قوس ازامات مادەني ورتالىقتى سالۋعا ۇزىن-ىرعاسى 40 ميلليونعا جۋىق قاراجات جۇمساعان. ەل يگىلىگىنە اينالاتىن ساۋلەتتى ساراي از عانا ۋاقىتتىڭ ىشىندە بوي كوتەرىپتى. جاقسى ءىستىڭ جانىندا اۋىل اكىمدىگىنىڭ باس مامانى ەرقانات تاۋشيەۆ تە ءجۇرىپتى. اۋىلدا باستالعان قۇرىلىسقا قول ۇشىن بەرگەن ازاماتتار از ەمەس. تۇرعىندار دا قاراپ وتىرماعان. جۇدىرىقتاي جۇمىلعان, بىرلىك تانىتقان. ەندى مىنە, ادامي ادەمى ىستەردىڭ ۇيىتقىسى بولاتىن ەڭسەلى عيماراتتىڭ ەسىگى ايقارا اشىلىپ, الىستان وزىنە تارتىپ, مەنمۇندالاپ تۇر.
مادەنيەت اۋىلىنان جاقسى مەن جايساڭنىڭ كوپ شىققاندىعىن ايتا كەتكەن ءلازىم. ولاردىڭ اراسىندا سوتسياليستىك ەڭبەك ەرلەرى, عىلىم دوكتورلارى, گەنەرالدار بار. تەكتىلەردىڭ تابانى تيگەن توپىراقتا بۇگىنگى كۇنى وتكەننىڭ ومىرشەڭ ونەگەسى ءبۇر جارىپ تۇر. بۇگىنگى مادەنيەت وشاعى كوپشىلىكتىڭ جاي عانا ءباتۋالى شاراعا باس قوساتىن جەرى ەمەس, جالپاق جۇرتتىڭ عاسىرلار قويناۋىندا قالعىپ كەتكەن مول مۇراسى قاپتالىپ, رۋحاني جاڭعىرۋدىڭ باعا جەتپەس التىن باستاۋىنا اينالاتىن ورنى.
ورتالىقتىڭ اشىلۋ سالتاناتىندا جاسى جۇزگە جۋىقتاپ قالعان اۋىل اقساقالى دۋلات ءابدىراش ۇلى باتا بەردى. وبلىس اكىمىنىڭ ورىنباسارى عالىمجان ابدىحالىقوۆ پەن «اقتىلەك» مادەني ورتالىعىنىڭ اشىلۋىنا سۇبەلى ۇلەس قوسقان ءمۇتاللاپ جۇمانباەۆ اق تىلەكتەرىن جەتكىزدى. وقۋ وزاتى ءدامىر قاراباي ۇلكەندەرمەن بىرگە ءداستۇرلى لەنتانى قيۋعا قاتىستى. قۋانىشتىڭ بەلگىسىندەي شاشۋ شاشىلدى.
70 ورىندىق كىشى, 220 ورىندىق ۇلكەن زالى بار مادەني ورتالىق قاجەتتى قۇرال-جابدىقتارمەن تولىق قامتاماسىز ەتىلگەن. ەندىگى ارادا 650-گە جۋىق تۇرعىنى بار اۋىل وزدەرىنىڭ بارلىق سالماقتى شاراسىن وسى جەردە وتكىزەتىن بولادى. تۋعان توپىراعىن كوركەيتسەم دەگەن ىزگى نيەتتىڭ ايعاعىنداي قوس كاسىپكەردىڭ ارقاسىندا بوي كوتەرگەن جاڭا ورتالىقتىڭ ادەمى مىسالى وزگەگە ونەگە بولسا, قانەكەي؟!
اقمولا وبلىسى,
بۋراباي اۋدانى.
