جالپى, بارلىق كەزەڭدە ەكونوميكانىڭ تابىستى بولۋى شاعىن جانە ورتا بيزنەستىڭ دامۋىمەن تىكەلەي بايلانىستى ەكەنى انىق. ال مەملەكەت بۇل باعىتتاعى جۇمىسقا قارقىن بەرىپ, بارلىق جاعدايدى قاشان دا دايىن. الماتى وبلىسىندا دا كاسىپكەرلەردى ىنتالاندىرۋ مەن مەملەكەتتىك قولداۋ دا ءوز دەڭگەيىندە ەكەن. بىلتىر شاعىن جانە ورتا بيزنەستى قولداۋعا قازىنادان 11,8 ميلليارد تەڭگە جۇمسالىپتى. ناتيجەسىندە وبلىس بويىنشا 48 مىڭنان استام جاڭا جۇمىس ورىنى اشىلعان. ءبىر جىل ىشىندە وتىز ءبىر مىڭ ادام تۇراقتى جۇمىسپەن قامتىلىپتى.
شاعىن جانە ورتا بيزنەستىڭ اياعىنان تۇرىپ, شارۋاسىنىڭ دوڭگەلەنۋىنە مەملەكەتتىك باعدارلامالار دا وڭ اسەرىن تيىگىزىپ كەلەدى. ونىڭ ىشىندە ايماقتارعا پايدالى باعىت رەتىندە «باستاۋ بيزنەس» جوباسىن ايتۋعا بولادى. جەتىسۋدا جاڭادان ءىس باستاۋعا وسى جوبانىڭ جاردەمى ءتيىپ وتىر ەكەن. مۇنىڭ ارتىقشىلىعى, ىنتاسى بار ادامدى بيزنەسكە باۋلىپ, ءوندىرىس پەن ونەركاسىپتىڭ قىر-سىرىن مەڭگەرگەننەن كەيىن بارىپ, بيۋدجەت تاراپىنان قارجىلاندىرۋ تەتىكتەرى ىسكە قوسىلادى. باسقاشا ايتقاندا, كاسىپكەر ىسكەرلەر نارىعىنا قاجەتتى دايىندىقپەن كەلەدى. ماسەلەن, بىلتىر وسى «بيزنەس باستاۋ» جوباسى اياسىندا 4360 ادام ارانيى كۋرستان ءوتىپ, ىسكەرلىكتىڭ قىر-سىرىن مەڭگەرگەن ەكەن. ونىڭ ىشىندە العاشقى التى ايدا 1500 ادام قاجەتتى ءبىلىم الىپ, مەملەكەت تاراپىنان قارجىلاي قولداۋعا يە بولعان. ال باعدارلاما بويىنشا قارجىلاندىرىلعان 417 جوبا ناقتى جۇزەگە اسىپتى.
- وتكەن جىلى «اتامەكەن» ۇلتتىق كاسىپكەرلەر پالاتاسىنىڭ ۇيىمداستىرۋمەن وبلىس تۇرعىندارىن بيزنەسكە باۋلۋ باعىتىندا ءبىرشاما جۇمىس ىستەلدى. العاشقى كەزەڭدە «باستاۋ بيزنەس» جوباسىمەن 1500 ادام وقىدى. ولاردىڭ ءوز بيزنەسىن باستاۋىنا جەڭىلدەتىلگەن نەسيە مەن مەملەكەتتىك گرانتتار بەرىلدى. التى ايدا 417 ادامعا ناقتى كومەك بەرىلىپ, ونىڭ ىشىندە 172 كاسىپكەر ميكرونەسيە جانە 245 ادام گرانت يەگەرى بولدى. ال «باستاۋ بيزنەس» جوباسىنىڭ ەكىنشى كەزەڭىندە 2860 ادام ىسكەرلىك الىپپەسىن وقىپ, ولار ۇسىنعان 603 جوبا قارجىلاي قولداۋعا لايىق بولدى, - دەيدى «اتامەكەن» ۇلتتىق كاسىپكەرلەر پالاتاسى الماتى وبلىستىق فيليالىنىڭ توراعاسى اسەت شاياحمەتوۆ.
ايماقتاعى شاعىن بيزنەستىڭ قالىپتاسۋىنا «جاس كاسىپكەر» جوباسى دا جاقسى كومەك بولۋدا. بۇل باعدارلاما 29 جاسقا دەيىنگى جاستارعا ىسكەرلىكتىڭ قىر-سىرىن ۇيرەتىپ, ءوز بيزنەسىن جۇرگىزۋگە باعىتتالۋىمەن قۇندى. قازىردىڭ وزىندە ناتيجە بار. بىلتىر الماتى وبلىسى بويىنشا 1450 جاس كاسىپكەر وسى باعدارلاما اياسىندا دايارلىقتان ءوتىپتى. بۇل تىزىمدەگى 439 جاس كاسىپكەردىڭ 439 جوباسى مەملەكەت تاراپىنان ماقۇلدانىپ, ولارعا «ەڭبەك» باعدارلاماسى بويىنشا 200 ايلىق ەسەپتىك كورسەتكىش مولشەرىندە گرانت العان.
جالپى, شاعىن جانە ورتا بيزنەستىڭ گۇلدەنۋى ەلىمىزدەگى ورتاشا الەۋمەتتىك سانات ءۇشىن قول جەتىمدى كاسىپ كوزى مەن تابىستى جۇمىس ورنى رەتىندە ماڭىزعا يە ەكەنى راس. بۇل تۇرعىدان العاندا مەملەكەت ءوز ءىسىن اشۋعا ىنتا بىلدىرگەن تاراپتى قولداۋعا مۇددەلى. ىسكەرلىك الىپەسىن ۇيرەتۋ مەن قارجىلاي قولداۋدان بولەك كاسىپ ءتۇرىنىڭ دامۋىنا قولايلى ورتا تۋعىزىپ, ينفراقۇرلىم جاساقتاۋعا اتقارۋشى بيلىك مىندەتتى بولىپ وتىر. الماتى وبلىسىنىڭ مىسالىندا ايتار بولساق, وتكەن جىلى ءدال وسى شاعىن جانە ورتا بيزنەسكە قولايلى وندىرىستىك ينفروقۇرىلىمدى دامىتۋ ءۇشىن 11 جوبا جاسالىپ, وعان 2,3 ميلليارد تەڭگە قاراجات ءبولىنىپتى.
توق ەتەرىن ايتقاندا, ايماقتا «باستاۋ بيزنەس» جوباسى مەن «جاس كاسىپكەر» جوباسى قارقىندى جۇرگەن 2017-2019 جىل ارالىعىندا تۇرعىندارعا ءوز كاسىبىن جۇرگىزۋ ءۇشىن 2 657,5 ميلليارد تەڭگەنىڭ كوتەرمە جاردەمى بەرىلگەن ەكەن. اتاپ ايتقاندا, ىرىكتەلگەن 586 جوباعا 2 082,5 ميلليون تەڭگە جۇمسالىپ, مەملەكەتتىك گرانت بويىنشا 1272 جوبا 574,8 ميلليون تەڭگەگە قارجىلاندىرىلعان ەكەن.
الماتى وبلىسى
