭىلدى بولۋعا تىرىسىپ, بەرەكە-بىرلىكپەن, جاقسىلىقتى اسپەتتەيتىن قازاق حالقىنىڭ ءتول مەرەكەسى. سونىمەن قاتار تۋما بولمىسى مەن مادەنيەتىن ساقتاپ قالعانىن كورسەتەتىن ەرەكشە مەيرام.
مەرەكە كۇنى قارساڭىندا الەمدى قورشاپ العان قاۋىپتى ۆيرۋستىڭ الدىن-الۋ ءۇشىن, ءاربىر ازاماتتى جاۋاپكەرشىلىكتى جانە سەرگەك بولۋعا شاقىرامىن. سىزدەردىڭ جۇمىستارىڭىز جەمىستى بولىپ, ومىرلەرىڭىز گۇلدەنىپ, ويلاعان ارمان تىلەكتەرىڭىزگە جەتىپ, تاعدىرلارىڭىز ارقاشاندا تاماشا بولا بەرۋىن شىن جۇرەكتەن تىلەيمىن!» -دەگەن تىلەگىن بىلدىرەدى.
كوكتەمنىڭ نىشانى سەزىلىپ, قار كوبەسى سوگىلىپ, قارا جەر بۋسانىپ, جاڭا جىلدىڭ باسىندا كەڭ كولەمدە تويلاتاتىن, ەجەلگى دە ءداستۇرلى ناۋرىز مەرەكەسىنە ارناپ موڭعوليانىڭ پارلامەنت سپيكەرى گومبوجاۆىن زاندانشاتار دا مەرەكەلىك قۇتتىقتاۋ جولدادى: «الەم تاريحىندا وشپەس ءىزى بار موڭعول دەگەن مەملەكەتتىڭ تولىققاندى مۇشەسى قازاق حالقىنا, ارداقتى اقساقالدارعا ناۋرىز مەيرامىنىڭ مەرەكەلىك سالەمىن جولدايمىن! مىنە جايدارلى ماۋسىم, قۇنارلى كوكتەم مەزگىلى كەڭ بايتاق موڭعوليا ەلىنە دە كەلىپ جەتتى. ناۋرىز-كۇن مەن ءتۇننىڭ تەڭەلۋىنىڭ مەيرامى جانە كوكتەم مەيرامى. كۇللى عالامدى نۇرلاندىرعان التىن كۇن مەن ماڭگىلىك كوك اسپاننىڭ استىندا موڭعوليا قازاقتارىنىڭ تۇرمىس-تىرشىلىگى كوكتەمنىڭ كوڭىلدى كۇنىندەي قۇلپىرىپ, نۇرلانا بەرگەي. اسسالاۋماعالەيكۋم! ناۋرىز - بۇۇ رەسمي تۇردە جاريالاپ بەكىتكەن بۇكىل ادامزاتتىڭ مەرەكەسى. سوندىقتان دا موڭعوليادا بۇل كۇنى قازاق حالقىنىڭ مۇراسىنا قۇرمەت كورسەتىپ, ونى دامىتۋعا جانە بولاشاق ۇرپاقتارعا مۇرا ەتۋ ماقساتىندا كەڭىنەن اتالىپ ءوتىپ كەلە جاتىر. دۇنيە جۇزىنە تارالعان ميلليونداعان قازاقتاردىڭ ىشىنەن موڭعول قازاقتارى ءوز ۇلتتارىنىڭ تاريحىن, مۇراسىن جانە ادەت-عۇرپىن تاماشا ساقتاپ, ودان ارمەن دامىتىپ كەلە جاتىر دەگەن عالىمداردىڭ تۇجىرىمداماسىنا ءبىز قاتتى شاتتانامىز. ءبىزدىڭ قازاق حالقى ەل وركەنىنە ايىرىقشا ۇلەسى قوسىپ, جاسامپازدىق, ەڭبەك مايدانىندا, ونەر-مادەنيەت, عىلىم, دەنساۋلىق, ءبىلىم بەرۋ, سپورت قاتارلى بارلىق سالادا تابىس شىعارىپ, اتاق داڭقتارىن اسپانداتىپ كەلە جاتقانىنا موڭعوليا ۇكىمەتى مەن حالقى ارقاشان قۇرمەتتەپ جۇرەتىنىن مەرەكە قارساڭىندا اتاپ وتكەنىمە قۋانىشتىمىن. مەملەكەتىمىزدى ونىڭ ىشىندە قازاقتاردىڭ كوپشىلىگى تۇراتىن بايان-ولگي ايماعىن دامىتۋعا, قازاق حالقىنىڭ تۇرمىس دەڭگەيىن جاقسارتۋعا, ادىلەت, جاۋاپكەرشىلىك جۇيەسىنە نەگىزدەلگەن, ازاماتتارىن قاستەرلەيتىن مەملەكەت قۇرۋعا, دەموكراتيا, ادام قۇقىعىن قورعايتىن ۇكىمەت پەن مەملەكەتتىك جانە ۇكىمەتتىك ساياساتتى ءساتتى جۇزەگە اسىرۋ ءۇشىن سىزدەردىڭ بارشالارىڭىزدىڭ بەلسەندىلىكتەرىڭىز ماڭىزدى ەكەندىن مەرەكە قارساڭىندا تاعىدا اتاپ وتكىم كەلەدى.
قازاق ۇلتىنىڭ تاريحى مەن مادەنيەتىن, ادەت-عۇرىپتارىن كوزدىڭ قاراشىعىنداي ساقتاۋعا, انا تىلىندە ءبىلىم الۋلارىنا, قارىم-قاتىناس جاساپ, اقپارات الۋلارىنا, ءوز نانىمدارى بويىنشا عيبادات ەتۋگە جانە ەشقاشان كەمسىتپەۋ ءۇشىن قۇقىقتىق ورتانى ودان ارمەن جاقسارتۋ ماسەلەسىنە جوعارى زاڭ شىعارۋشى ورگان, پارلامەنت ارقاشان ەرەكشە نازار اۋداراتىن بولادى.
قۇرمەتتى قازاق حالقى, بۇل رەتكى ناۋرىز مەيرامى تەك موڭعوليادا عانا ەمەس, بۇكىل الەمدى الاڭداتىپ وتىرعان ىندەت ەتەك العان قىسىلتاياڭ شاققا ءدوپ كەلىپ وتىر. سوندىقتان, جۋىردا اتاپ وتىلگەن «شاعان» مەيرامىنداعىداي, تەك عانا وتباسىلىق دەڭگەيدە ءراسىم جاساپ, ارداقتى اقساقالدارىمىز بەن اعايىندارىمىزعا قاۋىشۋ, اماندىعىن ءبىلۋ قاتارلى ءداستۇر سالتتاردى تەحنولوگيالىق جەتىستىكتەردى پايدالانا وتىرىپ شەشۋگە شاقىرىپ وتىرعانىمدى قابىل الىڭىزدار!
ءداستۇرلى مەرەكەلەرىمىزدى قارسى الاتىن جاقسى كۇندەرىمىز الدا.. داستارحاندارىڭىز دانگە تولىپ, كۇمبىرلەگەن كۇي مەن الامان ايتىس تىڭداپ, جاقسى تويلاتىڭىزدار! ناۋرىز مەيرامى قۇتتى بولسىن»-دەيدى.
ال مەملەكەتتىك ۇلى حۋرال مۇشەسى, پارلامەنتتەگى موڭعوليا-قازاقستان توبىنىڭ جەتەكشىسى مۇرات داكەي ۇلى: «اسسالۋماعالەيكۋم اسا قادىرمەندى ايماعىمىز حالقى جانە ەلىمىزدىڭ تۇكپىر-تۇكپىرىندە, شەت ەلدەردە قىزمەت جاساپ, ءبىلىم الىپ, ەل دامىسىنا ەلەۋلى ۇلەس قوسىپ جاتقان اعايىندار, سىزدەرگە بۇگىنگى ءاز ناۋرىز مەرەكەسى قۇتتى بولسىن ايتامىن!
ۇلتىمىزدىڭ مەرەيىن ءوسىرىپ, بار بولمىسىمىزدى ايشىقتايتىن قاسيەتتى – ناۋرىز مەرەكەسى ەلىمىزگە, ءاربىر وتباسىنا بىرلىك پەن قۋانىش, قۇت-بەرەكە, باقىت پەن مولشىلىق اكەلسىن!
ناۋرىز مەيرامىنىڭ العاشقى كۇنى حالقىمىزدىڭ قازىنا قارتتارىمىز - اقساقالدارعا قۇرمەت جاسايتىن عۇرپى بار. وسى ءۇردىستى بۇگىن مەملەكەت باسشىسى حالتمااگين باتتۋلگا جاساۋدا.
سەبەبى, ايماعىمىزدىڭ 7517 قارياسىنىڭ جەرگىلىكتى جەردە ءىس-قىزمەت جۇرگىزەتىن بەس بىردەي اينالىم بانكتەرىنەن العان 21,8 ملرد زەينەتاقى نەسيەسىن جاۋىپ بەرىپ, قارتتارىمىزعا ۇلكەن قولداۋ كورسەتتى.
ەلىمىزدى وركەندەتۋگە, حالقىمىزدىڭ ءال-اۋقاتىن جاقسارتۋعا باعىتتالعان القىمدى شارالاردى جۇزەگە اسىرۋداعى قاجىرلى قىزمەتتەرىڭىز ءار دايىم تابىستى بولىپ, ويعا العان بارلىق ارمان, جوسپارلارىڭىز ورىندالسىن! ۇلىس وڭ بولسىن, اق مول بولسىن!
ءبىز ءار كۇنىمىز ءوسۋ مەن دامۋ ءۇشىن مۇمكىندىك تۋعىزاتىن, ىرىس-بەرەكەمىز نىعايعان ەلدە ءومىر ءسۇرىپ وتىرمىز. بارلىق يگىلىكتى ىستەر تابىسپەن اياقتالىپ, حالىقارالىق دەڭگەيدە ەتەك العان جۇقپالى ىندەتتەن حالقىمىز امان بولىپ, جەمىستى ەڭبەكتەرىڭىز تەك قانا قۋانىش اكەلسىن!» دەگەن اقجارما تىلەگىن بىلدىرگەن.
قۋات ۋاتحان,
موڭعوليا
