يراننىڭ ILNA اقپاراتتىق اگەنتتىگىنىڭ حابارلاۋىنشا, كۋم قالاسىندا جاڭا كوروناۆيرۋستان ءبىر ايدا قازا تاپقانداردىڭ سانى 50-گە جەتكەن. بۇل كورسەتكىش وسىعان دەيىن ايتىلعان رەسمي مالىمەتتەن الدەقايدا كوپ. كۋم قالاسىنىڭ رەسمي وكىلى احماد اميريابادي فاراحاني قالادا 250-دەن استام ادام كارانتيندىك وقشاۋلاۋدا ەكەنىن حابارلاعان.
قازىردىڭ وزىندە بۇل ۆيرۋس ازيادا 78 مىڭنان استام ادامعا جۇققان. قىتايدىڭ ۇلتتىق دەنساۋلىق ساقتاۋ كوميسسياسى ىندەتتەن قازا بولعاندار سانى 2500-دەن اسقانىن مالىمدەدى.
سونداي-اق ۆيرۋستىڭ جاڭا ءتۇرى الەمنىڭ كەم دەگەندە 28 ەلىنە تاراپ ۇلگەرگەن. وزگە ەلدەردە تىركەلگەن جاعدايلاردىڭ كوپشىلىگى قىتايدان كەلگەن جولاۋشىلاردان جۇققان بولۋى مۇمكىن دەلىنگەن.
يران, يتاليا جانە وڭتۇستىك كورەيادا ىندەتكە شالدىققاندار سانىنىڭ كۇرت ءوسۋى عالامدىق دەڭگەيدە قاۋىپتىڭ پايدا بولعانىن كورسەتكەندەي. مىنە, سوندىقتان دۇنيەجۇزىلىك دەنساۋلىق ساقتاۋ ۇيىمى ۆيرۋستىڭ يران مەن يتاليادا تارالۋىنا بايلانىستى الاڭداۋلى ەكەندەرىن جەتكىزدى. ال, يران بيلىگى ۆيرۋسپەن كۇرەسۋ ماقساتىندا ەلدەگى مەكتەپتەر, جوعارى وقۋ ورىندارى مەن مادەنيەت وشاقتارىن جابۋ تۋرالى شەشىم قابىلداعان.
ياعني, قازىرگى جاعداي تەك قىتايمەن شەكارانى جاۋىپ, ىندەتتى تەك سول جاقتان عانا كۇتۋگە بولمايتىنىن, اتالعان ەلدەن كەلگەن جانداردى عانا قاتاڭ باقىلاۋعا الۋمەن شەكتەلمەۋ كەرەك ەكەنىن بايقاتىپ وتىر. كوروناۆيرۋس تەك قىتايدان كەلمەيدى, شەتەلگە بارىپ كەلگەن كەز كەلگەن ازامات بۇل ىندەتتى جۇقتىرىپ الىپ كەلۋى مۇمكىن. قازىردىڭ وزىندە كورشى ەلدەر يراننان كەلگەن جولاۋشىلاردىڭ اراسىندا ۆيرۋس جۇقتىرعاندار بار ەكەنىن مالىمدەپ, شەكارانى جابۋعا ءماجبۇر بولدى. كانادا, ليۆان, بىرىككەن اراب امىرلىكتەرى مەن باحرەين ەلدەرى دە يراننان كەلگەن جولاۋشىلار اراسىندا ۆيرۋس جۇقتىرعاندار بار ەكەنىن مالىمدەگەن.
ەندەشە «قامدانعان قاپى قالمايدى» دەگەندەي, وتاندىق دەنساۋلىق ساقتاۋ قىزمەتكەرلەرىنىڭ ەسكەرتۋىنە قۇلاق اسىپ, كوروناۆيرۋس ماسەلەسىنە وتە سەرگەك قاراپ, اۋە, جول قاتىناسى ارقىلى بارىس-كەلىس جاساپ جاتقان شەكارالاس كورشى ەلدەرمەن, بارلىق الىس-جاقىن مەملەكەتتەرمەن بايلانىسىمىزدى قاتاڭ باقىلاۋ قاجەت. سونداي-اق, شەتەلگە شىعىپ كەلگەن كەز كەلگەن ازامات قاتاڭ مەديتسينالىق تەكسەرۋدەن ءوتۋى ءتيىس. «شۇعىل جاعداي بولماسا ەل ازاماتتارى شەتەلگە شىعۋدى ازىرگە شەكتەي تۇرعاندارى دا ءجون» دەگەن دارىگەرلەر بۇعان ەل تۇرعىندارى تۇسىنىستىكپەن قارايتىنىنا سەنىمدى. قالاي ايتساق تا, كوروناۆيرۋستىڭ قازىرگى ەكپىنى بۇكىل ەلدى شوشىتىپ وتىر. قامدانباساق, بولماس.
