سەنات توراعاسى داريعا نازارباەۆا اتاپ وتكەن جەڭىل ونەركاسىپتى دامىتۋداعى بىرقاتار كەدەرگىلەر:
- بۇل ەڭ الدىمەن ءوندىرىستىڭ قىمباتتىعى. ءبىزدىڭ وتاندىق كاسىپورىندار زاماناۋي جابدىقتار مەن ارزان جۇمىس كۇشىن قولدانىپ وتىرعان ازيالىق وندىرۋشىلەرمەن باسەكەلەس بولۋعا ءماجبۇر. سوندىقتان ولارمەن سالىستىرعاندا ءونىم قاجەت مولشەردەن الدەقايدا از.
- قاجەتتى جابدىقتاردىڭ جوقتىعى. كەڭەستىك جابدىقتاردان باسقاسىنىڭ ءبارى يمپورتتىق, كوپشىلىگى توزىعى جەتكەن جابدىقتار. وتاندىق كاسىپورىندارداعى جابدىقتاردى جاڭارتۋ كوەففيتسەنتى جىلىنا 3-4 پايىزدى قۇرايدى. جابدىقتاردى جاڭالاۋ كرەديتكە نەمەسە كاسىپورىننىڭ ءوز قاراجاتى ەسەبىنەن جۇزەگە اسىرىلادى, شەتەلدىك فيرمالاردا بۇل كورسەتكىش 15-17 پايىزدى قۇرايدى جانە كوبىنەسە مەملەكەت تاراپىنان ينۆەستيتسيالىق قولداۋعا بايلانىستى.
- شيكىزات تاپشىلىعى. ەلىمىزدە سينتەتيكالىق ماتەريالدار وندىرىلمەيدى, دەگەنمەن تابيعي وتاندىق شيكىزاتتىڭ تاپشىلىعى اسا سەزىلىپ وتىر. قازاقستاندىق ونىمدەگى شيكىزاتتىڭ وزىندىك قۇنى 60 پايىزدى قۇرايدى.
- مەملەكەتتىك قولداۋ شارالارى تيىمدىلىگىنىڭ تومەندىگى. جەڭىل ونەركاسىپ كاسىپورىندارى اينالىمعا قاراجات جەتپەگەندىكتەن جانە ءوندىرىستى جاڭعىرتۋ مەن قايتا قۇرىلىمداۋعا ارنالعان ينۆەستيتسيا دەڭگەيىنىڭ تومەندىگىنەن زارداپ شەگىپ وتىر. كاسىپورىندار كوبىنەسە بانكتەردەن كرەديت الا المايدى. ەكىنشى دەڭگەيدەگى بانكتەر بيزنەستەن تۇسكەن وتىنىمدەردى قاراعان كەزدە كەپىل مۇلكىن وتە تومەن مولشەرلەمە بويىنشا باعالايدى, كەلەشەكتەگى كەلىسىمشارتتاردى كەپىل مۇلكى رەتىندە قاراستىرمايدى. كرەديت العاننان كەيىن كاسىپورىندار عيماراتتى سالىپ بىتىرمەي, جابدىقتاردى الىپ كەلمەي تۇرىپ تولەم تولەۋدى باستاۋعا ءماجبۇر.
- جەڭىل ونەركاسىپ ءۇشىن سەنىمدى كەلەشەكتىڭ جوقتىعى. وتكەن جىلى جەڭىل ونەركاسىپتىڭ ونەركاسىپتىك وندىرىستەگى ۇلەسى نەبارى ءنول ءبۇتىن وننان ءتورت پايىزدى (0,4%) قۇرادى. ەگەر ەرتەڭ جەڭىل ونەركاسىپ جويىلىپ كەتسە, قاراپايىم تۇتىنۋشىلار مۇنى بايقاماۋى دا مۇمكىن.
- كاسىپكەرلەردىڭ بارلىق كۇش-جىگەرىن جوققا شىعاراتىن كولەڭكەلى يمپورتتىڭ بولۋى. سالىق پەن باج تولەمدەرىنىڭ جوقتىعىنا بايلانىستى, ساپاسىنىڭ تومەندىگى ەسەبىنەن كونترافاكت ارزان.
