ەدىلدەن ەرتىسكە, ورالدان قازىعۇرتقا دەيىن سوزىلعان قازىنالى ۇلان-بايتاق دالا كەڭىستىگىن يگەرگەن دانا حالقىمىز, ۇلى جىڭگىر ۋاقىتتى دا ۇتىمدى مەڭگەرۋگە قول جەتكىزىپ, جۇلدىز باعىپ, اي ساناپ, كۇننىڭ رايىن, اسپاننىڭ شىرايىن باقىلاپ, شارۋاشىلىعىن ۇيلەستىرىپ, مىڭعىرعان مالىن ورگىزىپ, قارا قازانىن شۇپىلدەتىپ قايناتىپ, سارى بالاسىن جەلكىلدەتىپ ءوسىرىپ كەلگەن. البەتتە, ۇلى دالا حالقى ءۇشىن ۋاقىت ساناۋىنىڭ باسى, العاشقى كۇننىڭ جارالىپ, تۇڭعىش ارايدىڭ تارالىپ, تابيعات تۇلەپ, كۇللى عالام ومىرگە كەلگەن اسىل مەزەت – ۇلىستىڭ ۇلى كۇنى.
« ۇلىس وڭ بولسىن, اق مول بولسىن!» دەپ اقجارىلقاپ ساتتە ءتوس ءتۇيىستىرىپ, قۇشاق ايقاستىرا كورىسىپ, ساعىنا سالەمدەسكەن الاش جۇرتى ءۇشىن ۇلىس دەگەن كونە تۇركى ءسوزى جاڭا جىل دەگەن ماعىنانى, سونىمەن بىرگە ەل دەگەن ءماندى دە قاتار بەرۋى بەكەر ەمەس.
ۇلى اباي «سونىمەن, بۇلار ءوزىن ءوزى دە, وزگە جۇرتتار دا قازاق اتاپ كەتىپتى, بۇرىن وزدەرىن « ۇلىس» دەيدى ەكەن دە, جۇرە بەرەدى ەكەن. ول كۇندە ناۋرىز دەگەن ءبىر جازعىتۇرىم مەيرامى بولىپ, ناۋرىزداما قىلامىز دەپ, توي-تاماشا قىلادى ەكەن. سول كۇنىن « ۇلىستىڭ ۇلى كۇنى» دەيدى ەكەن» دەپ جازۋى كوپ سىردى اڭعارتادى.
اق كىرەۋكە سىرەسكەن قاردى ناۋرىز كەلگەندە اسپانعا كوتەرىلگەن قىزىركۇننىڭ قىزۋى بالقىتا ەلبىرەتىپ, باۋىرى تۇكتى جەر-انانىڭ بالبىراپ توڭى ەرىپ, مالدىڭ سۇمەسىنە سۇيەنگەن باتىس پەن شىعىستاعى, سارىارقاداعى مالشى قاۋىم ءۇشىن العاشقى ءتولدىڭ تۋى, ۋىزدىڭ شىعۋى, تۇڭعىش اقتىڭ تاڭدايعا تامۋى – زور قۋانىش. ال تۇستىكتەگى ەگىننىڭ ماۋەسىن ەمگەن ديقان حالقىمىز ءۇشىن العاشقى جاۋقازىننىڭ ءبۇر جارۋى, ميۋالى جەمىس-جيدەك اعاشىنىڭ گۇل اتۋى, ناۋرىزەك تورعايدىڭ سايراۋى – كوكتەمنىڭ كەلۋى, جىلدىڭ ەنۋى, قۇت-بەرەكەنىڭ مولايۋ بەلگىسى بولىپ سانالعان.
جالپى, الەمنىڭ شىعىس مەن باتىسىنداعى كوپتەگەن حالىقتىڭ ءداستۇرلى مادەنيەتىندە جىل باسىن ادەتتە كوكتەمدە قارسى الۋى, بارشاسىنىڭ كۇنگە ماڭداي توسىپ تابىنۋ ءراسىمىن جاساۋى وسى مەرەكەنىڭ تاريحي تامىرى, ساباقتاستىق سالتى جەلىلەس ەكەنىن تانىتادى. بايىرعى داۋىردەن ۇمىتىلماي ۇلاسقان ءاز مەرەكە ورتالىق ازيا مەن سىبىردە, سوناۋ بايكالدان بالقانعا دەيىن ەن جايلاعان تۇركى ۇلىستارىندا, تۇستىكتەگى پارسى, كاۆكازداعى باۋىرلاس ەلدەردى قامتۋى ناۋرىزنامانىڭ كەڭىستىگى اۋقىمدى ەكەنىن كورسەتەدى. وسى مەرەكەدە وتەتىن سان الۋان سالتتاردىڭ ءتۇرى ىلىكتەس, مازمۇنى باي, تارالۋ اۋماعى اسا اۋقىمدى بولۋىنا ەجەلگى تۇران مەن يراننىڭ مادەني ميراسىنىڭ توعىسۋى, كوشپەندى مەن ديقانشى ءداستۇردىڭ ءبىر-بىرىنە ۇلاسۋى بايتاق جول اشقان.
ناۋرىز – 2010 جىلدىڭ 10 مامىرىنان باستاپ بىرىككەن ۇلتتار ۇيىمىنىڭ باس اسسامبلەياسىنىڭ 64-قارارىنا سايكەس رەسمي تويلاناتىن حالىقارالىق مارتەبەلى مەيرام, سولاي بولۋى ابدەن جاراسىمدى.
ەلدىك رۋحتىڭ تامىرىنا بالتا شاپقان كوممۋنيستىك جۇيە قازاقستاندا ۇلىستىڭ ۇلى كۇنىن تويلاۋعا 1926 جىلى تىيىم سالدى. ايتكەنمەن حالىق ءوزىنىڭ سۇيىكتى مەيرامىن مۇلدە ۇمىتىپ كەتپەي, ەلىمىزدىڭ كەيبىر ايماقتارىندا ۇزىك-ۇزىك تويلاپ كەلدى. كەڭەستىك زاماندا كەرتارتپا كورىنىس رەتىندە قۋعىن-سۇرگىنگە ۇشىراپ, ىسىرىلىپ قالعان ءاز ناۋرىز قازاقستان رەسپۋبليكاسىنىڭ تۇڭعىش پرەزيدەنتى ن.ءا.نازارباەۆتىڭ شەشىمىمەن 1988 جىلى الماتىدا العاش تويلانىپ, 62 جىلدان سوڭ حالىقپەن قايتا قاۋىشتى. ال 1991 جىلى 15 ناۋرىزدا ەلباسى ناۋرىز مەيرامىن رەسمي مەرەكە دەگەن جارلىققا قول قويدى. 2001 جىلى ناۋرىز مەيرامى مەملەكەتتىك مەرەكە رەتىندە جاريالاندى. مەملەكەت باسشىسىنىڭ جارلىعىمەن 2010 جىلدان بەرى قازاقستاندا ناۋرىز مەيرامى ءۇش كۇن بويى ارنايى تويلانىپ كەلەدى. ءاز ناۋرىز تاۋەلسىزدىكتىڭ جارشىسىنداي ەرتە ورالىپ, اقجولتاي بولمىسىمەن ەلدى بىردەن باۋراپ, حالقىمىزدىڭ ىنتىماعى مەن دوستىعىن ۇيىستىرۋشى ماڭىزدى مەرەكەگە اينالدى.
قازاق دالاسىندا ناۋرىز مەيرامى, ءتۇرلى دەرەكتەرگە قاراعاندا, ءار زاماندا ءار قيلى ۋاقىتتا, دالىرەك ايتقاندا, اقپان مەن ناۋرىز ايلارىنىڭ ىشىندە تويلانىپ كەلگەنى سوڭعى كەزدەگى زەرتتەۋلەردە ايقىن بولىپ وتىر. مۇنىڭ سەبەبىن عالىمدارىمىز قازاق دالاسىنىڭ اۋماعى الىپ, تابيعاتى مەن كليماتى سان الۋان رايلى بولۋىمەن, سونىمەن بىرگە ءار ايماقتا ۇستانعان حالىق كۇنتىزبەسىنىڭ جۇيەسى, ساناتى, قيساپ ءتارتىبى ءار قيلى, ءار وڭىردەگى ەسەپشىلەردىڭ ۇستانعان جولى مەن ءادىسى, قالىپتاستىرعان ءداستۇرى ايماقتىق ەرەكشەلىككە يە بولۋىمەن تۇسىندىرەدى.
ۇلت ۇستازى احمەت بايتۇرسىن ۇلى «ناۋرىز – قازاقشا جىل باسى. بۇرىنعى كەزدە ءار ەلدە ناۋرىز تۋعاندا مەيرام قىلىپ باس اسىپ, قازان-قازان كوجە ىستەپ, اۋىلدان اۋىلعا, ۇيدەن ۇيگە ءجۇرىپ, كارى, جاس, قاتىن-قالاش ءبارى دە ءماز بولىپ, كورىسىپ, ارالاسىپ قالۋشى ەدى. بۇل كەزدە ول عۇرىپ قازاق اراسىندا قالىپ بارا جاتقان سەكىلدى... بىرەۋلەر ناۋرىز مارتتىڭ بىرىندە, ەكىنشىلەر توعىزىندا كەلەدى دەسەدى», دەپ جازادى.
وقىرمانعا اقىن شاكارىم قۇدايبەرديەۆتىڭ بالاسى احاتتىڭ «ون ءتورتىنشى مارت كۇنى اكەم بۇگىن – ەسكىشە ءبىرىنشى مارت, قازاقشا جاڭا جىل, ۇلىستىڭ ۇلى كۇنى. بۇرىنعى اتى – ناۋرىز. پارسى ءتىلى جاڭا كۇن دەگەن ءسوز دەپ ايتقانى ەسىمدە», دەپ جازعانى بەلگىلى بولار.
مۇنداي مىسالداردان ءبىز تەك باتىس ءوڭىرىنىڭ قازاقتارى عانا ەمەس, شىعىستاعى جۇرتىمىزدىڭ كەيبىر اۋماعى جاڭا جىلدى 14 ناۋرىزدا قارسى العانىن بىلە الامىز. سول ابىز شاكارىمنىڭ ناۋرىز تۋرالى ەلدەن جازىپ العان ءبىر ولەڭى بىلاي:
ۇلىس كۇنى كارى-جاس,
قۇشاقتاسىپ, كورىسكەن.
جاڭا اعىتقان قوزىداي
جامىراسىپ ورىسكەن.
البەتتە, جەتى جۇرت وتكەن كيەلى ءۇش قيان توپىراعىندا امال مەرەكەسى, كورىسۋ ءداستۇرى مىعىم ساقتالىپ, بۇگىنگى كۇنگە ۇلاسىپ, تاۋەلسىزدىكتىڭ ارقاسىندا جاڭاشا تۇلەپ, كەڭ مازمۇنعا يە بولىپ, بارشا حالقىمىز تويلايتىن ايتۋلى مەرەكەگە اينالا باستاۋى – «رۋحاني جاڭعىرۋدىڭ» يگىلىكتى جەمىسى.
كۇننىڭ كوزى مەيىرىن توگىپ, قىستىڭ سىرەسكەن قالىڭ قاسات قارى ەرىپ, قارا جەر بۋسانىپ, تابيعات تۇلەپ, جان-جانۋار تولدەپ, ايازدىڭ بەتى ءارى, شۋاقتىڭ بەتى بەرى قاراعان وسى شاقتا زىمىستان اق بوران بۇرقاقتا ءبىر-بىرىنە حابارلاسا الماي قالعان ەل وي مەن قىردان اعىلىپ كەلىپ, ءبىر-بىرىنە ساعىنا قاۋىشىپ, قۇشاقتاسىپ, كورىسۋى – تابيعي تۇرمىس-تىرشىلىكتەن تۋعان كادە. دانىشپان اقىن اباي وسى مەزگىل تۋرالى «جازعىتۇرى» اتتى ولەڭىندە بىلايشا سۋرەتتەيدى:
قىرداعى ەل ويداعى ەلمەن ارالاسىپ,
ك ۇلىمدەسىپ, كورىسىپ, قۇشاقتاسىپ.
شارۋا قۋعان جاستاردىڭ موينى بوساپ,
سىبىرلاسىپ, سىرلاسىپ, ماۋقىن باسىپ.
جىل باسى ناۋرىز – ادامداردىڭ تابيعات-اناداي تۇلەپ جاڭعىرىپ, ءبىر-بىرىنە مەيىر-ىقىلاسىن توگۋگە, قايرىمدىلىق جاساۋعا, ءبىر-بىرىنە قولۇشىن بەرىپ كومەك ەتۋگە ۇندەيتىن دوستىق پەن تاتۋلىقتىڭ مەرەكەسى. سامارقاننىڭ كوك تاسى ەرىگەن وسىناۋ شاپاعاتتى ساتتە ادامدار ءبىر-بىرىنە دەگەن وكپە-رەنىشى بولسا كەشىرىسىپ, قۇشاقتاسىپ, قايتا تابىسىپ, ءبىر انادان تۋعانداي بولىپ, باۋىرلاسىپ كەتەتىن كونەدەن جالعاسقان اتالى ءداستۇر بار. تۇركىلىك ۇعىمدا الەم جارالعان بۇل كۇندە ازەلگى زاماندا بۇكىل تىرشىلىك يەلەرى قوسا جارالعان, سول سەبەپتەن ءدال ءاز ناۋرىز كۇنى بارشا ادام دا ءبىر جاسقا تولادى. سوندىقتان دا ادامدار ءبىر-بىرىمەن كورىسكەندە « ۇلىس وڭ بولسىن, ءبىر جاسىڭ قۇتتى بولسىن» دەپ تە امانداسادى. دەمەك, تابيعات تولعاتاتىن بۇل كۇندە ادامدار دا قايتادان انادان تۋعانداي جاڭارىپ, باۋىرلاساتىنى, قۇشاق ايقاستىرىپ قاۋىمداساتىنى – ىنتىماقتىڭ دانەكەرى بولعان قۇتتى مەيرامنىڭ بابادان بالاعا جالعاسقان اسىل عيبراتى.
ناۋرىز – مال تولدەپ, بىرەۋ ەكەۋ بولىپ, اعاش ءبۇر جارىپ, ءدان سەبىلىپ, بۇلاقتىڭ كوزى ارشىلىپ, سوقا سايلاناتىن, كوكتەمگى شارۋاعا ەكپىن بىتەتىن ىرىستى ەڭبەكتىڭ تويى.
جاسى كىشى ۇلى قارياعا سالەم بەرىپ باتا الۋ دا پارىز:
ۇلىس كۇنى قازان تولسا,
ول جىلى اق مول بولار.
ۇلى كىسىدەن باتا الساڭ,
سودان ولجالى جول بولار.
بەرەكە-ىرىزدىقتىڭ, ەلدىك تۇتاستىق پەن كۇش-قۋاتتىڭ ءرامىزى ەجەلگى ساق زامانىنان جالعاسقان – ناۋرىزدىڭ نارقازانى. « ۇلىس كۇنى قازان تولسا» ىرىمىنىڭ ءمانى, ەل تۇرمىسى مەن تۇسىنىگىندە ورىن الۋى تۋرالى ابىز ءابىش اعامىز «قۇس قاناتى» حيكاياتىندا بىلايشا سۋرەتتەيدى:
«بۇل – قىستىڭ سوڭى «قۇس قاناتى». بۇدان سوڭ قار تۇسپەيدى...
جاز بيىل جايلى بولاتىن ءتۇرى بار. اۋىلدا عوي جۇرت قازىر ەرسىلى-قارسىلى شاپقىلاپ ءجۇر. بۇگىن ءبىر-بىرىمەن سارالا تاڭنان بارىپ امانداسادى. كەمپىر بىتكەن اسادالدىڭ تۇبىندەگى ءولى استىڭ ءبارىن قازانعا سالادى. بۇگىننەن قالسا, ماكىرۋ... قارا سۋ قۇيساڭ دا قارا قازان وشاقتا تولىپ تۇرادى بۇگىن. كورىسۋگە كەلگەن جۇرت ءۇي سايىن اياق-اياق ناۋرىز كوجە ىشەدى. بۇگىن قازانى تولماعان ءۇيدىڭ بيىلعى ىرزىعى كەم بولادى... جارىقتىق جاڭا جاز, جاڭا كوكتەم بۇلاردىڭ شاڭىراعىنا دا تەك شاپاعات بوپ كىرگەي».
ناۋرىزدا وتپەن توڭىرەكتى الاستاپ, ءۇيدىڭ تورىندە جۇپ شىراق جاعۋ, كەتىك شىنى-ىدىستاردى سىندىرىپ ورتەۋ, جەروشاققا جاققان وتتىڭ ۇستىنە ارشا تاستاپ, جاسوسپىرىمدەردىڭ وت ۇستىنەن سەكىرۋ ادەتى ەجەلگى زامانداردا ورىن العان. بۇل ءراسىمنىڭ ءمانى – اسپانداعى كۇن-اناعا تابىنىپ, سونىڭ جەردەگى بولشەگى دەپ وتتى قاستەرلەۋ, وت ارقىلى تازالانۋ ساق جۇرتىنان قالعان سارقىت.
سوڭعى جىلداردا كيەلى ماڭعىستاۋ جەرىندە بۇرىندارى ۇران-وت جاعىلعان وتپان تاۋىنىڭ باسىنا شىعىپ امال مەرەكەسىندە الاۋ جاعۋ ءداستۇرى قايتا جاڭعىردى. ماڭعىستاۋ ولكەسىنىڭ تابيعات جاراتىلىسى دا ەرەكشە, بۇل توپىراقتا ەجەلگى مادەنيەتتەردىڭ سان الۋان قاتپارى بار ەكەنىن ارحەولوگيالىق زەرتتەۋلەر ايقىنداپ وتىر. ساق, سارمات, وعىز, قىپشاق سەكىلدى جۇرتتاردىڭ قازىنالى ميراسىنىڭ ءىزى قالعان وتپان تاۋ بۇگىندەرى قايتا تۇلەگەندەي. ءاز ناۋرىز ەجەلدەن ەلدى بىرلىك پەن تاتۋلىققا, ىنتىماق پەن ىرىسقا شاقىراتىن بولسا, وتپان تاۋدا جاعىلعان وتتى الاۋ التى الاشتى بەرەكەگە ۇندەپ, جاستارىمىز بەن قوناقتاردى ناۋرىزناما سەيىلىندە شاتتىق پەن عيبراتقا بولەيتىن جاڭا دا كونە كادەگە اينالدى.
ەجەلگى داۋىردەن ۇلىستىڭ ۇيىتقىسى, جاڭارۋ مەن جاڭعىرۋدىڭ جارشىسى بولعان ءاز ناۋرىزدا وتكەن جىلى قازاقستان رەسپۋبليكاسىنىڭ قوعامدىق-ساياسي ومىرىندە تاريحتىڭ جاڭا پاراعى اشىلىپ, ەلىمىزدىڭ تۇڭعىش پرەزيدەنتى – ەلباسى ن.ءا.نازارباەۆ جانە پرەزيدەنت ق.ك.توقاەۆ ەكەۋى حالىق الدىنا قاتار شىعۋى ەلدى تەرەڭ عيبراتقا, بابالار ءداستۇرىنىڭ ساباقتاستىعىنا ءتانتى ەتتى.
قازاقستان رەسپۋبليكاسىنىڭ پرەزيدەنتى ق.ك.توقاەۆ ءاز مەرەكە تۋرالى بىلاي دەپ ءتۇيىندى پىكىر بىلدىرگەن: ء«بارىمىزدى قۋانىش پەن سۇيىسپەنشىلىك سەزىمىنە بولەيتىن بۇل مەرەكە – بەيبىتشىلىك پەن جاقسىلىقتىڭ نىشانى. ونىڭ فيلوسوفيالىق ءمانى زور جانە بۇكىلالەمدىك مادەني سيپاتى بار. كونە زاماننان باستاۋ الاتىن وسىناۋ مەيرام جاڭارۋ مەن جاڭا ءومىردىڭ باستالۋ ءساتىن سيپاتتايدى. ناۋرىز – رۋحاني باي مۇرامىزدىڭ, بىرەگەي ۇلتتىق كودىمىز بەن ۇزدىكسىز ۇرپاق ساباقتاستىعىنىڭ جارقىن سيمۆولى. بۇل مەرەكە ومىرىمىزگە جاسامپازدىق پەن دامۋدىڭ جاڭا لەبىن اكەلەدى. بۇگىندە ناۋرىز – ورتاق شاڭىراعىمىز – قازاقستان رەسپۋبليكاسىنداعى دوستىقتى, ءوزارا قۇرمەت پەن كەلىسىمدى نىعايتۋعا سەپتىگىن تيگىزەتىن شىن مانىندەگى جالپىحالىقتىق مەيرام. ونىڭ ماڭگىلىك ءمانى – ەڭ جوعارى قۇندىلىعىمىز بەن ورتاق بايلىعىمىزدى – حالىقتىڭ ىنتىماعىن بەكەمدەۋ».
ناۋرىزناما مەرەكەسىندە ەجەلدەن قىدىر اتا بەينەسى عيبرات پەن ونەگەگە تولى. قىدىر اتا قولىن جايىپ, تاياعىن نۇسقاپ, كۇن مەن ءتۇن, باي مەن كەدەي, حان مەن قاراشا تەڭەلگەن, تابيعات-انا تامىلجىپ, قارا تاس تا مەيىرىمنەن بالقىعان وسى اسىل ساتتە باتا بەرسە, ادام بالاسىنىڭ باسىنا باق پەن ىرىس قونادى دەپ يلانادى ەل. «قىرىقتىڭ ءبىرى قىدىر» دەگەن ۇعىممەن حالقىمىز جاسى ۇلى قاريادان باتا الىپ, وسيەتىن ەستۋگە, اماناتىن ارقالاۋعا اسىرەسە ءاز ناۋرىزدا قۇشتار بولعان. وسى كۇنى جاستار ارىقتى ارشىپ, بۇلاق پەن قۇدىقتىڭ كوزىن تازالاپ, تال ەگىپ, كوپىر مەن جولداردى تۇزەپ, اينالا توڭىرەكتى مۇنتازداي ەتىپ تازالاپ, ساۋاپتى جۇمىس ىستەۋدەن ءوزارا جارىسقا تۇسەتىن. قاريانىڭ اق باتاسىن الۋعا, ىقىلاسىنا يە بولۋعا اسىعىپ, ىزەت پەن ينابات, ادەپ پەن ادەمىلىك سايىسىنا تۇسكەندەي كۇي كەشۋى – حالقىمىزدىڭ اتا سالتى.
قازاقستان رەسپۋبليكاسىنىڭ پرەزيدەنتى ق.ك.توقاەۆ 2020 جىلدى ۆولونتەر جىلى دەپ جاريالاۋى قازاقتىڭ قانى مەن جانىنا سىڭگەن اسىل مىنەزىن, ۇلتتىق كودىن وياتۋعا جول اشتى. البەتتە, بۇرىندارى قىدىر اتانى تەك قانا تەاترلاندىرىلعان ساحنادان ەمەس, ءار وتباسى ءوز ۇيىندە قارسى الۋعا ارمانداپ, ءوز اۋىلىنىڭ جاسى ۇلكەن, جانى جايساڭ جانىن قىدىرعا بالاپ, ونىڭ ىقىلاسىن الىپ, راحمەتىنە بولەنۋگە لايىقتى ىزگى امالدار جاسايتىن. جاستار بىلەك بىرىكتىرىپ, ساۋساق ىلىكتىرىپ, ساپ تۇزەپ اسارلاتىپ, تولاعاي شارۋا تىندىرىپ, «باتامەن ەر كوگەرەدى, جاڭبىرمەن جەر كوگەرەدى», «التىن الما, العىس ال», «باتالى قۇل ارىماس, باتاسىز قۇل جارىماس» دەپ ۇلكەندەردەن باتا الاتىن. سول سەبەپتەن دە ناۋرىزنامادا « ۇلى كىسىدەن باتا الساڭ, سوندا ولجالى جول بولار», «مەنىڭ بەرگەن بۇل باتام, ءاز ناۋرىزعا ساقتاعان ءسۇر باتام» دەگەن جولدار كەزدەسەدى.
بەس مىڭ جىلدان بەرى ۇلى دالا توسىندە ىزگىلىكتىڭ شۇعىلاسىن شاشىپ, تابيعاتپەن ۇندەسە مەرەكەلەنىپ كەلە جاتقان ناۋرىز مەيرامى – ادامداردى ەشقاشان ناسىلدىك, دىندىك, ۇلتتىق سيپاتتارمەن بولەكتەمەي, كەرىسىنشە, بارشا حالىقتى ۇيىستىرىپ, قوعامدى توپتاستىراتىن, ءوزارا سىيلاستىق پەن تۇسىنىستىككە جول باستايتىن ۇلىق مەرەكە. سوندىقتان دا ناۋرىز – تەك قازاق حالقىنىڭ ۇلتتىق مەيرامى ەمەس, بارشا قازاقستان حالقىنىڭ ىنتىماعىن ارتتىرىپ, ىرىسىن ەسەلەيتىن ايتۋلى جالپىحالىقتىق مەرەكە. ءبىز الداعى ۋاقىتتا ناۋرىزدىڭ نەگىزگى يدەيالىق مازمۇنىن وسى جالپىحالىقتىق سيپاتپەن جان-جاقتى وركەندەتە بەرۋىمىز كەرەك.
ارايلى كۇننىڭ شۋاعى توگىلىپ, تابيعات تۇلەگەن ءاز ناۋرىزدا حالقىمىزدىڭ مەيىرباندىعى مەن ىرىسى تاسىپ, ىنتىماعى ارتىپ, مەملەكەتىمىزدىڭ كۇش-قۋاتى كەمەلدەنە بەرسىن! ۇلىس وڭ بولسىن, حالقىمىزدىڭ باسىنا باق قونىپ, قىدىر دارىسىن!
قىرىمبەك كوشەرباەۆ,
قازاقستان رەسپۋبليكاسىنىڭ مەملەكەتتىك حاتشىسى
