ساياسات • 10 ناۋرىز، 2020

ساراپشىلاردىڭ وڭ باعاسى

26 رەتكورسەتىلدى

ەلوردادا اقپارات جانە قوعامدىق دامۋ ءمينيسترى داۋرەن اباەۆتىڭ توراعالىعىمەن بەيبىت جيىندار تۋرالى زاڭ جوباسىن جەتىلدىرۋ ماسەلەسى تالقىلاندى.

وعان سىرتقى ىستەر ۆيتسە-ءمينيسترى ەرجان اشىقباەۆ، ەۋروپاداعى قاۋىپسىزدىك جانە ىنتىماقتاستىق ۇيىمى باعدارلامالارى كەڭسەسىنىڭ باسشىسى دەرد سابو، USAID-ءتىڭ نۇر-سۇلتانداعى كەڭسەسىنىڭ ديرەكتورى رايان ۋەدل، بۇۇ-نىڭ قازاقستانداعى ادام قۇقىقتارى جونىندەگى جو­عار­عى كوميسسار باسقارماسىنىڭ وكىلى لەيلا دۇيسەكوۆا، «بۇۇ – ايەل­دەر» قۇرىلىمىنىڭ جوبالىق مەنەد­جەرى گۇلنار سمايىلوۆا، سون­داي-اق گەرمانيا، ۇلىبريتانيا، نيدەر­لاند، اقش-تىڭ قازاقستانداعى ەلشىلىكتەرىنىڭ وكىلدەرى قاتىستى.

– ءبىز حابارلاندىرۋ جۇيەسىن ەن­گىزۋدەمىز. بۇل – ۇلكەن قادام. حالىق­پەن كەڭەسكەننەن كەيىن «رەگلامەنتتەلگەن ءتارتىپ» تۇسىنىگى بولمايتىن بولدى. ايتا كەتەرلىگى، «اشىق دەرەكتەر» پورتالىندا زاڭ جوباسىن تالقىلاۋ اياسىندا 260-تان استام ەسكەرتۋ مەن ۇسىنىس كەلىپ ءتۇستى، – دەدى د.اباەۆ.

ءمينيستردىڭ ايتۋىنشا، بەيبىت جيىندار تۋرالى زاڭ جوباسى پرەزيدەنت قاسىم-جومارت توقاەۆتىڭ تاپسىرمالارى اياسىندا جۇزەگە اسىپ وتىر. ماسەلەن، زاڭ جوباسىندا ميتينگتەردى وتكىزۋ تۋرالى حابارلاۋ پروتسەدۋراسىن، ۇعىمدىق اقپاراتتى ەنگىزۋ، بەيبىت جيىنداردى قالانىڭ شەتىندە ەمەس، ارنايى ورىنداردا وتكىزۋ قاراس­تى­رىلعان.

– بۇل قۇجات تۋرا وسىلاي ازىرلەنۋى ءتيىس. قولعا الىنىپ جاتقان جۇمىس بارىسى ءبىزدىڭ كوڭىلىمىزدەن شىعىپ وتىر. ءتۇرلى ورىنداردا، ءتۇرلى دەڭگەيلەردە پىكىرتالاستار ءوربىپ جاتىر. وسىنىڭ بارلىعى جوباسى دا، باعىتى دا دۇرىس زاڭدى قابىلداۋعا ۇيىتقى بولادى دەگەن ويدامىن. بۇل ۇردىسكە ەۋروپاداعى قاۋىپسىزدىك جانە ىنتىماقتاستىق ۇيىمى دا ۇلەس قوسۋعا دايىن، – دەدى د.سابو.

ونىڭ ايتۋىنشا، ەۋروپاداعى قاۋىپسىزدىك جانە ىنتىماقتاستىق ۇيىمىندا وسىنداي ماسەلەلەرمەن اينالىساتىن ارنايى ينستيتۋتتار مەن جەكەلەگەن بولىمشەلەرى بار كورىنەدى. ۇيىمعا مۇشە مەملەكەتتەردىڭ ءوتىنىشى بويىنشا ساراپشىلىق پىكىر ءبىلدىرىلىپ وتىرادى.

– بەيبىت جيىنداردى وتكىزۋ مادەنيەتىن جوعارىلاتۋ بويىنشا جۇمىس جۇرگىزۋ كەرەك دەپ ەسەپتەيمىن. ەرتەڭگى ەل دامۋىنا قاجەت اسا ما­ڭىزدى زاڭدى ازىرلەگەندەرىڭىز ءۇشىن العىسىمدى بىلدىرەمىن. اتالعان زاڭدى قابىلداپ قانا قويماي، حا­لىققا بەيبىت جيىندار وتكىزۋدىڭ ءادىس-تاسىلدەرىن دە ۇيرەتۋ كەرەك دەپ ويلايمىن. ءماسليحاتتار الاڭىندا، قوعامدىق كەڭەستەردە تۇرعىنداردىڭ قالاي بەيبىت جينالاتىنى، ولاردىڭ سىپايى تۇردە وي بىلدىرۋگە بولاتىنى تۋرالى تىڭداۋ وتكىزگەن ابزال. سونداي-اق جالپى جاعدايدى ميتينگكە ۇلاستىرۋدىڭ قاجەتى دە شامالى، – دەدى گ.سمايىلوۆا.

كەزدەسۋ بارىسىندا داۋرەن اباەۆ حالىقارالىق ۇيىمداردىڭ وكىلدەرىنىڭ ساۋالدارىنا جاۋاپ بەرىپ، زاڭ جۇمىسى اياسىندا اتقارىلىپ جاتقان وزگە دە ماڭىزدى ماسەلەلەرگە توقتالدى.

 

سوڭعى جاڭالىقتار

ىستىق تاماق تاراتتى

قازاقستان • كەشە

ۇقساس جاڭالىقتار