قىتايدىڭ چۋنتسين قالاسى پارتيا كوميتەتىنىڭ بۇرىنعى حاتشىسى بو سيلاي ايەلى بوگۋ كايلايدىڭ بانكىدەگى ەسەپشوتىنا 5 ملن. يۋان (817 مىڭ دوللار) اقشا قاراجاتى اۋدارىلۋىنا جاۋاپتى ەكەنىن مويىندادى. بۇل تۋرالى يتار-تاسس حابارلادى.
باستاپقىدا بۇل سوما داليان قالاسىندا عيمارات سالۋعا بولىنگەن ەكەن. مۇنى بۇگىن سەنبى كۇنگى سوتتا 2002 جىلى وسى قالدا شەنەۋنىك بولعان ۆان چجەنگان ايعاقتاپ بەردى. سونىمەن بىرگە, قۋعىنعا ۇشىراعان ساياساتكەر ءوزىنىڭ ۇلىنا بيزنەسمەن سيۋي ءميننىڭ ساياحاتقا شىعۋ ءۇشىن جەكە ۇشاق ۇسىنىپ, ونىڭ فرانتسياداعى كەرەمەت وتەلدەردە تۇرۋىن تولەگەنى مەن ۆيللا ساتىپ الىپ بەرگەنىن جوققا شىعارۋىن جالعاستىردى. بو سيلاي مۇنىڭ ءبارىن بىلمەيتىنىن ايتتى.
قازىر بۇرىنعى پارتكوم حاتشىسى قىزمەتتىك جاعدايىن پايدالانىپ, 26,79 ملن. يۋان (4,37 ملن. دوللار) كولەمىندە پارا الدى جانە وتباسى مۇشەلەرىنىڭ وتىنىشىمەن كاسىپكەرلەردىڭ مۇددەلەرىن قورعادى دەگەن ايىپپەن سوتتالعالى وتىر. 64 جاستاعى بو سيلاي 2012 جىلعى قاراشادا وتكەن 18-سەزدە قكپ ساياسي بيۋروسى قۇرامىنا ەنۋگە تولىق ءۇمىتتى بولدى. الايدا, وتكەن جىلدىڭ قىركۇيەك ايىنىڭ سوڭىندا ساياسي بيۋرو ونى «ايتارلىقتاي ءتارتىپ بۇزشىلىقتارعا جول بەرگەنى ءۇشىن» پارتيا قاتارىنان شىعارىپ, ءىسىن قۇقىق قورعاۋ ورگاندارىنا بەرۋ تۋرالى شەشىم قابىلداپ قويدى. قازاننىڭ سوڭىندا قىتاي جوعارعى حالىق پروكۋراتۋراسى بو سيلايدىڭ «بولجامدى قىلمىستىق ىستەرى» تۋرالى تەكسەرىستى باستادى. ونىڭ ايەلى بوگۋ كايلاي بريتانيا ازاماتىن ولتىرگەنى ءۇشىن ءولىم جازاسىنا كەسىلدى, ال كومەكشىسى ۆان ليتسزيۋن پارا العانى جانە لاۋازىمىن اسىرا پايدالانعانى ءۇشىن 15 جىلعا باس بوستاندىعىنان ايىرىلدى.
ساكەن مايلىباي.
