تۇياقباەۆتىڭ ايتۋىنشا, قالاعا كىرۋگە تىيىم سالىنباسا, كارانتيننىڭ ءمانى كەتەدى. سونداي-اق, كومپانيالارعا ءوز قىزمەتكەرلەرى ءۇشىن قالا ىشىندە ۋاقىتشا تۇرعىن ءۇي ىزدەستىرۋدى ۇسىندى.
- كۇن سايىن جارتى ميلليونعا جۋىق ادام وبلىستان قالاعا جۇمىسقا كەلەدى. ءبىز ءۇي-جاي تابۋعا كومەك كورسەتە الامىز. قازىر بارلىق قوناق ءۇي, جاتاقحانا, حوستەل بوس تۇر. بۇل كارانتين كەزىندە قالاعا كوشۋگە جاقسى مۇمكىندىك. نەمەسە قىزمەتكەرلەردى اقىلى دەمالىسقا شىعارىپ, بولماسا قاشىقتان جۇمىس ىستەۋگە كوشىرۋگە بولادى, - دەدى ول بريفينگتە.
سونىمەن قاتار اكىم ورىنباسارى قالاعا تاۋار كىرگىزۋ ماسەلەسىنە توقتالىپ, «جاسىل ءدالىزدىڭ» جۇمىسى تۋرالى ايتىپ ءوتتى.
«كاسىپكەرلەر وندىرۋشىلەر ءوز تاۋارلارىن قالاعا قالاي كىرگىزەدى جانە قالا وندىرۋشىلەرى تاۋاردى قالا سىرتىنا قالاي شىعارادى دەگەن ساۋال قويىپ جاتىر. بۇل ماسەلە بويىنشا جاسىل ءدالىز» ەنگىزىلدى. ياعني, قالانىڭ ىشىندە بولسىن, سىرتىندا بولسىن, ەشقانداي ماسەلە جوق. بارلىعىنا رۇقسات بەرىلەدى. ارينە, ارنايى تالاپتار ساقتالادى» دەپ ءتۇسىندىردى ول.
