ء«بىز كۇن سايىن ازاماتتاردى اقپاراتتاندىرۋمەن اينالىسىپ جاتىرمىز. مينيسترلىكتىڭ ينتەرنەت رەسۋرستارىندا ماڭىزدى مالىمەتتەر ءوز ۋاقىتىندا جاريالانۋدا. سوعان قاراماستان, ءارتۇرلى الەۋمەتتىك جەلىلەردە جالعان اقپاراتتار تاراپ, ەلدى دۇرلىكتىرۋدە. مىسالى, بۇگىن ۋاتساپ جەلىسى ارقىلى «نۇر-سۇلتاندا ەكى ادام قايتىس بولدى» جانە «الماتىدا ۆيرۋس جۇقتىرعان قىتاي ازاماتتارى ەمدەلىپ جاتىر» دەگەن شىندىققا جاناسپايتىن اقپارات تاراۋدا. ونىڭ ءبارى جالعان. وڭىرلەردەن دە وسىنداي اقپارات كەلىپ جاتىر. ءبىزدىڭ نەگىزگى مىندەتىمىز – ەلىمىزدەگى ءتۇرلى اۋرۋدان, ينفەكتسيادان قورعاۋ, اشىق ءارى تولىق اقپارات بەرۋ. قىتايدا 80 مىڭنان استام ناۋقاس تىركەلدى. سوڭعى كۇندە 0,18 پايىز قوسىمشا وسىممەن ناۋقاستاردىڭ تىركەلگەنى بەلگىلى بولىپ وتىر. بىراق اۋرۋحانادان شىققان ازاماتتاردىڭ سانى 52 مىڭنان استى. ياعني, بۇكىل ناۋقاستىڭ 65 پايىزى ەمدەلىپ شىقتى. وكىنىشكە قاراي, دۇنيە جۇزىندەگى 79 مەملەكەتتە 14 مىڭنان استام ناۋقاس تىركەلدى. قازىرگى تاڭدا قازاقستاندا كوروناۆيرۋس ينفەكتسياسىمەن ناۋقاستانعان ادامدار تىركەلمەدى. مۇنداي دياگنوز ءالى ەشكىمگە قويىلعان جوق», دەدى ول.
سونداي-اق ە.ءبىرتانوۆ ءوز سوزىندە 20 اقپاننان باستاپ كوروناۆيرۋس ينفەكتسياسى بويىنشا قاۋىپتى مەملەكەتتەر ءۇش ساناتقا بولىنگەنىن اتاپ ءوتتى.
«اتالعان ساناتتار بويىنشا باقىلاۋ جۇمىستارى جۇرگىزىلۋدە. «ا» جانە «ب» ساناتتارى بويىنشا 900-دەن استام ازامات كارانتينگە جاتقىزىلدى. ءۇشىنشى ساناتتاعى 7515 ازامات باقىلاۋدا. ءتۇرلى مەملەكەتتەن كەلگەن 8 مىڭعا تارتا ازامات قازىر دەنساۋلىق ساقتاۋ مينيسترلىگىنىڭ باقىلاۋىندا. ۆيرۋس باستالعالى بەرى ارنايى ۇلتتىق ساراپشىلىق لابوراتوريا ءۇش مەملەكەتتەن قاجەتتى لابوراتورلىق تەستتى الدى. قازىرگى كۇنى 11 مىڭ ادام تەكسەرىس تەستىلەۋىنەن ءوتتى. بارلىق تەست ناتيجەسى جاقسى. كوروناۆيرۋس تابىلمادى», دەدى ول.
سونىمەن قاتار مينيستر مەكتەپتەردە وقۋ توقتاتىلمايتىنىن اتاپ ءوتتى.
ء«بىز قازىر ارنايى قۇرىلعان كوميسسيا ارقىلى الدىن الۋ شارالارىن جوسپارلاپ جاتىرمىز. ادامدار كوپ جينالاتىن مەرەكەلىك شارالاردى شەكتەۋ – ساقتىقتىڭ ءبىرى دەۋگە بولادى. سەبەبى ۆيرۋستىڭ كىمنەن, قالاي جۇعاتىنىنا ەشكىم كەپىلدىك بەرە المايدى. سول سەبەپتى بارىنشا ساقتانعانىمىز ابزال», دەدى ول.
يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك قاماليەۆ قازاقستانعا كەلەتىن جولاۋشىلاردىڭ تاسىمالىن شەكتەۋ بويىنشا جاڭا شارالاردىڭ ەنگىزىلەتىنىن جەتكىزدى.
«وسىعان دەيىن حابارلاعانىمىزداي, قازاقستان مەن قىتاي اراسىنداعى بارلىق تۇراقتى رەيس 2020 جىلدىڭ 3 اقپانىنان باستاپ توقتاتىلعان ەدى. ماحان-ەير اۋە كومپانياسىنىڭ الماتى – تەگەران باعىتى بويىنشا رەيستەرى توقتاتىلدى. الماتى – باكۋ جانە اقتاۋ – باكۋ باعىتتارى بويىنشا ازەربايجانمەن ارادا اپتاسىنا 15 رەيس بار بولاتىن. ءبىز الماتى – باكۋ رەيسىن 5-تەن 1 رەيسكە دەيىن, ال اقتاۋ – باكۋ رەيستەرىن 7-دەن 1-گە دەيىن قىسقارتتىق», دەدى ب.قاماليەۆ.
ۆيتسە-مينيستر بۇل شەشىمدى ۇكىمەت جانىنداعى ۆەدومستۆوارالىق كوميسسيا قابىلداعانىن ايتىپ, 1 ناۋرىزدان باستاپ نۇر-سۇلتان مەن سەۋل اراسىنداعى اۋە رەيستەرى 9-دان 3-كە دەيىن ازايعانىن العا تارتتى.
«بۇل رەيستەردى «Air Astana» مەن وڭتۇستىككورەيالىق «Asiana» اۋە كومپانياسى ورىنداپ كەلگەن. كوميسسيا سونىمەن بىرگە 8 ناۋرىزدان باستاپ وڭتۇستىك كورەيانىڭ ازاماتتارى مەن 1 ساناتتاعى ەلدەر ازاماتتارىنىڭ ەلگە كىرۋىن شەكتەۋ تۋرالى شەشىم قابىلدادى. وسىعان بايلانىستى سەۋل – الماتى جانە سەۋل – نۇر-سۇلتان باعدارى بويىنشا ساپارعا جاۋاپتى اۋە كومپانيالارىنىڭ بارىنە راديوگرامما جىبەردىك», دەدى ۆيتسە-مينيستر.
ايتا كەتەتىن ءبىر جايت, ءبىرىنشى «ا» ساناتىندا قىتاي, يران, وڭتۇستىك كورەيا ەلدەرى, ال ءبىرىنشى «ب» ساناتىندا قحر, گونكونگ, ماكاو, تايۆان (قحر), جاپونيا, يتاليا, ەكىنشى ساناتتا فرانتسيا, گەرمانيا, تايلاند, ازەربايجان, ءۇشىنشى ساناتتا ءباا, يسپانيا, مالايزيا, يراك, شۆەيتساريا, ۇلىبريتانيا, باحرەين, كۋۆەيت, سينگاپۋر, اقش قاتارلى مەملەكەتتەر تۇر.
دەنساۋلىق ساقتاۋ مينيسترلىگى كوروناۆيرۋس ينفەكتسياسىنىڭ تارالۋىن بولدىرماۋ ءۇشىن كەلەسى الدىن الۋ شارالارىن ۇسىنادى. الدىمەن قول مەن بەتتى سابىنمەن ءجيى جانە مۇقيات جۋ, قولدى زالالسىزداندىرۋدا ءسپيرتتى انتيسەپتيكتەردى قولدانۋ, ادامدار كوپ جينالاتىن ورىنداردان اۋلاق بولۋ, ناۋقاس ادامدارمەن بايلانىستا بولماۋعا, سۋىق تيۋ بەلگىلەرى (جوعارى تەمپەراتۋرا, مۇرىننىڭ بىتەلۋى, جوتەل, تاماقتىڭ اۋرۋى) پايدا بولعان جاعدايدا, تۇرعىلىقتى جەرى بويىنشا دارىگەرمەن كەڭەسۋ كەرەك.
