قازاقستان رەسپۋبليكاسىنىڭ ۇلتتىق كىتاپحاناسى رەسەيدىڭ باس كونسۋلدىعى جانە الماتى قالاسىنداعى رەسەي ىنتىماقتاستىعى وكىلدىگىمەن بىرلەسىپ ۇيىمداستىرعان ايتۋلى شارانىڭ باستى ماقساتى – وتانعا دەگەن ماحابباتتىڭ, ەڭبەكقورلىق پەن جانقيارلىقتىڭ, بىرلىك پەن تۇتاستىقتىڭ ارقاسىندا دوستاستىق مەملەكەتتەرىنىڭ بەيبىتشىلىگىن, بوستاندىعى مەن تاۋەلسىزدىگىن قامتاماسىز ەتكەن ازاماتتاردىڭ ەرلىگىنە تاعزىم ەتۋ.
جيىندا العاشقى بولىپ ءسوز العان ۇلتتىق كىتاپحانانىڭ ديرەكتورى باقىتجامال وسپانوۆا «بيىل ۇلى جەڭىستىڭ 75 جىلدىعى ەل ەلدە, جەر-جەردە كەڭىنەن اتالىپ وتۋدە. بۇل – قازاقستان جانە بۇرىنعى تمد ەلدەرى ءۇشىن ورتاق مەرەكە. سول سۇراپىل سوعىس كەزىندەگى وتانداستارىمىزدىڭ ەرلىگى كەيىنگى ۇرپاقتىڭ جادىندا ماڭگى ساقتاپ قالۋ ءۇشىن وسىنداي شارالاردى ءجيى ۇيىمداستىرىپ تۇرۋ قاجەت. ءتورت جىلعا سوزىلعان قان مايدانعا قازاقستاننان 1,2 ميلليوننان اسا ادام اتتاندى. سونىڭ ءاربىر تورتەۋى قازا تاپتى. كوزسىز ەرلىك كورسەتكەنى ءۇشىن 512 ازاماتىمىز كەڭەس وداعىنىڭ باتىرى اتاندى. سول اتاقتى ەكى رەتتەن يەلەنگەندەر دە بار. قازاقستان حالقىنىڭ تىلداعى ەرلىگى دە ەرەن. جاسى بار, قارتى بار, ەركەگى بار, ايەلى بار رەسپۋبليكامىزعا كوشىرىلگەن جانە وسىندا سالىنعان 460 زاۋىتتا كۇنى-ءتۇنى تىنىمسىز ەڭبەك ەتتى. ۇلى وتان سوعىسى كەزىندە اتىلعان ءاربىر ون وقتىڭ توعىزى ءبىزدىڭ ەلدە جاسالدى. ودان بولەك, كومىر ءوندىردى, ەگىن ەكتى, مال اسىرادى. كيىم-كەشەك جاسادى... سول ونىمدەردىڭ بارلىعىن مايدانعا اتتاندىردى. وسىلايشا, فاشيستىك گەرمانيا مەن ونىڭ وداقتاستارىن تاس-تالقان ەتىپ, مەملەكەتىمىزدى جاۋدان ازات ەتتىك. وسىنىڭ بارلىعى كەينگى ۇرپاقتىڭ جادىندا», – دەپ تەبىرەنە سويلەدى.
جيىندا رەسەيدىڭ باس كونسۋلدىعى مەن الماتىداعى رەسەي ىنتىماقتاستىعى وكىلدىگىنىڭ وكىلدەرى ستەپان سوكولوۆ پەن يرينا پەرەۆەرزەۆا, الماتى قالاسى مەدەۋ اۋداندىق ارداگەرلەر كەڭەسىنىڭ توراعاسى كيم سەرىكباەۆ, قازاقستاننىڭ جازۋشىلار وداعى توراعاسىنىڭ ورىنباسارى باقىت بەدەلحان جانە رەيحستاگقا تۋ تىككەن قازاقتىڭ باتىر ۇلى, حالىق قاھارمانى راقىمجان قوشقارباەۆتىڭ قىزى ءاليا راقىمجانوۆا ءسوز سويلەپ, ۇلى وتان سوعىسى كەزىندەگى قازاقستاندىقتاردىڭ ەرلىگى جايىندا كەڭىنەن باياندادى.
سالتانانتتى شارانىڭ سوڭى مەرەكەلىك كونتسەرتكە ۇلاستى. قر قارۋلى كۇشتەرى ۇلتتىق اسكەري-پاتريوتتىق ورتالىعى الماتى فيليالىنىڭ اسكەري وركەسترى, ي.ۆ.پانفيلوۆ اتىنداعى قازاقستان-رەسەي مامانداندىرىلعان №54 مەكتەپ-ليتسەيى جانىنداعى «جۇلدىزدار» ۆوكالدى ءانسامبلى, «ديۆەرتيسمەنت» سكريپكاشىلار ءانسامبلى, «سلاۆيان بازارى» كونكۋرسىنىڭ گران-پري يەگەرى ءادىلحان ماكين جانە تاعى باسقا ونەرپازدار ءوز ونەرلەرىن ورتاعا سالدى.
سونىمەن قاتار, وسى شارا اياسىندا قازاقستان رەسپۋبليكاسى ۇلتتىق كىتاپحاناسىنىڭ قورى « ۇلى جەڭىسكە – 75 جىل» اتتى كىتاپ كورمەسىن ۇيىمداستىردى.
