ە. توعجانوۆ اتاپ وتكەندەي, مەملەكەت باسشىسى ق. توقاەۆ قىتايدا پايدا بولعان كوروناۆيرۋستىڭ قازاقستان اۋماعىنا تارالۋىنا جول بەرمەۋ جونىندە ۇكىمەتكە ناقتى ۇيىمداستىرۋ شارالارىن قابىلداۋدى تاپسىردى جانە جاعدايدى ءوزىنىڭ جەكە باقىلاۋىندا ۇستاپ وتىر.
«پرەمەر-مينيستر ۇكىمەت وتىرىسىندا بۇل ماسەلەنى كۇن سايىن قاراۋدا. ارنايى ءىس-شارالار جوسپارى بەكىتىلگەن. اتالعان ماسەلەنى ءجىتى قاداعالاۋدا ۇستاۋ ماقساتىندا قۇرىلعان ۇكىمەتتىك ۆەدومستۆوارالىق كوميسسيا تۇراقتى جۇمىس اتقارىپ, كۇندەلىكتى قاجەتتى شارالار بويىنشا ناقتى شەشىمدەردى ىسكە اسىرىپ وتىر», — دەدى ۆيتسە-پرەمەر.
ونىڭ ايتۋىنشا, وسى ۋاقىتقا دەيىن 11 وتىرىس وتكىزىلىپ, ءتيىستى ورگاندارعا 110-نان استام تاپسىرما بەرىلدى.
سونىمەن قوسا, ۆيرۋستىڭ تارالۋ ايماعى قىسقا مەرزىم ارالىعىندا جىلدام ارتقانىن اتاپ ءوتتى. بۇگىنگى تاڭداعى مالىمەتكە سايكەس, ۆيرۋس الەم بويىنشا 88,4 مىڭ ادامعا جۇققان, 3 مىڭ ادام قايتىس بولىپ, 42,8 مىڭنان استام ادام جازىلىپ شىققان.
الەمدە جاعدايدىڭ ۋشىعۋىنا بايلانىستى, ۇكىمەت بىرقاتار قوسىمشا شارالاردى قابىلدادى.
ماسەلەن, قحر-مەن جولاۋشىلار اۆتوبۋسىنىڭ تاسىمالى, جولاۋشىلار پويىزىنىڭ تاسىمالى مەن اۋە قاتىناستارى, جاياۋ ءوتۋ توقتاتىلدى.
قحر-دان جۇك تاسىمالىن جۇزەگە اسىراتىن اۆتوموبيل كولىكتەرىنىڭ جۇرگىزۋشىلەرى ءۇشىن (27.02.2020 جاعداي بويىنشا 22 اۆتوماشينا) مەديتسينالىق باقىلاۋ الگوريتمى بەلگىلەندى. بۇگىندە بارلىق جۇك تاسىمالى تەك تەمىر جول ارقىلى وتەدى.
ء«بىز شەكارادا بارلىق قاجەتتى سانيتارلىق شارالاردى قابىلدادىق. قازاقستان اۋماعىنا كىرەتىن ادامداردى, ونىڭ ىشىندە ماشينالاردى شەكتەۋ بويىنشا شارالار قابىلداندى. ولاردىڭ ەشقايسىسى مۇندا كەلمەيدى. اۆتوموبيل جۇك تاسىمالىنا قاتىستى ناقتى شارالار قابىلداندى. سوڭعى تاۋلىكتەردە نەبارى 10 اۆتوكولىك ءوتتى. ياعني, ءبىز ولاردىڭ سانىن ازايتتىق», — دەدى ۆيتسە-پرەمەر.
ە. توعجانوۆتىڭ ايتۋىنشا, بۇل شارالار قازاقستان–قىتاي ءوزارا قارىم-قاتىناستارىنىڭ ەكونوميكالىق قۇراۋىشىنا قارسى, بىراق ولار قازىرگى جاعدايدا وتە ماڭىزدى.
«ەكونوميكا ماسەلەسى – بۇل اسا ماڭىزدى ماسەلە. الدىن الا مالىمەتتەر بويىنشا, تەك قىتاي بويىنشا 1%-عا دەيىن تومەندەۋ كۇتىلەدى. ەگەر قىتايدىڭ الەم ەكونوميكاسىنداعى 24% ۇلەسىن ەسكەرسەك, ارينە, بۇل ماسەلە كوپتەگەن ەلدەرگە, ونىڭ ىشىندە قازاقستانعا دا قاتىستى بولادى. الايدا اۋقىمدى ەكونوميكالىق زيان شەگەتىنىمىزدى تۇسىنە وتىرىپ, ءبىز ادامداردىڭ قاۋىپسىزدىگى مەن دەنساۋلىعىنا نۇقسان كەلتىرۋگە قۇقىمىز جوق. ءبىز ءۇشىن بۇل ماسەلەنىڭ ەكونوميكالىق قۇراۋىشىنان گورى, ادامداردىڭ قاۋىپسىزدىگى مەن دەنساۋلىعى ماڭىزدىراق», — دەدى پرەمەر-ءمينيستردىڭ ورىنباسارى.
سونىمەن قاتار, بيىل 1 ناۋرىزدان باستاپ كورەيا رەسپۋبليكاسىمەن تۇراقتى اۋە رەيستەرىنىڭ سانى 9-دان 3-كە دەيىن قىسقاردى. 1 ناۋرىزدان باستاپ يرانمەن جالعىز اۋە رەيسى توقتاتىلدى. 5 ناۋرىزدان باستاپ نۇر-سۇلتان – توكيو اۋە رەيستەرى 2-دەن 1-گە دەيىن قىسقارتىلادى. 5 ناۋرىزدان باستاپ ازەربايجانمەن اۋە رەيسى اپتاسىنا 15 رەتتەن 3-كە دەيىن شەكتەلەدى, بۇل باكۋ رەيسىمەن قازاقستانعا يرانعا باراتىن يران جانە ازەربايجان ازاماتتارىنىڭ وتەتىندىگىمەن بايلانىستى.
سونىمەن قاتار ە. توعجانوۆ ءۇشىنشى ەلدەر ارقىلى ءبىرىنشى ساناتتان ازاماتتاردىڭ كەلۋى ەرەكشە مەديتسينالىق باقىلاۋعا الىنعانىن اتاپ ءوتتى. ءبىرىنشى جانە ەكىنشى ساناتتاعى ەلدەر ءۇشىن شەتەلدىك جۇمىس كۇشىن تارتۋعا رۇقساتتار بەرۋ توقتاتىلدى.
ۆيتسە-پرەمەردىڭ ايتۋىنشا, قازاقستاندىق ستۋدەنتتەرگە قاتىستى جاقسى جاعداي قالىپتاسقان, ولاردىڭ كوبىسى دەمالىس ۋاقىتىندا قازاقستاندا ءجۇر. ولاردىڭ سانى شامامەن مىڭ ادامدى قۇرايدى. ستۋدەنتتەردىڭ بارلىعىنا وڭتۇستىك كورەياعا شىقپاۋعا كەڭەس بەرىلدى. قر بعم-گە ورىن العان جاعدايدى ەسكەرە وتىرىپ, اتالعان جوو-لاردىڭ باسشىلىعىمەن وقىتۋ مەرزىمىن سوزۋ تۋرالى كەلىسسوز جۇرگىزۋ تۋرالى ناقتى تاپسىرمالار بەرىلدى.
ە. توعجانوۆ ۆيرۋسقا قارسى شارالاردى ورىنداۋعا ۇلكەن جاۋاپكەرشىلىكپەن قاراۋعا شاقىردى.
«قۇرمەتتى وتانداستار, ءبىزدىڭ ارقايسىمىز مىندەتتى تۇردە ءوز ۇيىمىزدە, جۇمىس ورتاسىندا, الەۋمەتتىك ورتادا ۆيرۋسقا قارسى قاتاڭ شارالاردى ورىنداۋىمىز قاجەت. بۇل ۇكىمەتتىڭ عانا ەمەس, ءاربىر وتباسىنىڭ, ءاربىر مەملەكەتتىك ورگاننىڭ, ءاربىر ۇيىمنىڭ جاۋاپكەرشىلىگى», — دەدى پرەمەر-ءمينيستردىڭ ورىنباسارى.
سونىمەن قاتار, ول الەۋمەتتىك جەلىلەر ارقىلى تاراتىلاتىن جالعان اقپاراتقا سەنبەۋگە شاقىردى. جالعان اقپارات تاراتقانى ءۇشىن زاڭعا سايكەس قىلمىستىق جاۋاپكەرشىلىككە تارتۋ قاراستىرىلعان.
«مەن وسى ماسەلەگە بارلىقتارىڭىزدان وتە بايىپپەن قاراۋدى سۇرايمىن جانە جالعان اقپاراتتى تاراتقانى ءۇشىن قىلمىستىق جاۋاپكەرشىلىككە دەيىن ءتيىستى جاۋاپكەرشىلىك قاراستىرىلعانىن ەسكەرتەمىن», — دەدى ە. توعجانوۆ.
