«ەرتەڭ, 1 ناۋرىز جۇمىس ساپارىمەن جامبىل وبلىسىنا بارامىن. قورداي اۋدانىنداعى قازاقتار مەن دۇنگەندەر تۇراتىن اۋىل تۇرعىندارىمەن كەزدەسۋدى جوسپارلاپ وتىرمىن. ءبىز ۇلتارالىق, ەتنوسارالىق قاتىناستار ماسەلەلەرىنە دەگەن كوزقاراسىمىزدى قايتا پايىمداۋعا ءتيىسپىز. قازاقستان دوستىق پەن كەلىسىم مەكەنى بولىپ كەلدى جانە سولاي بولىپ قالا بەرەدى. ءبىزدىڭ ۇران: ارالۋاندىقتاعى بىرلىك. مۇندا تۇراتىن بارلىق ۇلتتار, ەتنيكالىق توپتار ءبىرتۇتاس ۇلت بولىپ تابىلادى. ارينە, قازاقستاندا تۇراقتى تۇراتىن ءاربىر ەتنوستىڭ وزىندىك ەرەكشەلىگى بار. ولاردىڭ بارلىعى ءوز تىلدەرىن وقىپ-ۇيرەنۋگە جانە قولدانۋعا, مادەنيەتتەردى دامىتۋعا, ادەت-عۇرىپتاردى ساقتاۋعا قۇقىلى», دەدى پرەزيدەنت.
سونداي-اق مەملەكەت باسشىسى الەم بويىنشا تەز تاراپ جاتقان كوروناۆيرۋستىڭ الدىن الۋ شارالارى, ەلىمىزدەگى ميتينگ وتكىزۋ تۋرالى جاڭا زاڭ جوباسى, سونداي-اق ەاەو ەلدەرىنەن اكەلىنگەن كولىكتەردى تىركەۋ جانە ۇلتتىق قوعامدىق سەنىم كەڭەسىنىڭ جۇمىسى جايىندا اڭگىمەلەدى.
