بيلەت قۇنى قايتارىلا ما؟
سوڭعى كۇندەرى قوس قالانىڭ ۆوكزالدارىندا سەڭدەي سوعىلىسقان جۇرت كوبەيدى. قالاعا كىرۋ مەن شىعۋدىڭ شەكتەلۋىنە وراي, جول ءجۇرۋ بيلەتتەرىن وتكىزۋگە كەلگەن ءنوپىر حالىقتىڭ كوكەيىندەگى ساۋال – «بيلەت قۇنى قايتارىلا ما؟»
«قازاقستان تەمىر جولى» ۇك» اق ءباسپاسوز قىزمەتىنىڭ حابارلاۋىنشا, جولاۋشىلار بيلەتتەرى ءۇشىن اقشانى تولىق كولەمدە (سوڭعى تاۋلىكتە ۇستاپ قالۋسىز) قايتارۋ تۋرالى شەشىم قابىلداندى.
كەشە كاسسالاردا بيلەتتەردى قايتارۋ بويىنشا جۇكتەمە ايرىقشا جوعارى بولدى. بۇل رەتتە كاسسالار قوسىمشا قولما قول اقشامەن قامتاماسىز ەتىلدى. «وسى سياقتى سيرەك جاعدايدا بيلەت قۇنى تولىق تولەنەدى جانە جولاۋشى تيەسىلى اقشاسىن وزىنە ىڭعايلى كەز كەلگەن ۋاقىتتا, سونىڭ ىشىندە كەلەسى كۇنى دە الا الادى. ءبىز قازىرگى قالىپتاسقان جاعدايدا جولاۋشىلارىمىزدان بيلەتتەردى قايتارۋدى راسىمدەۋ بارىسىنا شىدامدىلىق تانىتۋدى جانە تۇسىنىستىكپەن قاراۋدى سۇرايمىز. اقشا قاراجاتىن تولىق كولەمدە قايتارۋعا كەپىلدىك بەرەمىز» دەيدى كومپانيا باسشىلىعى.
سۇراقتاردى قايدا جولداۋعا بولادى؟
قازاقستاندىقتاردىڭ كوروناۆيرۋستى جۇقتىرعانى راستالعاننان كەيىن حالىق اراسىندا الاڭداۋشىلىق ايتارلىقتاي ءوستى. بۇرىن الەۋمەتتىك مەديتسينالىق ساقتاندىرۋ قورىنىڭ بىرىڭعاي بايلانىس ورتالىعىنا كۇنىنە شامامەن 1500-2000 قوڭىراۋ تۇسەتىن بولسا, قازىر كۇنىنە 6 مىڭعا دەيىن ساۋال قويىلادى.
1406 بايلانىس ورتالىعىنىڭ وپەراتورلارى حالىققا دەنساۋلىعىن نىعايتۋ جانە اعزاسىن قورعاۋ, كۇدىكتى سيمپتومدار بايقالعاندا ارەكەتتەر جاساۋ بويىنشا كەڭەس بەرۋ دايىندىعىنان ءوتتى.
«بايلانىس ورتالىعى قاجەتتى الدىن الۋ شارالارى جانە ۆيرۋستان قورعانۋ بويىنشا كەڭەس بەرۋ ءۇشىن جۇمىس ىستەيدى. وپەراتورلار سونىمەن بىرگە سىرقاتتانىپ قالعان كەزدە قايدا بارۋ كەرەكتىگىن, قانداي سيمپتومدارعا نازار اۋدارۋ قاجەتتىگىن, تالداۋلاردى (اناليزدەردى) قايدا تاپسىرۋعا بولاتىنىن تۇسىندىرەدى. ۇكىمەت پەن ۋاكىلەتتى ورگاندار قابىلداپ جاتقان شارالار حالىقتى قورعاۋعا باعىتتالعان. الايدا قوعامدىق ورىندارعا بارۋ دەنساۋلىققا قاۋىپ توندىرەتىنىن سانالى ازاماتتار ءتۇسىنۋى كەرەك», دەلىنگەن الەۋمەتتىك مەديتسينالىق ساقتاندىرۋ قورىنىڭ ءباسپاسوز قىزمەتى تاراتقان حابارلامادا.
ەسكە سالا كەتەيىك, سۇراقتاردى 1406 وپەراتورلارىنا Qoldau 24/7 ءموبيلدى قوسىمشاسى ارقىلى دا جولداۋعا بولادى. جولدانىمعا تىركەۋ ءنومىرى بەرىلەدى, سودان كەيىن ءسىز ءوزىڭىزدىڭ جەكە كابينەتىڭىزدە ونىڭ مارتەبەسىن تەكسەرە الاسىز.
شەتەلدەن ازىق-ت ۇلىك تاۋارى كەلە مە؟
قارجى مينيسترلىگىنىڭ مەملەكەتتىك كىرىستەر كوميتەتى حالىق تۇتىناتىن الەۋمەتتىك ماڭىزى بار يمپورتتالاتىن ازىق-ت ۇلىكتەرگە «جاسىل ءدالىز» ورناتتى. بۇل شارالار ەل اراسىندا ءبىرىنشى كەزەكتە تۇتىناتىن تاۋارلار تاپشىلىعىن تۋدىرماۋ ءۇشىن جاسالۋدا.
كوميتەت دەرەگىنشە, 2019 جىلدىڭ 1 قاڭتارىنان باستاپ قازاقستانعا جالپى قۇنى 554,6 ملن دوللاردى قۇرايتىن 872 مىڭ توننا تاۋار كىرگىزىلگەن. اتاپ ايتقاندا, قانت – 165 مىڭ توننا, قۇس ەتى – 148 مىڭ توننا, پياز – 133 مىڭ توننا, ءسۇت – 118 مىڭ توننا, ورامجاپىراق – 85 مىڭ توننا جانە 78 مىڭ توننا ءسابىز سياقتى الەۋمەتتىك ماڭىزى بار ازىق-ت ۇلىك قاتارىنا جاتقىزىلعان 19 ءتۇرلى تاۋار يمپورتتالعان.
قازىرگى تاڭدا العاشقى قاجەتتىلىك تاۋارلارىن تاسىمالدايتىن نەگىزگى كومپانيالارعا كەدەندىك تەكسەرىس, ساراپتاما, جانە تاۋاردىڭ قۇنىن كەدەندىك باقىلاۋ سياقتى شارالار قولدانىلمايدى. سونداي-اق قازىر شەكارادا وزگە ساناتتاعى بيزنەس سۋبەكتىلەرىنە اكىمشىلىك جۇكتەمەلەردى ازايتۋ ءۇشىن «قىزىل جانە سارى دالىزدەردىڭ» جۇمىسى قىسقارتىلعان.
