19:26
ۇلىبريتانيادا كوروناۆيرۋس جۇقتىرعاندار سانى 51-گە جەتتى
دەنساۋلىق ساقتاۋ ءمينيسترى مەتت حەنكوك ۇلىبريتانيادا ىندەت جۇقتىرعاندار سانى 51-گە جەتكەنىن مالىمدەدى.
سونىمەن قاتار, ول ۇلىبريتانيا ۇكىمەتى مەن ەلدىڭ ۇلتتىق دەنساۋلىق ساقتاۋ قىزمەتى داعدارىسقا قارسى ارەكەت ەتۋگە دايىن ەكەنىن جەتكىزدى.
________________________________________________________________________________________
18:40
يراندا 23 دەپۋتات ۆيرۋس جۇقتىرعان
يراندا ىندەتتەن كوز جۇمعاندار سانى 77-گە جەتتى.
ەلدىڭ دەنساۋلىق ساقتاۋ ورگاندارى 2336 ادام كوروناۆيرۋس جۇقتىرعانىن مالىمدەدى.
دەنساۋلىق ساقتاۋ ءمينيسترىنىڭ ورىنباسارى اليرەزا رايسي مەملەكەتتىك باق-قا سوڭعى تاۋلىكتە 835 ناۋقاس انىقتالعانىن جانە 11 ادام قايتىس بولعانىن حابارلاعان.
يران قىتايدان كەيىن ۆيرۋستان كوز جۇمعاندار سانى ەڭ كوپ ەل.
كەيبىر مالىمەت بويىنشا يراندا كوروناۆيرۋستان قازا بولعانداردىڭ سانى الدەقايدا كوپ.
_________________________________________________________________________________________
18:15
فرانتسيادا 100-دەن استام مەكتەپ جابىلدى
فرانتسيا بيلىگى ۆيرۋس كوپ تاراعان ايماقتاردا ورنالاسقان 120-دان استام مەكتەپتى جاۋىپ تاستادى.
ازىرگە ەلدىڭ سولتۇستىك بولىگىندە ورنالاسقان ۋازا ايماعىنداعى باستاۋىش جانە ورتا مەكتەپتەر جۇمىسىن توقتاتقان, قاشان قايتا اشىلاتىنى بەلگىسىز.
جالپى ەلدە 191 ادام ىندەتكە شالدىققان جانە 3 ادام ءولىمى تىركەلدى.
ءبىلىم ءمينيسترى جان-ميشەل بلانكە ەلدەگى بارلىق وقۋ ورىندارىن جابۋ تۋرالى شەشىم قابىلدانباعانىن ايتتى.
بيلىك قازىردىڭ وزىندە شەتەلگە بارۋدى جوسپارلاعان سىنىپتىق ساپارلاردى توقتاتتى.
_____________________________________________________________________________________________
16:35
كوروناۆيرۋس ۋكرايناعا جەتتى
ۋكراينادا ۆيرۋس جۇقتىرعان العاشقى ناۋقاس تىركەلدى.
دەنساۋلىق ساقتاۋ مينيسترلىگى قوعامدىق دەنساۋلىق ورتالىعىنىڭ وكىلى يگور كۋزين جەكسەنبى كۇنى چەرنوۆتسى قالاسىندا ەر ادام ىندەت جۇقتىردى دەگەن قاۋىپپەن اۋرۋحاناعا جەتكىزىلگەنىن حابارلادى. ناۋقاستىڭ قازىرگى جاعدايى تۇراقتى.
ىندەتتى جۇقتىرعان ازامات ەلگە رۋمىنيادان اۆتوكولىكپەن كەلگەن, ال وعان دەيىن ونىڭ يتاليادا بولعانى انىقتالدى.
قازىر ۋكراين بيلىگى بۋحارەستپەن بايلانىسىپ, رۋمىنياعا ۇشقان رەيس جولاۋشىلارىن تەكسەرۋدى ۇسىنىپ جاتىر.
ناۋقاس ايەلىمەن بىرگە ساياحاتتاعان, ول قازىر كارانتيندە. شەكارادان وتكەن كەزدە ەكەۋىنىڭ دە تەمپەراتۋراسى قالىپتى بولعانى ايتىلدى.
_____________________________________________________________________________________________
16:00
وليمپيادا جىل سوڭىنا شەگەرىلۋى مۇمكىن
جاپونيانىڭ حالىقارالىق وليمپيادا كوميتەتىمەن جاسالعان كەلىسىمشارتى ويىندى جىل سوڭىنا دەيىن وتكىزۋگە مۇمكىندىك بەرەدى.
«كەلىسىمشارت بويىنشا ويىن 2020 جىلى وتكىزىلۋى ءتيىس, ناقى ۋاقىتى كورسەتىلمەگەن. ياعني, بۇل وليمپيا ويىندارىن كەيىنگە شەگەرۋگە كەدەرگى بولمايدى دەگەندى بىلىدرەدى»,- دەدى سەيكو حاسيموتو.
ويىن بيىلعى جىلدىڭ شىلدە ايىندا توكيو قالاسىندا جوسپارلانعان.
_____________________________________________________________________________________________
15:52
مالايزيادا تاعى 7 ادام ۆيرۋس جۇقتىردى
مالايزيا دەنساۋلىق مينيسترلىگىنىڭ حابارلاۋىنشا, ەلدە ۆيرۋس جۇقتىرعان تاعى 7 ادام تىركەلدى. قازىر ناۋقاستاردىڭ جالپى سانى 36-عا جەتتى.
_____________________________________________________________________________________________
15:16
تاعى ءبىر قىتاي دارىگەرى ۆيرۋستان كوز جۇمدى
The Global Times قىتايدىڭ مەملەكەتتىك باسىلىمىنىڭ مالىمەتىنشە, كوروناۆيرۋستان تاعى ءبىر قىتاي دارىگەرى قازا بولدى.
دارىگەر مەي چجۋنمين وسىعان دەيىن كوروناۆيرۋس تۋرالى ەسكەرتپەك بولعان ۋحاندا كوز جۇمعان دارىگەردىڭ ارىپتەسى ەكەن.
___________________________________________________________________________________________
12:35
ماروككودا العاشقى جاعداي تىركەلدى
ماروككو دەنساۋلىق ساقتاۋ مينيسترلىگى كەشە كەشكە ەلدە كوروناۆيرۋس جۇقتىرعان العاشقى ناۋقاستى انىقتادى.
ىندەتتى جۇقتىرعان ماروككاندىق ازامات يتاليادا تۇرادى, قازىر ول كاسابلانكاداعى اۋرۋحانادا ەمدەلىپ جاتىر.
_____________________________________________________________________________________________
12:07
گونكونگ تۇرعىندارىن ۋحاننان ەۆاكۋاتسيالايدى
گونكونگ بيلىگى ەل تۇرعىندارىن ىندەتتتىڭ وشاعى بولعان قىتايدىڭ ۋحان قالاسىنان ەۆاكۋاتسيالاۋ تۋرالى شەشىم قابىلدادى.
533 ادامدى ەلگە قايتارۋ ءۇشىن ءتورت چارتەرلىك رەيس جالدانعان. گونكونگ تۇرعىندارى سارسەنبى جانە بەيسەنبى كۇندەرى ەلگە جەتكىزىلىپ, 14 كۇن كارانتيندە بولادى.
______________________________________________________________________________________________
11:00
وڭتۇستىك كورەيا ۆيرۋسقا «سوعىس» اشتى
سەيسەنبى كۇنى وڭتۇستىك كورەيادا كوروناۆيرۋسپەن اۋىرعاندار سانى 4800 ادامنان استى. ينفەكتسيا ەلدىڭ وڭتۇستىك-شىعىسىندا ورنالاسقان دەگۋ قالاسىندا ءورشىپ تۇر.
تەك دۇيسەنبىنىڭ وزىندە 600 جاعداي تىركەلگەن, ناتيجەسىندە ناۋقاستار سانى 4812-گە جەتكەن. بۇل تۋرالى ىندەتتى باقىلاۋ جانە الدىن الۋ بويىنشا كورەي ورتالىقتارى (KCDC) حابارلادى.
وسى ۋاقىتقا دەيىن قىتايدا تارالعان كوروناۆيرۋستىڭ جاڭا تۇرىنەن 28 ادام قايتىس بولدى.
ەلدە تىركەلگەن ناۋقاستاردىڭ 60%-عا جۋىعى 2,5 ميلليون حالقى بار دەگۋدە ورنالاسقان سينچحوندزي ءدىني سەكتاسىنىڭ فيليالىمەن بايلانىستى.
پرەزيدەنت مۋن مينيسترلەر كابينەتىمەن وتكىزگەن كەزدەسۋدە دەگۋ مەن كيونسان پروۆينتسياسىنداعى جاعداي شەگىنە جەتكەنىن ايتىپ, كورەي ەلى ۆيرۋسقا «سوعىس» اشاتىنىن حابارلادى. كەزدەسۋدىڭ بارلىق قاتىسۋشىلارى ماسكامەن كەلدى.
______________________________________________________________________________________________
09:20
الەمدەگى جاعداي قانداي؟
ىندەت الەم بويىنشا 70-كە جۋىق ەلگە تاراپ ۇلگەرگەن. 90 مىڭنان استام ادام جۇقتىردى دەگەن دەرەك بار. ناۋقاستاردىڭ كوپشىلىگى قىتايدا بولعانىمەن, كوروناۆيرۋس سوڭعى اپتادا باسقا ەلدەردە دە كەڭىنەن تاراپ جاتىر.
قىتايدى ەسەپتەمەگەندە, الەم ەلدەرىندە 8800 ادام ۆيرۋس جۇقتىرعان. ناۋقاستار سانى كوپ تىركەلگەن ەلدەر قاتارىندا يران, وڭتۇستىك كورەيا, يتاليا جانە جاپونيا بار.
كەشە يتاليادا ۆيرۋستان كوز جۇمعاندار سانى 18-دەن 52-گە كوتەرىلسە, جۇقتىرعاندار سانى 1835-كە جەتكەن.
يران دا تاعى 12 ادامنىڭ ءولىمىن تىركەدى. قازىر ەلدە جالپى 66 ادام كوروناۆيرۋستان كوز جۇمدى. قازا بولعاندار قاتارىندا ەل بيلىگىندە جاۋاپتى قىزمەت اتقارعان ساياساتكەر دە بار.
ۇلىبريتانيادا ۆيرۋس جۇقتىرعاندار سانى - 39.
