الماتى قالاسىنىڭ 2015 جىلعا دەيىنگى ەنەرگەتيكالىق كەشەنىن دامىتۋ جانە جاڭعىرتۋ اياسىندا «الاتاۋ جارىق كومپانياسى» قالانىڭ وڭتۇستىك-باتىسىن ەلەكتر قۋاتىمەن تولىق قامتاماسىز ەتەتىن «مامىر» قوسالقى ستانساسىن پايدالانۋعا بەردى.
الماتى قالاسىنىڭ 2015 جىلعا دەيىنگى ەنەرگەتيكالىق كەشەنىن دامىتۋ جانە جاڭعىرتۋ اياسىندا «الاتاۋ جارىق كومپانياسى» قالانىڭ وڭتۇستىك-باتىسىن ەلەكتر قۋاتىمەن تولىق قامتاماسىز ەتەتىن «مامىر» قوسالقى ستانساسىن پايدالانۋعا بەردى.
اتالمىش ستانسا قالا تۇرعىندارى مەن ءوڭتۇستىك استاناداعى بارلىق تۇتىنۋشىلاردى ەنەرگيامەن قامتاماسىز ەتۋ ءماسەلەسىندە كەزدەسەتىن كوپتەگەن قيىنشىلىقتاردى ازايتاتىن بولدى.
الماتى قالاسىنىڭ ەنەرگەتيكالىق قۋاتتىلىعى جىل ءوتكەن سايىن نىعايىپ كەلە جاتقانى بەلگىلى. قۋات كوزىن تۇتىنۋ ارتقان سايىن بۇرىنعى ستانسالاردىڭ جۇمىسىنا سالماق كوپ تۇسەتىن ەدى. ناتيجەسىندە جارىق ءسونۋ, ەلەكتر قۋاتىنىڭ كەرنەۋى تومەندەپ كەتۋ دەگەن سەكىلدى كەلەڭسىزدىكتەر پايدا بولا باستاعان. سوڭعى جىلدارى قالادا اشىلىپ جاتقان قوسالقى ستانسالار مۇنداي كەدەرگىلەردى جويىپ, تۇتىنۋشىلاردىڭ سەنىمدىلىگىن ارتتىرىپ كەلەدى. سونىڭ ءبىرى – اۋەزوۆ اۋدانىنداعى شالياپين كوشەسى مەن سايىن كوشەلەرىنىڭ قيىلىسىندا اشىلعان قۋاتى 110/10-10 كۆ-تىق جابىق تۇردەگى «مامىر» قوسالقى ستانساسى. الىپ شاھاردىڭ وڭتۇستىك-باتىس بولىگىندەگى تۇرعىنداردى, ءوندىرىس ورىندارىن, مەملەكەتتىك مەكەمەلەر مەن الەۋمەتتىك نىسانداردى ەلەكتر قۋاتىمەن سەنىمدى قامتاماسىز ەتەتىن بۇل ستانسانىڭ ترانسفورماتورلىق قۋاتى 126 مۆا-نى قۇرايدى.
جاڭا ستانسانى سالتاناتتى تۇردە ىسكە قوسقان قالا اكىمى احمەتجان ەسىموۆ «الماتى جارىق كومپانياسى» قىزمەتكەرلەرىنە وزدەرىنىڭ بيىلعى 70 جىلدىق مەرەيتويى قارساڭىندا حالىققا جاساپ وتىرعان يگى ىسىنە العىس ءبىلدىردى.
قالا اكىمى الماتى قالاسى تەك رەسپۋبليكامىزدا عانا ەمەس, ەكونوميكاسى جاعىنان وڭىردەگى ەڭ قۋاتتى قالا ەكەندىگىن, 2 ميلليونعا جۋىق حالىق تۇراتىن الىپ شاھاردىڭ ەل ەكونوميكاسىنداعى ۇلەسى دە وتە زور ەكەندىگىن ايتىپ ءوتتى. قالادا سوڭعى بەس جىل ىشىندە 29 جاڭا قوسالقى ستانسا سالىنىپ, ەلەكتر قۋاتتىلىعى 779 مەگاۆتقا ارتىپ, 3 مىڭ مەگاۆاتقا جەتكەن. وسىلايشا, قالانى ەنەرگيامەن قامتۋ 25 پايىزعا ۇلعايىپ وتىر. بۇدان وزگە قالا اۋماعىنداعى ەنەرگيا جۇيەلەرىن جاڭعىرتۋ جۇمىستارى دا توقتاۋسىز جۇرگىزىلىپ كەلەدى. مۇنداي اۋقىمدى جۇمىس ەگەمەن ەل بولعالى العاش جۇرگىزىلىپ وتىرعانىن دا ايتا كەتۋ كەرەك. «الماتى جارىق كومپانياسى» اتقارعان شارالار قالانى ەنەرگيامەن جابدىقتاۋ ءىسىن ايتارلىقتاي جاقسارتتى. ال مىنا ىسكە قوسىلعان «مامىر» قوسالقى ستانساسى قالا شارۋاشىلىعىن ەنەرگيامەن ۇزدىكسىز جانە سەنىمدى قامتاماسىز ەتۋگە بۇرىنعىدان دا ۇلكەن ىقپالىن تيگىزەتىن بولادى.
ايتا كەتەتىن تاعى ءبىر جايت, ەلەكتر جۇيەسىن جاقسارتۋعا پايدالانىپ جاتقان جابدىقتاردىڭ دەنى ءوز ەلىمىزدە جاسالسا, كەيبىر كۇردەلى بولشەكتەر شەتەلدەردە جاسالعان زاماناۋي تەحنيكا بولىپ تابىلادى. جاڭا ستانسالار قالا تۇرعىندارى مەن بارلىق تۇتىنۋشىلاردى, سونداي-اق مەتروپوليتەن قۇرىلىسىن تولىق ەنەرگيامەن قامتاماسىز ەتەتىن بولادى.
«مامىر» قوسالقى ستانساسىندا الەمدىك ستاندارتتارعا ساي قازىرگى زامانعى ساپاسى مىقتى ەلەكتروندى جابدىقتار ورناتىلعان. زاماناۋي جابدىقتاردىڭ ارقاسىندا شىعىندار ازايىپ, ەلەكتر قۋاتىن پايدالانۋداعى قاۋىپسىزدىك دەڭگەيى ارتىپ وتىر. «كەنتاۋ ترانسفورماتور زاۋىتى» اق كەشەنىندە قۇراستىرىلعان «SerGI» فيرماسىنىڭ ورتتەن جانە جارىلىستان قورعاۋ جۇيەسىمەن جابدىقتالعان ترمن 63000/110 ترانسفورماتورلارى قازاقستاندىق جابدىقتىڭ نەگىزگى بولىگى رەتىندە قولدانىلىپ وتىر. مۇندا بايلانىس عيماراتتارىندا اپاتتى جاعدايلار تۋىنداعاندا, ونى توقتاتۋ مەن جويۋعا ۋاقىتتى ۇنەمدەيتىن, قوسالقى ستانسا جابدىقتارىن باسقارۋ جىلدامدىعىن نەگىزگى ۋاقىت رەجىمىندە قامتاماسىز ەتەتىن SCADA جۇيەسى بويىنشا ورتالىققا تەلەاقپاراتتار بەرۋ جانە جيناقتاۋ جۇمىسىن جەدەل جۇرگىزەتىن ساندىق قۇرىلعىلار دا قامتىلعان.
جالپى, «مامىر» قوسالقى ستانساسىن پايدالانۋعا بەرۋ ارقىلى الماتى قالاسىن الداعى 20-25 جىل كولەمىندە ەنەرگيا قۋاتىمەن سەنىمدى قامتاماسىز ەتۋگە جاعداي جاسالدى. ءالى الدا جىل اياعىنا دەيىن وسىنداي 2 ستانسا ىسكە قوسىلادى دەپ وتىر قالا ەنەرگەتيكتەرى.
قانات ەسكەندىر,
«ەگەمەن قازاقستان».
الماتى.
–––––––––––––––––––––
سۋرەتتەردى تۇسىرگەن تالعاتبەك اسانوۆ.
