ليۆاننىڭ تريپولي قالاسىندا 23 تامىزدا, ياعني, جۇما كۇنى سۇننيتتەردىڭ ەكى مەشىتىنىڭ جانىندا مينا ورناتىلعان ەكى اۆتوكولىك جارىلىپ, ونىڭ سالدارىنان 42 ادام كوز جۇمدى. بۇل تۋرالى «ازاتتىق راديوسى» حابارلادى.
بۇگىنگە دەيىنگى مالىمەتكە قاراعاندا, قازا تاپقان 42 ادامنان بولەك, 500-دەن اسا ادام جاراقات العان. ولاردىڭ باسىم بولىگى اۋىر حالدە كورىنەدى. بۇل جارىلىستى ازىرگە ەشكىم مويىنىنا العان جوق.
جالپى, ليۆان جەرىندە 1975-1990 جىلدار ارالىعىندا وتكەن ازاماتتىق سوعىستان كەيىن وسىنشاما ادام قۇربان بولعان وقيعا تىركەلمەگەن كورىنەدى.
كەيىنگى ۋاقىتتا ليۆاندا ءتۇرلى دەڭگەيدەگى قاقتىعىستاردىڭ ورىن الۋىنا سيرياداعى جاعداي اسەر ەتىپ وتىر. ويتكەنى, اتالمىش ەلدەگى شيتىك «حەزبوللا» راديكالدى توبىنىڭ قارۋلى وكىلدەرى سيرياعا بارىپ, باشار اسادتى قولداپ, ونىڭ قارسىلاستارىنا قارسى تۇرۋدا. بۇل ءجايت اسادتىڭ ليۆانداعى جاقتاستارى مەن دۇشپاندارى اراسىنداعى قاقتىعىستاردىڭ جيىلەپ كەتۋىنە سوقتىرىپ وتىر.
ەستەرىڭىزگە سالا كەتەيىك, بۇعان دەيىن, ياعني, 16 تامىزدا ليۆاننىڭ باس قالاسى بەيرۋتتە «حەزبوللا» نىساندارى ورنالاسقان اۋداندا جارىلىس بولىپ, سونىڭ كەسىرىنەن 22 ادام ولگەن بولاتىن. مۇنىڭ ءوزى اسادتىڭ ليۆانداعى تىلەۋلەستەرى مەن دۇشپاندارى اراسىنداعى شيەلەنىس كۇردەلەنە تۇسكەنىن اڭعارتادى.
جولدىباي بازاروۆ.
