ادەبيەت • 22 ناۋرىز، 2021

ناۋرىز مەيرامىندا وقۋعا بولاتىن كىتاپتار

264 رەت كورسەتىلدى

ناۋرىز قىزىقتارى ەندى باستالعانداي. بۇگىنگى توپتامادان تريللەر، ءومىربايان، ماگيالىق رەاليزم جانرىنداعى تۋىندىلارعا تاڭداۋ جاساپ، سونداي-اق زاماناۋي قازاق پروزاسىنىڭ دامۋ باعدارىن سارالاي الاسىز.

ينستيتۋت (The Institute)

ستيۆەن كينگ

كىشكەنتاي ۇلدى تۇسىندە ۇرلاپ كەتىپ، دارىندى بالالارعا تاجىريبە جۇرگىزىلەتىن كوزدەن تاسا جەردەگى «ينستيتۋتقا» ورنالاستىرادى. باستى كەيىپكەر تىلسىم قاسيەتكە يە، نىسانالى بالا ەدى. «ينستيتۋتقا» كەرەگى دە سول – اۋىر تاجىريبەلەر ارقىلى ءوز ماقساتتارىنا قول جەتكىزۋ. ال بۇل قاپاستان قاشىپ قۇتىلعان ەشكىم جوق. ەبىن تاپقان ەكى اسايدى دەگەن، ۇرىمتال ءساتتى كۇتكەن بالا دۇشپانىمەن اڭدىسا باستايدى. باستىسى بوستاندىققا قول جەتكىزەتىنىنە دەگەن سەنىمىنەن اينىماعان. كەي سىنشىلار، ايداي الەمدى باعىندىرعان قاھارماندىق سيۋجەتتىڭ الدەقاشان تاپتاۋرىن بولعاندىعىن، تۋىندىنىڭ جازۋشىنىڭ وزگە شىعارمالارىمەن جەلىلەس ەكەندىگىن ايتىپ جاتىر.

 

اكە-شەشەمنىڭ بۇنى بىلمەگەنى وكىنىشتى (ال بالالارىمنىڭ جولى بولدى) (The Book You Wish Your Parents Had Read (And Your Children Will Be Glad That You Did)

فيليپپا پەرري

فيليپپا پەرري – بريتاندىق پسيحوتەراپەۆت، بىرنەشە كىتاپتاردىڭ، ونىڭ ىشىندە «Couch Fiction» گرافيكالىق رومانىنىڭ اۆتورى. پسيحوتەراپيامەن بايلانىستى ستەرەوتيپتەردى جويۋعا تىرىسادى. پەرري ءوزىنىڭ جاڭا كىتابىندا ءوسىپ كەلە جاتقان بالاعا جىلى، سەنىمدى قارىم-قاتىناس كورسەتۋدىڭ جولىن تۇسىندىرەدى. سونىمەن قاتار، تەراپەۆت ءسىزدىڭ اكە-شەشەڭىزدىڭ قانداي تيپكە جاتاتىنىن تالداپ، ءوز سەزىمدەرىڭىزدى دۇرىس جەتكىزۋگە جانە بالانى تۇسىنۋگە كومەكتەسەدى.

 

اين رەند. نارىق قۇدايى (Goddess of the Market: Ayn Rand and the American Right)

دجەننيفەر بەرنس

سوڭعى ونجىلدىقتا الەمدىك بەستسەللەرلەر تىزىمىنەن تۇسپەگەن «قاينار» رومانىنىڭ اۆتورى جازۋشى اين رەندتىڭ ءومىربايانىن ارقاۋ ەتكەن ەڭبەك تىڭ دەرەكتەرمەن قۋانتادى. ويتكەنى دجەننيفەر بەرنس – جازۋشىنىڭ جەكە قۇجاتتارىنا العاش رەت رۇقساتپەن قول جەتكىزگەن تاۋەلسىز تاريحشى. ونىڭ ونشاقتى جىلىن سارپ ەتكەن ومىرباياندىق رومانى اين رەند تۇلعاسىنىڭ قالىپتاسۋى مەن دامۋى جايىندا، ارتىندا قالعان مۇرالارى تۋراسىندا سىر شەرتەدى.

 

باقالار (FROG)

مو يان

«باقالار» كىتابىنىڭ سيۋجەتى حح عاسىردىڭ ەكىنشى جارتىسىندا قىتايدا ءوربيدى. كىتاپ اۆتورى مو يان قىتايداعى زاماناۋي قىتاي ادەبيەتىنىڭ كورنەكتى وكىلى، نوبەل سىيلىعىنىڭ لاۋرەاتى. ول ەلدەگى ء«بىر وتباسى، ءبىر بالا» ساياساتىنىڭ شىندىعىن اشىپ كورسەتە وتىرىپ، «باقالاردى» سيقىرلى رەاليزم ەلەمەنتتەرىن قولدانا وتىرىپ جازدى. باستى كەيىپكەر اكۋشەر ۆان سين جۇزدەگەن بالانىڭ جارىق دۇنيەگە كەلۋىنە كومەكتەستى، بىراق جاڭا ساياساتقا وراي ادامدىق ۇستانىمىنا قارسى شىعۋى ءتيىس. بيلىكپەن ىمىراعا كەلۋىنەن باسقا جول دا جوق، ال وزىڭە، ءوز سەنىمىڭە قارسى شىعۋ وڭاي ما؟

بولماعان بالالىق شاق

اقبەرەن ەلگەزەك

اقىننىڭ فەيسبۋك الەۋمەتتىك جەلىسىندە بالالىق شاقتان قالعان ەستەلىكتەرى «قايداعى-جايداعى ەسكە تۇسكەندە» تسيكلىمەن جاريالانىپ، ءوز وقىرمانىن تاپقان بولاتىن. كوپشىلىك اراسىندا كەڭ تارالعان پوۆەست جۋىردا تولىقتىرىلىپ، باسىلىپ شىقتى.

ء«سىز وقىعالى وتىرعان مىنا شاعىن حيقايات مەنىڭ قىزىقتى دا مۇڭدى بالالىق شاعىمنان سىر شەرتەدى. شىعارما شىرايى شىندىعىندا دەمەكشى، وسى حيقاياتتا باياندالعان وقيعالار ويدان شىعارىلعان دۇنيەلەر ەمەس، مەنىڭ باسىمنان وتكەن تاعدىر. حيقاياتتا اتى اتالعان كەيىپكەرلەر دە كەزدەيسوق، قيالىمدا تۋعان جاندار ەمەس، ءبىرى باقيعا اتتانعان، ءبىرى فəنيدە ساۋ-سالامات عۇمىر كەشىپ جاتقان ادامدار»، دەيدى جازۋشى. اۆتوردىڭ ايتۋىنشا، كىتاپ ساتىلىمىنان تۇسكەن قارجى قايىرىمدىلىق ماقساتتا جۇمسالماق. ەندەشە ساۋاپتى ىسكە اسىعايىق، وقىرمان!

ءموپ-ءمولدىر كوزدىڭ قاراسى

بەيبىت سارىباي

كوركەم تۋىندىعا كونە تاراز شاھارىنىڭ مىڭجىلدىق تاريحىمەن استاسقان اڭىز-اڭگىمەلەر مەن جازۋشىنىڭ وزىندىك پايىمى ارقاۋ بولعان. اۆتوردىڭ سياسى كەپەگەن جاڭا تۋىندىسىن وقي وتىرىپ، ماحاببات سيمۆولىنا اينالعان ايشا ءبيبى كەسەنەسى مەن اقىرتاس سارايى سىندى عاشىقتىق حيكايالارى مەن اڭىز-داستان تۋدىرعان كورىكتى قالانىڭ تالايلى سىرىنا قانىق بولاسىز.

«اۋەلدەگى ماقسات جازۋشىعا بەلگىلى ءبىر ءوڭىر تۋرالى ءوز قالاۋىنشا، ءوز ستيلىندە كوركەم تۋىندى جازىپ شىعۋ بولاتىن. مەن تاراز قالاسىنا وسى جەردىڭ تۋماسى، اقىن ەرلان جۇنىسپەن بىرگە كەلدىم. ول وسى توپىراقتىڭ تامىرىمەن بىتە قايناسقان تەرەڭ ءارى تالانتتى اقىن. ەكەۋمىز كىتاپتى جازۋ بارىسىندا تاراز تۋرالى تىڭ دۇنيەلەر ىزدەپ بىرگە جۇردىك. اڭگىمەنى جازىپ شىعاتىن ۋاقىت وتە تىعىز بولدى. كولەمى 100 بەتتەن كەم بولماۋ كەرەك دەگەن تالاپ بولدى. شىعارمانىڭ اتاۋى پويىزدا، تامبۋردا تۇرعاندا قويىلدى. ەرلان باۋىرىما «شىعارماعا ءفيردوۋسيدىڭ ء«موپ-ءمولدىر كوزدىڭ قاراسىن، تارازدان عانا تاباسىڭ» دەگەن ولەڭ جولىن ەپيگراف ەتىپ الامىن»، دەدىم. مۇنىمدى قۇپ كورگەن ەرلان كىتاپ اتاۋىن دا تاۋىپ تۇرعانىمدى ايتىپ، بويىما سەنىم ۇيالاتتى»، دەيدى جازۋشى جاڭا تۋىندىسى حاقىندا.

زاماناۋي قازاق پروزاسى قاتارىن جۋىردا جارىق كورگەن شىعارمالار نۇرلان قاۆدايدىڭ «سۇر اڭگىمە»، ەسبول نۇراحمەتتىڭ «تاۋسىلماس ءتۇن»، بەرىكبول باتاننىڭ «ولىكتەردىڭ ۋىسىندا ەريدى» كىتاپتارى تولىقتىردى. ادەبيەت پەن ادەبيەتشىگە، جازۋشى مەن كەيىپكەرگە كوڭىل بولۋگە ايرىقشا مۇمكىندىك بەرىپ وتىرعان ۋاقىتتى ءتيىمدى وتكىزىپ، قازاق پروزاسىنىڭ قاتارىنا قوسىلىپ كەلە جاتقان جاڭا توپپەن تانىسا وتىرىڭىز!

سوڭعى جاڭالىقتار

قيلى-قيلى تاعدىرلار

تاريح • كەشە

ءبىر شاڭىراقتان – ءۇش مايدانگەر

رۋحانيات • 08 مامىر، 2021

قازاق دەگەنىمىز – باۋىرجان...

رۋحانيات • 08 مامىر، 2021

505-ءشى تۇرمەنىڭ تۇتقىندارى

تاريح • 08 مامىر، 2021

اسكەري ينجەنەرلەر ۇستاحاناسى

وقيعا • 07 مامىر، 2021

ۇقساس جاڭالىقتار