جاستاردىڭ شىعارماشىلىق باستامالارىن قولداۋ, ۇلتىمىزدىڭ ۇلى اقىنى اباي قۇنانباي ۇلى ادەبي مۇراسىن ناسيحاتتاۋ, وسكەلەڭ ۇرپاقتى قازاق ادەبيەتىنىڭ نەگىزىن قالاۋشى, فيلوسوفيالىق كوزقاراستارى مەن عيبراتىن زەرتتەۋگە تارتۋدى ماقسات تۇتقان تاعىلىمدى ءىس-شاراعا ۋنيۆەرسيتەت ستۋدەنتتەرى اتسالىستى. اقىن ولەڭدەرىن جاتقا وقۋ, اندەرىن ورىنداۋ جانە اباي پوەزياسىن وزگە تىلدەرگە اۋدارۋ اتالىمدارى بويىنشا وتكەن ءسوز دوداسىندا قاتىسۋشىلار ونەرىنە بەلگىلى اكتريسا, قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى التىناي نوگەربەك باستاعان ونەر مەن ادەبيەت الەمىنىڭ بەلگىلى وكىلدەرى قازىلىق ەتتى.
2010 جىلى ىرگەسى قالانعان الەمدىك ستاندارتقا ساي ءبىلىم بەرەتىن, ەلىمىزدەگى بىرەگەي جوعارى وقۋ ورنى – نازارباەۆ ۋنيۆەرسيتەتى جاستاردىڭ ساپالى ءبىلىم الۋىنا جاعداي جاساپ, ولاردىڭ بولاشاعىنا جارقىن جول اشۋدا. ۇشان-تەڭىز جۇمىس اتقارىپ, تالاي يگى باستامالارعا مۇرىندىق بولىپ كەلەدى. سونىڭ ءبىرى – «رۋحاني جاڭعىرۋ» مادەني ورتالىعى. ۋنيۆەرسيتەتتە تەك جاراتىلىستانۋ مەن مەديتسينا باعىتىندا ءبىلىم الاتىن جاستاردى رۋحاني كەمەلدەنۋگە, ۇلتىنىڭ تاريحى مەن تابيعاتىن تانۋدا, ءاربىر ستۋدەنتتى ۇلتجاندى ازامات ەتىپ تاربيەلەۋدە اتالمىش ورتالىقتىڭ بەرەر تاعىلىمى مول. ونىڭ ءبىر دالەلى – «اباي وقۋلارى» بايقاۋى.
– شىندىعىندا ءبىزدىڭ ستۋدەنتتەر ەشقانداي گۋمانيتارلىق نەمەسە ارنايى سالالانعان قازاق ءتىلى مەن ادەبيەتىنەن ءبىلىم الىپ جاتقان جوق. بىراق سوعان قاراماستان, ۇلى اقىننىڭ ولەڭدەرىن جاتتاپ, ايتۋلى بايقاۋعا قاتىسۋعا نيەت بىلدىرگەندەر وتە كوپ. بۇل – ولاردىڭ اقىنعا, قازاقتىڭ قارا ولەڭىنە دەگەن رياسىز ماحابباتى دەپ بىلەمىن. ادام قانشا ءبىلىمدى بولسا دا, ءوز ۇلتىنىڭ بولمىسى مەن ءتول تاريحىن بىلمەسە, ول ادامنىڭ ەلى ءۇشىن ەمىرەنىپ, وتانىنا جان جۇرەگىمەن قىزمەت ەتۋى مۇمكىن ەمەس. وسى سەبەپتى جاستارىمىزدى جاراتىلىستانۋ سالاسىمەن عانا شەكتەمەي, رۋحاني كەمەلدەنۋگە, جان-جاقتى, ينتەللەكتۋال ادام بولىپ ەر جەتۋىنە بارىنشا باسىمدىق بەرىپ, سول ءۇشىن ايانباي جۇمىس ىستەپ جاتىرمىز. ال اباي الەمى – بۇگىنگى وسكەلەڭ ۇرپاقتىڭ بەت بۇرىپ, بوي تۇزەر تەمىرقازىعى. سەبەبى ابايدىڭ ءسوزى – عاسىردىڭ ءسوزى. تامىرى بەرىك بەكىگەن ۇلتتىڭ كەلەشەگى كەمەل, ەرتەڭى ەڭسەلى. سوندىقتان اقىن الەمىنە تەرەڭ بويلاپ, عيبراتىن ۇعۋدى نەگىزگى ماقساتىمىز ەتتىك. نازارباەۆ ۋنيۆەرسيتەتى ۇجىمىنىڭ باستى ۇستانىمى – وسى, – دەدى جوبا جەتەكشىسى, نازارباەۆ ۋنيۆەرسيتەتى جانىنداعى «رۋحاني جاڭعىرۋ» مادەني ورتالىعىنىڭ ديرەكتورى گۇلتاس سايىنقىزى.
وتىزعا جۋىق ستۋدەنت قاتىسقان «اباي وقۋلارى» بايقاۋىنىڭ جۇزدەن جۇيرىك شىققان جەڭىمپازدارى ءار اتالىم بويىنشا جەكە-جەكە انىقتالىپ, باعالى سىيلىقتارمەن ماراپاتتالدى. اتاپ ايتساق, اباي ولەڭدەرىن جاتقا وقۋدا باس جۇلدەنى «ەسكەندىر» پوەماسىن مۇدىرمەي وقىپ, قازىلار القاسىن ارتىستىك شەبەرلىگىمەن ءتانتى ەتكەن انەل ەرىنبەك ەنشىلەسە, ال ابايدىڭ «كوزىمنىڭ قاراسى» ءانىن قارا دومبىرا كۇمبىرىمەن سۇيەمەلدەپ, ناقىشىنا كەلتىرە شىرقاعان ۋنيۆەرسيتەت ستۋدەنتى مەدەت ەركىن «اباي اندەرىن ورىنداۋ» اتالىمىندا توپ جاردى. اقىن پوەزياسىن وزگە تىلدەرگە اۋدارۋ بايقاۋىندا ءى ورىندى «مەن جازبايمىن ولەڭدى ەرمەك ءۇشىن» ولەڭىن اعىلشىن تىلىنە تارجىمالاعان ءمولدىر بيجانوۆا يەلەندى. جەڭىمپازدارعا باعالى سىيلىقتار مەن ارنايى ديپلومدار تابىستالدى.
ابايدى قازاقتىڭ ءوزى, ۇلتتىڭ رۋحى دەسەك, سول وتانسۇيگىشتىك سەزىمدى بۇگىن كوزدەرىندە وت ويناپ, سوزدەرىنەن ۇشقىن اتقان جالىندى جاستاردان انىق سەزىندىك. ماماندىعىن جەتىك يگەرىپ قانا قويماي, ەلىنىڭ تاريحى مەن ۇلتىنىڭ بولمىسىن تانىپ, تالانتىنا تاعزىم ەتۋگە باعىتتالعان تالپىنىستارىنا ءتانتى بولدىق.اباي الەمى اداستىرمايدى.
