الەۋمەتتىك جاۋاپكەرشىلىك ارتادى
جيىن بارىسىندا ءسوز سويلەگەن قاسىم-جومارت توقاەۆ ۆولونتەر جىلىندا كوپتەگەن اۋقىمدى جوبا قولعا الىناتىنىن اتاپ ءوتتى. مۇنداي ورتالىقتار ەلىمىزدىڭ بارلىق وڭىرىندە اشىل-
ماق.
ءوز سوزىندە مەملەكەت باسشىسى ۆولونتەرلىكپەن اينالىسۋ قازاق حالقىنىڭ بويىندا بار اسىل قاسيەت ەكەنىن ەسكە سالىپ, اتا سالتىمىزدى قايتا جاڭعىرتۋدىڭ ءساتى كەلگەنىنە توقتالدى.
«يگى ىسپەن اينالىسۋ, ادامدارعا جاقسىلىق جاساۋ – حالقىمىزدىڭ كونە زاماننان كەلە جاتقان ءداستۇرى. ءبىز وسى ءداستۇردى ساقتاپ قالۋىمىز كەرەك. سەبەبى بىرەۋگە قول ۇشىن سوزىپ, قولداۋ كورسەتۋ – قانىمىزعا سىڭگەن قاسيەت. حالقىمىزدا وسىنداي بەرەكە-بىرلىككە شاقىراتىن «اسار» ءداستۇرى بار. بۇل – عاسىرلار بويى قۇندىلىعىن جويماعان اتا سالتىمىز. «جۇمىلا كوتەرگەن جۇك جەڭىل» دەيدى حالقىمىز. ۆولونتەرلىك قىزمەتتىڭ باستى ماقساتى دا – بىرگە جۇمىلىپ, حالىققا قىزمەت ەتۋ», دەدى ق.توقاەۆ.
پرەزيدەنت قيىن-قىستاۋ كەزەڭدە قازاقستانعا جەر اۋدارىلىپ كەلگەن كوپتەگەن ەتنوس وكىلدەرىن قازاق حالقى باۋىرىنا باسىپ, ءبىر ءۇزىم نانىمەن بولىسكەنىن اتاپ ءوتتى. «وزدەرىڭىزگە تاريحتان ءمالىم, كەزىندە قازاقستانعا كوپتەگەن ۇلت وكىلدەرى جەر اۋدارىلدى. سول قيىن-قىستاۋ ۋاقىتتا حالقىمىز ولاردى باۋىرىنا باسىپ, ءبىر ءۇزىم نانىن ءبولىستى. شىنايى جاناشىرلىق كورسەتۋ – قازاق حالقىنا ءتان قاسيەت. مىنە, ناعىز ۆولونتەر اتانۋدىڭ وزىق ۇلگىسى دەپ وسىنى ايتۋىمىز كەرەك», دەدى مەملەكەت باسشىسى ۆولونتەرلەرمەن كەزدەسۋىندە.
بۇگىندە دۇنيە جۇزىندە ۆولونتەرلىكپەن اينالىسۋ ءۇردىسى كەڭ تارالىپ, الەمدىك قوزعالىسقا اينالعانى بەلگىلى. ماسەلەن, الەمدىك ىشكى جالپى ءونىمنىڭ 2,5 پايىزى – ەرىكتىلەر ەڭبەگىنىڭ ناتيجەسى. وسىنى ەسكە سالعان مەملەكەت باسشىسى وسى سالاعا بەل شەشىپ ارالاسۋعا شاقىردى.
«قازىردىڭ وزىندە جەر بەتىندە 1 ميللياردقا جۋىق ادام ۆولونتەرلىكپەن اينالىسادى. ولاردىڭ جاھاندىق دامۋعا تيگىزەر ۇلەسى زور. كوپتەگەن ەلدە ۆولونتەر اتانۋ قالىپتى جاعداي, ۇلكەن قۇرمەت سانالادى. جۇرتشىلىق ولاردى سىيلايدى. مىسالى, فرانتسيا حالقىنىڭ جارتىسىنا جۋىعى ۆولونتەر اتانعان. گەرمانيا مەن جاپونيادا ۆولونتەرلەردىڭ سانى جىلدان-جىلعا كوبەيىپ كەلەدى. ءبىز دە وسىنداي دەڭگەيگە ۇمتىلۋىمىز كەرەك. ازاماتتارىمىز وزگەگە كومەك كورسەتۋدەن ايانىپ قالماۋى ءتيىس. سول ارقىلى قوعامدا الەۋمەتتىك جاۋاپكەرشىلىكتى ارتتىرامىز», دەدى پرەزيدەنت.
حاكىم ابايدىڭ «قارەكەت قىل, پايداسى كوپكە ءتيسىن» دەگەن ۇلاعاتتى ءسوزىن كەلتىرگەن پرەزيدەنت ۆولونتەرلىكتى كەڭىنەن دارىپتەپ, بەرەكە-بىرلىگىمىزدى ارتتىراتىن شارالارعا ءبىر ەل, تۇتاس ۇلت بولىپ اتسالىسۋ قاجەتتىگىن اتاپ كورسەتتى.
«ۆولونتەرلىك – ءپاتريوتيزمنىڭ ءبىر كورىنىسى. ەرىكتىلەر, ەڭ الدىمەن, ەلدىڭ يگىلىگىنە قىزمەت ەتەدى. ولاردىڭ جۇمىسى ازاماتتىق قوعامدى ودان ءارى دامىتۋعا مۇمكىندىك بەرەدى. ۆولونتەرلىك – ء«بىر جەڭنەن قول, ءبىر جاعادان باس شىعارىپ» ارەكەت ەتۋ. ۆولونتەرلىك – حالقىمىزدىڭ شىنايى بولمىسى. بۇل باستاما ۇلتتى ۇيىستىرىپ, مەملەكەتتىلىكتى نىعايتۋ ءۇشىن قاجەت», دەدى ق.توقاەۆ.
وي-سانانى جاڭعىرتاتىن باستاما
پرەزيدەنت ۆولونتەرلىكتىڭ ناقتى ىستەرمەن كورىنەتىن ءپاتريوتيزمنىڭ جوعارى دەڭگەيىن بىلدىرەتىنىنە توقتالىپ, بىرەۋدىڭ دۇنيە-مۇلكىنە قول سۇعىپ, توناۋمەن اينالىساتىنداردى پاتريوت سانامايتىنىن جەتكىزدى.
«وتانعا دەگەن ماحاببات ۇلكەن ۇراندار مەن بوس دەكلاراتسيالار ەمەس, بۇل – كۇندەلىكتى ەڭبەك, سونىڭ ىشىندە حالىقتىڭ يگىلىگى ءۇشىن شىنايى اتقارىلاتىن قايىرىمدى ءىس. بۇل – ادامنىڭ بولمىسى, بۇل – تەرەڭ ءبىلىم, جوعارى مىنەز-ق ۇلىق مادەنيەتى. وزگەنىڭ دۇنيە-مۇلكىنە قول سۇعاتىن, توناۋمەن اينالىساتىن, جالعان پاتريوتتىق ۇرانداردى تاراتاتىن ادامدار پاتريوت ەمەستىگىن ءتۇسىنۋىمىز كەرەك. وزگەلەردىڭ مۇلكىن توناپ, ولاردىڭ ومىرىنە قاۋىپ توندىرگەن ازاماتتار حالقىمىزدىڭ پاتريوتى ەمەس. مۇنداي ادامدار – زاڭدى ورەسكەل بۇزعان قىلمىسكەرلەر. سوندىقتان ولار قوعام مەن مەملەكەت الدىندا زاڭعا سايكەس جاۋاپ بەرۋى ءتيىس», دەدى ق.توقاەۆ.
مەملەكەت باسشىسىنىڭ ايتۋىنشا, پاتريوتيزم, قوعامعا قىزمەت ەتۋ جانە يگىلىكتى ءىس – ادامنىڭ تۇلعالىق جانە رۋحاني دامۋىنىڭ جوعارى دەڭگەيىنىڭ جارقىن كورىنىسى.
«ۆولونتەرلىك – مەملەكەت پەن قوعام ىلگەرىلەۋىنىڭ جارقىن كورىنىسى. ەلدىڭ دامۋى مەن جەتىستىگى حالىقتىڭ پاتريوتتىق بەلسەندى ارەكەتىنە تىكەلەي بايلانىستى. ولار كۇن سايىن ماڭىزدى قىزمەت ەتەدى. مۇنداي ازاماتتار بىزدە از ەمەس. 16 مىڭ ادام – باستاپقى مەجە. كەلەشەكتە ءجۇز مىڭداعان, ميلليونداعان ادام جان-تانىمەن, ەرىكتى تۇردە ۆولونتەرلىكپەن اينالىساتىنىنا سەنىمدىمىن. مەملەكەتتىڭ, اتقارۋشى بيلىكتىڭ جانە پارلامەنت دەپۋتاتتارىنىڭ مىندەتى – ۆولونتەرلىك قوزعالىسقا اتسالىسۋعا مۇمكىندىك بەرۋ.
ۆولونتەرلىك قىزمەت رەفورمالاردى جۇزەگە اسىرۋدا, جالپى مەملەكەتىمىزدى جاڭعىرتۋدا ماڭىزدى ءرول اتقارادى. ياعني ۆولونتەرلەر وزدەرىنىڭ ءىس-ارەكەتىمەن اسا ماڭىزدى رەفورمالاردى جۇزەگە اسىرۋعا ناقتى ۇلەس قوسادى. ەڭبەكقورلىق, الەمگە اشىقتىق ارقىلى وزىق تەحنولوگياعا جانە جوعارى ەڭبەك ونىمدىلىگىنە نەگىزدەلگەن جاڭا ەكونوميكا قۇرا الامىز. ۆولونتەرلىك يدەياسىن بەلسەندى ىلگەرىلەتۋ وتانداستارىمىزدىڭ وي-ساناسىنىڭ جاڭا پاراديگماسىن جاڭعىرتۋعا ىقپال ەتەدى», دەدى پرەزيدەنت.
جيىن بارىسىندا جاقىنىنا كومەكتەسۋ قازاق ۇلتىنىڭ قانىنا سىڭگەن ەرەكشە قاسيەت ەكەنى دە ايتىلدى. مەملەكەت باسشىسى مۇنداي ءداستۇر قيىن-قىستاۋ كەزەڭدە حالىق رەتىندە بولمىسىمىزدى ساقتاپ قالۋعا كومەكتەسكەنىنە ەكپىن بەردى.
«بۇگىن دە ەلىمىزدىڭ ازاماتتارى مۇقتاج جاندارعا قول ۇشىن بەرۋگە ءاردايىم دايىن ەكەنىن كورسەتىپ كەلەدى. ارىس وقيعاسى – سونىڭ ايقىن دالەلى. توتەنشە جاعداي كەزىندە قازاقستاننىڭ تۇكپىر-تۇكپىرىنەن جينالعان ۆولونتەرلەر زارداپ شەككەندەرگە كومەكتەستى. قالانى قالپىنا كەلتىرۋگە بەلسەنە اتسالىستى. ءبىزدىڭ حالقىمىز وزگەنىڭ باسىنا تۇسكەن جاعدايعا ەشقاشان بەيجاي قاراماعان. بۇعان كۇندەلىكتى ومىردەن كوپتەگەن مىسال كەلتىرۋگە بولادى», دەدى ق.توقاەۆ.
قاسىم-جومارت توقاەۆ ۆولونتەرلەر الدىندا سويلەگەن سوزىندە بەلسەندى ۇيىمداردى اتاپ ءوتتى. اتاپ ايتقاندا, قيىن تۇرمىستىق جاعدايعا تاپ كەلگەن ادامدارعا كومەك قولىن سوزۋعا دايىن مىڭداعان بەلسەندىسى بار ۇلتتىق ۆولونتەرلەر جەلىسىنىڭ, «Lider.kz», «Best for kids», ەلوردالىق «28 پەتەل» كلۋبى مەن «قامقورشىلار كلۋبىنىڭ» جۇمىسىنا جوعارى باعا بەردى.
ۇلتتىق ۆولونتەرلىك جەلى 10 جىل ىشىندە مىڭداعان بەلسەندىنى جيناپ, كەز كەلگەن ماڭىزدى ءارى قيىن ساتتە كومەك قولىن سوزۋعا ءازىر. ۇيىم ۇلكەن كومپانيالاردا كورپوراتيۆتى ۆولونتەرلىكتى دامىتىپ, ادىستەمە ارقىلى كومەكتەسىپ, ەلىمىزگە كەلگەن قوناقتار مەن تۋريستەرگە ارنالعان ەرىكتى كەزدەسۋ وتكىزەدى.
سونداي-اق «Lider.kz» ۆولونتەرلىك قوزعالىسىنىڭ جۇمىسىن ەرەكشە اتاپ وتكەن ءجون. بۇل ۇيىم توتەنشە جاعدايدا كومەك كورسەتۋ ءۇشىن قۇرىلعان. ونىڭ مۇشەلەرى جوعالعان ازاماتتاردى ىزدەستىرۋگە بەلسەنە اتسالىسادى. قازىر وسى قوزعالىستىڭ قاتارىندا ءبىر جارىم مىڭنان استام ەرىكتى بار.
ۆولونتەرلىكپەن اينالىسىپ جۇرگەن «Best for kids» قوعامدىق قورىنىڭ دا جۇمىسى – كوپشىلىككە ۇلگى-ونەگە. بۇل ۇيىم ءوز قىزمەتىن وسىدان ون جىل بۇرىن اقمولا وبلىسىندا باستاعان. سودان بەرى بالالار ۇيىندەگى جاسوسپىرىمدەرگە تۇراقتى قولداۋ كورسەتىپ كەلەدى. قور جاستارعا جىگەر بەرەتىن ءتۇرلى دارىستەر, ترەنينگتەر وتكىزەدى. سونىمەن قاتار جەتىم بالالارعا كومەكتەسەدى. مىنە, وسىنداي ۆولونتەرلىك ۇيىمداردى كوبەيتۋىمىز كەرەك», دەدى پرەزيدەنت.
پرەزيدەنت مۇنداي مىسالدىڭ ەلىمىزدە كوپتىگىن ايتا كەلە, قازاقستاندا ۆولونتەرلىكتىڭ بىرتە-بىرتە جالپىۇلتتىق سيپات الىپ كەلە جاتقانىنا توقتالدى.
«بۇل ۇدەرىس ۆولونتەر جىلىندا اتقارىلاتىن ءىس-شارالاردىڭ ارقاسىندا ازاماتتارىمىزدى ودان ءارى بىرىكتىرە تۇسەتىنىنە سەنىمدىمىن. يگى ىستەر ءبىزدىڭ مادەني بىرەگەيلىگىمىزدىڭ اجىراماس بولىگىنە اينالدى. ەلىمىزدە 200-دەن استام ۆولونتەرلىك ۇيىم بار. وندا 50 مىڭنان استام ۆولونتەر جۇمىس ىستەيدى», دەدى مەملەكەت باسشىسى.
جەڭىلدىك جاسالىپ, قولداۋ كورسەتىلەدى
جىل باسىنان بەرى الەۋمەتتىك ماڭىزى زور ونداعان جالپىۇلتتىق جوبا قولعا الىندى. ۆولونتەر جىلىنىڭ باستى ۇرانى – «Birgemiz». سوندىقتان بيىلعى بارلىق باستاما مەن يگى ءىس حالقىمىزدىڭ بىرلىگىن بەكەمدەمەك. مەملەكەت باسشىسى ءوزى ۇسىنعان ء«ار الۋان پىكىر – ءبىرتۇتاس ۇلت» تۇجىرىمى وسىنداي شارالار ارقىلى جۇزەگە اسىرىلاتىنىنا نازار اۋداردى. وسى ورايدا, مەملەكەت ەرىكتىلەرگە ارقاشان قولداۋ كورسەتەتىنىن جەتكىزىپ, ماڭىزدى بىرقاتار باعىتتى اتاپ كورسەتتى.
«جاستار جىلىن قورىتىندىلاۋ جيىنىندا قوعامنىڭ ناقتى ماسەلەلەرىن شەشۋگە ارنالعان بىرقاتار جوبالاردى ايتىپ ءوتتىم. اۋىل جاستارى, بالالار ءۇيىنىڭ تاربيەلەنۋشىلەرى, ارداگەرلەر مەن زەينەتكەرلەر قولداۋدى قاجەت ەتەدى. اسىرەسە ناۋقاستارعا جاردەمدەسۋدىڭ ماڭىزى ەرەكشە. ۆولونتەرلەردىڭ كۇشىمەن قۇقىقتىق ساۋات, ەكولوگيا سالالارىن جەتىلدىرىپ, قازاقستاننىڭ مادەني مۇرالارىن قورعاپ, ەلىمىزدىڭ باتىرلارىن ەسكە ساقتاۋ سالالارىنداعى تۇيتكىلدەردى شەشۋگە مۇمكىندىك مول», دەدى پرەزيدەنت.
قاسىم-جومارت توقاەۆ قازاقستان ازاماتتارىن جاھاندىق جانە ايماقتىق ماسەلەلەردى شەشەتىن حالىقارالىق ۆولونتەرلىك باستامالارعا بەلسەندى تۇردە تارتۋدى ۇسىندى.
«قازاقستان 116 ەلدىڭ 20 ميلليوننان استام ۆولونتەرىن بىرىكتىرەتىن دۇنيەجۇزىلىك ەكولوگيالىق «World Clean up day» ناۋقانىنا قوسىلۋعا دايىن. وتانداستارىمىزدىڭ بۇۇ, يۋنيسەف, AIESEC ۇيىمدارىنىڭ ەرىكتىلىك باعدارلامالارىنا جانە باسقا دا حالىقارالىق باستامالارعا اتسالىسۋى ءارتۇرلى مەملەكەتتەردىڭ تاجىريبەسىمەن تانىسۋعا جانە ەلىمىزگە ۇزدىك ۆولونتەرلىك تاجىريبەنى تارتۋعا مۇمكىندىك بەرەدى», دەدى پرەزيدەنت.
ق.توقاەۆتىڭ سوزىنە قاراعاندا, مەملەكەت ۆولونتەرلىكتىڭ ينفراقۇرىلىمىن قالىپتاستىرۋعا قولداۋ كورسەتۋى ءتيىس. سونىڭ ىشىندە ايماقتىق فرونت-وفيستەر بارلىق ەرىكتىلەرگە ءوز يدەيالارىن نەمەسە ناقتى ۆولونتەرلىك جوبالارىن ىسكە اسىرۋعا كومەكتەسەدى.
«ۆولونتەرلەرگە جان-جاقتى قولداۋ كورسەتۋ كەرەك. مەنىڭ تاپسىرمام بويىنشا ولارعا ارنايى جەڭىلدىكتەر ۇسىنىلادى. مىسالى, ەندى ۆولونتەرلىك جۇمىس ەڭبەك ءوتىلى سانالادى. سونداي-اق ۆولونتەر ستۋدەنتتەرگە قوسىمشا ستيپەنديا بەرىلەدى نەمەسە ءپان كرەديتتەرىن جابۋعا رۇقسات ەتىلەدى.
وسى سالادا جۇمىس ىستەيتىن ۇكىمەتتىك ەمەس ۇيىمدارعا دا قارجىلاي كومەك بەرىلەدى. وسىعان وراي الەۋمەتتىك جوبالاردى جۇزەگە اسىرۋ ءۇشىن 400-دەن استام شاعىن گرانت بولىنەدى. ءار گرانتتىڭ قۇنى 300 مىڭ تەڭگە كولەمىندە بولماق. ودان بولەك, اكىمدەرگە جەرگىلىكتى بيۋدجەتتەن قوسىمشا گرانتتار ءبولۋدى تاپسىردىم. ەڭبەگىمەن ەرەكشەلەنگەن ۆولونتەرلەر مەملەكەتتىك ناگرادالارعا ۇسىنىلادى», دەدى مەملەكەت باسشىسى.
بۇدان بولەك, پرەزيدەنت ۆولونتەرلىك قوزعالىسقا قولايلى جاعداي جاساۋ ءۇشىن كۇش سالاتىنىن مالىمدەدى. وسىعان بايلانىستى ۆولونتەرلىك ينفراقۇرىلىم اشىلماق.
«بۇگىن ۆولونتەرلىك باعدارلامالار مەن جوبالاردى باقىلاۋ جانە جۇيەلەۋ ءۇشىن رەسپۋبليكالىق كەڭسە اشىلدى. وسىعان ۇقساس ورتالىقتار ەلىمىزدىڭ بۇكىل ايماقتارىندا ىسكە قوسىلدى. كەز كەلگەن ادام ءوز جوباسىمەن سوندا بارا الادى. قازاقستانداعى مەكتەپتەردە, كوللەدجدەردە جانە جوعارى وقۋ ورىندارىندا ۆولونتەرلىك ۇيىمدار قۇرۋ جوسپارلانىپ وتىر», دەدى ق.توقاەۆ.
ۆولونتەرلىك جوبالاردىڭ ءبارىن مەملەكەتتىك مەكەمەلەرمەن, كاسىپكەرلەرمەن بىرلەسىپ جۇزەگە اسىرۋدىڭ ارتىقشىلىعىن ەسكە سالعان مەملەكەت باسشىسى مۇنداي قادام اتالعان سالانىڭ دامۋىنا تىڭ سەرپىلىس بەرەتىنىن جەتكىزدى.
«ۆولونتەرلەر ەلىمىزدىڭ رۋحاني الەۋەتىن ارتتىرۋعا ۇلەس قوسۋى كەرەك. مادەنيەتىمىزدى دامىتپاي ءوسىپ-وركەندەۋ مۇمكىن ەمەس. سوندىقتان وسى ماسەلەگە ەرەكشە ءمان بەرىلۋى ءتيىس. قازىرگى تاڭدا مادەنيەت جانە ونەر سالاسىنداعى جاس تالانتتاردىڭ ارقاسىندا قازاقستان كۇللى الەمگە تانىلىپ كەلەدى.
ءبىز وسى باعىتتا جۇيەلى جۇمىس جۇرگىزۋىمىز كەرەك, ياعني ويى ۇشقىر, دارىندى ازاماتتاردى بارىنشا قولداۋ كەرەك. سوندا عانا ءتول مادەنيەتىمىزدى جاڭا بەلەسكە كوتەرەتىن بۋىن قالىپتاسادى. وسىعان بايلانىستى مادەنيەت پەن ونەر باستامالارىن قولداۋعا ارنالعان قور اشۋدى تاپسىردىم. بۇل قۇرىلىم ونەر ۇيىمدارى مەن ەرەكشە جوبالارعا قارجىلاي دا, باسقا دا كومەك كورسەتەدى. قوردىڭ جۇمىسىنا ۆولونتەرلەردى دە تارتۋ قاجەت. ولار مۋزەي, كىتاپحانا جانە ونەر مەكەمەلەرىندە وزدەرىنىڭ جوبالارىن جۇزەگە اسىرا الادى. وسى شارالار ەلىمىزدىڭ شىعارماشىلىق الەۋەتىن نىعايتۋعا مول مۇمكىندىك بەرەدى», دەدى ق.توقاەۆ.
ءنورماتيۆتى-زاڭنامالىق بازا جاساقتالادى
مەملەكەت باسشىسى باق-تى اقپارات الاڭىندا ۆولونتەرلىك قىزمەتتى بەلسەندى تۇردە ناسيحاتتاۋعا شاقىردى.
«جوعارىدا ايتىلعان مىندەتتەردىڭ ءبارىن ىسكە اسىرۋ ءۇشىن ءبىز ۆولونتەرلىك قىزمەتتىڭ زاڭنامالىق بازاسىن نىعايتۋدى كوزدەپ وتىرمىز. ۆولونتەرلەر جۇمىسىن تابىستى جۇرگىزۋ ءۇشىن ءوزىنىڭ ءنورماتيۆتى-زاڭنامالىق نەگىزدەمەسىنە سۇيەنەدى. ماڭىزدى مىندەتتەردىڭ ءبىرى – ۆولونتەرلەردى دايىنداۋ ءۇشىن ترەنينگتى باعدارلامالاردى ازىرلەۋ. تۇراقتى تۇردە وقىتۋ سەمينارلارى وتكىزىلەدى. بيىل ءداستۇرلى «زەرەن» جاستار لاگەرى وسى تاقىرىپقا ارنالادى. ۆولونتەرلىك يدەياسى ءبىلىم وردالارىنداعى وقىتۋ باعدارلامالارىنىڭ ەلەمەنتىنە اينالادى. ازاماتتارىمىزدىڭ يگى ءىسىن باق پەن الەۋمەتتىك جەلىلەر ارقىلى حالقىمىزعا جەتكىزىپ وتىرۋ كەرەك», دەدى پرەزيدەنت.
مەملەكەت باسشىسى ۆولونتەرلەردىڭ كۇن سايىن اۋقىمدى ءارى ماڭىزدى جۇمىس اتقارىپ كەلەتىنىن اتاپ ءوتتى. سول ارقىلى قازاقستاننىڭ ءوسىپ-وركەندەۋىنە ۇلەس قوسىپ وتىرعانىن العا تارتتى.
«ۆولونتەر جىلى – كەزەكتى ناۋقان ەمەس. وسىنى حالىققا ءتۇسىندىرۋىمىز كەرەك. بۇل – ەل ءۇشىن, قوعام ءۇشىن ادال قىزمەت. ۆولونتەرلىك حالقىمىزدىڭ ءومىر سالتىنا اينالۋى كەرەك. ونى تاۋەلسىز قازاقستاننىڭ بۇگىنگى جانە بولاشاق سيپاتى رەتىندە دارىپتەگەن ءجون. ۆولونتەرلەردىڭ بويىنداعى قايرات-جىگەر ءار ازاماتتى ىنتالاندىرۋى ءتيىس. ەلىمىزدەگى ءار اۋىل-ايماق وسى ماڭىزدى جۇمىستان تىس قالمايدى دەپ سەنەمىن», دەدى پرەزيدەنت.
ايتا كەتەرلىگى, جيىن بارىسىندا مەملەكەت باسشىسى قاسىم-جومارت توقاەۆ قازاقستانداعى ۆولونتەرلەر قوزعالىسىنىڭ قۇرمەتتى ەلشىسى اتاندى. «بۇل مارتەبە – ۆولونتەرلىك قىزمەتتىڭ قۇرمەتتى ەلشىسى اتانۋ دا ەرەكشە ماڭىزعا يە. سول سەبەپتى بىرگە جۇمىس اتقارامىز», دەپ اعىنان جارىلدى پرەزيدەنت.
«Birgemiz» فرونت-ءوفيستىڭ اشىلۋ سالتاناتىندا اقپارات جانە قوعامدىق دامۋ ءمينيسترى داۋرەن اباەۆ بايانداما جاساپ, جوسپارلانعان جوبالارمەن تانىستىردى.
«جاڭا باستاما» دەپ اتالاتىن جاڭا جوباعا نازار اۋدارعىم كەلەدى. مەملەكەت بۇل جوباعا 170 ميلليون تەڭگە ءبولدى. ياعني 170 الەۋمەتتىك جوبا ميلليون تەڭگەدەن الا الادى. بۇل قاراجات ايلىق رەتىندە ەمەس, ۆولونتەرلەرگە ىستىق تاماق بەرۋگە, جولاقىسىن تولەۋگە, كەرەكتى جابدىق الۋعا جۇمسالادى», دەدى ۆەدومستۆو باسشىسى.
سونداي-اق مينيستر qazvolunteer.kz سايتىنا 16 مىڭ ستۋدەنت تىركەلگەنىن اتاپ ءوتتى. الداعى ۋاقىتتا ۆولونتەرلىكتىڭ دامۋى ءۇشىن زاڭناماعا دا وزگەرىستەر ەنگىزۋ جوسپارلانعان.
«بيىل ۆولونتەرلەردىڭ سانى ارتادى دەگەن سەنىمدەمىن. مىڭداعان ۆولونتەر ومىرلىك قيىن جاعدايعا تاپ كەلگەن بالالارمەن جۇمىس ىستەيدى. 14 مىڭ جوعارى سىنىپ وقۋشىسىن اعىلشىن تىلىنەن ۇلتتىق بىرىڭعاي تەستىلەۋگە دايىنداۋدى جوسپارلاپ وتىرمىز. 7 مىڭنان استام ازاماتقا كومەك كورسەتەمىز», دەدى د.اباەۆ.
ءمينيستردىڭ سوزىنە قاراعاندا, ۆولونتەر جىلى اياسىندا بىرقاتار اۋقىمدى جوبانى جۇزەگە اسىرۋ كوزدەلگەن. بۇگىندە ەلىمىزدە 50 مىڭ بەلسەندى ازاماتى بار 200 ۆولونتەرلىك ۇيىم جۇمىس ىستەيدى.
«پرەزيدەنتتىڭ باستاماسىمەن قولعا الىنعان «تازا قازاقستان» اكتسياسىنا 300 مىڭ ادام قاتىستى. وسى جىلى بۇل اكتسيانى جالعاستىرامىز. مەنىڭشە, ولاردىڭ سانى ميلليون ادامعا جەتۋى ءتيىس. بيىل قازاقستان دۇنيەجۇزىلىك اكتسياعا قاتىسادى», دەدى ۆەدومستۆو باسشىسى.
د.اباەۆتىڭ كەلتىرگەن دەرەكتەرىنە سۇيەنسەك, بۇگىندە قازاقستاندىقتاردىڭ تەك 6 پايىزى عانا ۆولونتەرلىكپەن بەلسەندى اينالىسادى. ايتسە دە, ۆولونتەرلىك شارالارعا قاتىسۋعا نيەتتى قازاقستاندىقتاردىڭ سانى 48 پايىزعا جۋىقتايدى.
ءىس-شارا سوڭىندا «Qazvolunteەr.kz» ونلاين-پلاتفورماسى كورسەتىلدى. سونداي-اق «Birgemiz: Asyl mura», «Birgemiz: Bilim», «Birgemiz: Saýlyq», «Birgemiz: Sabaqtastyq», «Birgemiz: Taza Álem», «Birgemiz: Úmit» سەكىلدى جوبالار تانىستىرىلدى.
جوعارىدا اتالعان جوبالار ەلىمىزدىڭ تۇكپىر-تۇكپىرىندەگى وڭىرلەردە جۇزەگە اسىرىلىپ, كومەككە مۇقتاج جاندارعا قولداۋ كورسەتىپ, ەل دامۋىنىڭ داڭعىل جولىنا ۇلكەن ۇلەس قوسپاق. وسى باستامالاردىڭ ءساتتى جۇزەگە اسۋىنا جاردەمدەسەتىن فرونت-ءوفيستىڭ جۇمىسى جان-جاقتى ويلاستىرىلعان. ۆولونتەر جىلىنىڭ قورىتىندىسى بويىنشا, «جىل ۆولونتەرى» حالىقارالىق سىيلىعى تاعايىندالماق.
قاتىسۋشى جاستار لەبىزى
ءمانسيا ەسەكەەۆا,
«جاس ۇلان» بىرىڭعاي بالالار مەن جاسوسپىرىمدەر ۇيىمى» قوعامدىق قورىنىڭ ءتورايىمى:
– كەشە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ ۆولونتەرلىك جوبالاردى ۇيلەستىرەتىن ءارى قوعامدىق مونيتورينگ جاسايتىن جانە ۆولونتەرلىكتى بۇكىل ەلىمىز بويىنشا وقىتىپ, ناسيحاتتايتىن فرونت-ءوفيستىڭ جۇمىسىمەن تانىسقان كەزىندە سويلەگەن ءسوزىن مۇقيات تىڭدادىق.
جۇيەلى ءسوزدىڭ ارقاشان جۇيەسىن دە, باعىتتالىپ وتىرعان يەسىن دە تاباتىندىعى داۋسىز. پرەزيدەنتتىڭ سوزىندەگى ايتىلعان قاداۋ-قاداۋ ماسەلەلەر كوپشىلىكتىڭ كوكەيىندە جۇرگەن ويدى ءدوپ باسىپ وتىر دەپ ايتساق, ارتىق بولماس ەدى.
قازاق حالقى ىقىلىم زاماننان بەرى باۋىرمال ءارى ىنتىماقشىل. ءبىزدىڭ كۇنى بۇگىنگە دەيىن جالعاسىپ كەلە جاتقان حالىقتىق پەداگوگيكامىزدا دا, سالت-داستۇرىمىزدە دە بىرلىگىمىزدى نىعايتاتىن, ىنتىماعىمىزدى ارتتىراتىن مازمۇن وتە كوپ. ءبىز دە تەرەڭنەن تامىر تارتقان وسى باعىتتا جۇمىس ىستەۋدەمىز. ءبىزدىڭ «جاس ۇلان» بىرىڭعاي بالالار مەن جاسوسپىرىمدەر ۇيىمى 2011 جىلدان باستاپ جۇمىس ىستەپ كەلەدى. قازىر اقمولا وبلىسىندا جەتپىس مىڭنان استام مۇشەسى بار. «جاستا بەرگەن تاربيە, جاس قايىڭدى يگەنمەن بىردەي» دەيتۇعىن اتالى ءسوز بار. بۇل ءومىر ەلەگىنەن وتكىزىلگەن ءتامسىل. ءبىز دە بالعىن جۇرەكتەردە ادامگەرشىلىك ءدانىن سەۋىپ, وڭ مەن سولىن تانىتىپ تاربيەلەۋدەمىز.
شىنىن ايتۋ كەرەك, بالالار مەن جاسوسپىرىمدەر ءبىر-بىرىنە قامقورلىق جاساۋعا قۇشتار. ماسەلەن, جوعارى سىنىپ وقۋشىلارى تومەنگى سىنىپتا تاربيەلەنەتىن بۋىندى ۇدايى قاداعالاپ وتىرادى. ولاردىڭ وقۋلارىنا كومەكتەسەدى, اسىرەسە كوركەم شىعارمالاردى ناشىنە كەلتىرىپ, مانەرلەپ وقۋعا قۇمار. كەيبىر تومەنگى سىنىپتارداعى وقۋشىلاردىڭ ساباق ۇلگەرىمى ناشارلاسا, كومەككە كەلەتىندەر دە جوعارى سىنىپتارداعى اعالارى مەن اپالارى. بالالار ءوز زامانداستارىن عانا ەمەس, اۋىلداعى جالعىزىلىكتى قاريالار مەن زەينەتكەرلەرگە دە قول ۇشتارىن بەرىپ, قامقورلىق كورسەتەدى. مۇنداي مىسالدار وتە كوپ. ەگدە ادامدارعا جاساعان جاقسىلىقتارى ءۇشىن اق باتا الىپ, كوڭىلدەرى قاناتتانىپ قالادى. وسىنداي جايلار ءتالىمدى تاربيەنىڭ قاينار بۇلاعى, باستاۋى دەسەك, قاتەلەسپەس ەدىك.
ۇيىم ءوز جۇمىسىن جان-جاقتى جولعا قويعان. ماسەلەن, ءبىر كەزدە ء«تىلى باسقا تىلەگى ءبىر, ءجۇزى باسقا جۇرەگى ءبىر» دەپ ايتىلاتىنداي جۇزدەگەن ۇلت پەن ۇلىستىڭ بالالارى بالداۋرەن قىزىقتى شاقتارىن بىرگە وتكىزىپ, بىرگە ەرجەتۋدە. ولاردىڭ اراسىندا ۇلتقا ءبولىنۋ, ۇلىسقا ءبولىنۋ جوق. ەرتەڭ ات جالىن تارتىپ مىنگەندە دە, ارالارىنا سىنا تۇسپەيتىندىگىنە سەنىم مول. ءاردايىم ءتۇرلى تاقىرىپتا بايقاۋلار مەن ترەنينگتەر وتكىزەمىز.
جاس تولقىندى كوركەم ادەبيەتتى وقۋعا, كوركەم ونەرمەن باۋىرلاستىرۋعا تالپىنامىز. وسىنىڭ بارلىعى اينالىپ كەلگەندە, جاس تولقىننىڭ بويىنداعى ىزگىلىك پەن ىزەتتى, پاراسات پەن ادامگەرشىلىكتى دامىتا تۇسەدى.
ال پاراساتتى ادامدار قاي ۋاقىتتا بولسىن زامانداسىنىڭ جان دۇنيەسىنە تەرەڭدەي ءۇڭىلىپ, قينالعان ساتىندە قول ۇشىن بەرۋگە دايار تۇرادى ەمەس پە؟ مەنىڭ ويىمشا, ءپاتريوتيزمنىڭ نەگىزگى ءبىر تامىرى – ۆولونتەرلىكتى ورىستەتۋ. ادامداردىڭ ءبىر-بىرىنە جانى اشىپ, ەلجىرەپ تۇرۋى بالا جاستان بويىنا ءبىتىپ, سۇيەگىنە ءسىڭۋى كەرەك.
ەلدوس اباقانوۆ,
Taza alem جوباسىنىڭ امباسسادورى:
– ء«بىز بىرگەمىز!» جوباسى بىرنەشە باعىتتا جۇمىس ىستەيدى. مەن ەكوۆولونتەرلىك باعىتىنا جاۋاپتىمىن. ەكولوگيانى, قورشاعان ورتانى قورعاۋ بۇل مەملەكەتتىك دارەجەدەن بۇرىن ءار ازاماتتىڭ دەڭگەيىندەگى ماسەلە. ول ءار ادامنىڭ ءوزىنىڭ تۇرعان جەرىنە كوڭىل ءبولۋى مەن ونى كۇتۋىنەن باستالادى. ءبىزدىڭ نەگىزگى ماقساتىمىز – كەلەشەكتە ەلىمىزدى, جەر شارىن قورعايتىن, ساقتايتىن ۇرپاقتى تاربيەلەۋ, ەكولوگيالىق ماسەلەلەرگە بەيجاي قارامايتىن ازاماتتاردىڭ قاتارىن كوبەيتۋ. بۇل دا الەۋمەتتىك جاۋاپكەرشىلىك. ويتكەنى قورشاعان ورتانى ويلاۋ, ەكولوگياعا كوڭىل ءبولۋ جاستاردىڭ الەۋمەتتەنگەنىن كورسەتەدى.
اتالعان باعىتتا ءتۇرلى جۇمىستاردى قولعا الدىق, جوبالار ىسكە قوسىلدى. ەڭ قاراپايىم قوقىستى سۇرىپتاۋدى ۇيرەتۋدەن باستاپ, پلانەتامىز ءۇشىن ماڭىزدى وزگەرىستەرگە اياق باستىق. بۇل تۇرعىدا مەكتەپ, جوعارى وقۋ ورىندارىمەن بىرلەسە وتىرىپ جۇمىس باستادىق. ولارعا ۆولونتەرلىك تۋرالى ءتۇسىندىرىپ, جۇمىس ىستەۋ رەتىن كورسەتىپ جاتىرمىز.
ۆولونتەرلىك تەك كومەكتەسۋ ەمەس, ونىڭ اياسى كەڭ. ەكولوگيالىق ماسەلەلەردى تابۋ, رەتتەۋ, الدىن الۋ دا ۆولونتەرلىكتىڭ ءبىر بولىگىنە جاتادى. باسقاشا ايتقاندا, الەم جۇرتشىلىعىن الاڭداتقان ماسەلەلەردىڭ سەبەبى مەن سالدارىن ءتۇسىنۋ, انىقتاۋ. بۇل – ەكولوگيا مادەنيەتى. كەلەشەكتە بۇل دا جولعا قويىلادى, ازاماتتارىمىزعا قىزىق بولادى دەگەن ويدامىز.
تاعى ءبىر ۇلكەن جاۋاپكەرشىلىك – اقپارات تاراتۋ. ۆولونتەرلەر قاتارىن كوبەيتۋ ءۇشىن دۇرىس اقپارات تاراتۋىمىز كەرەك. ۆولونتەرلىك ارقىلى ۇلكەن كومپانيالاردىڭ نازارىن اۋدارۋ, ولاردى ەكولوگيانى قورعاۋعا جۇمىلدىرۋ دا ۆولونتەرلەردىڭ الەۋمەتتىك جاۋاپكەرشىلىگى دەپ بىلەمىن. ويتكەنى كەي كەزدە ەكولوگياعا قاۋىپ ۇلكەن كومپانيالاردىڭ جۇمىسىنان كەلەدى. سوندىقتان ۆولونتەرلىك تەك كومەك ەمەس, بۇل – ۇلكەن جاۋاپكەرشىلىك. بۇل – ماڭىزدى ماسەلەلەرگە نازار اۋدارتا الاتىن كۇش.
گۇلميرا ابدراشەۆا,
«كلۋب دوبرياكوۆ» جوباسىنىڭ نەگىزىن قالاۋشى:
– ۆولونتەرلىك – اركىمنىڭ مىندەتى. ءبارى ۆولونتەرلىكتى تەگىن قىزمەت, جاردەمدەسۋ دەپ بىلەدى. شىنىنا كەلسەك, ءار ازامات ۆولونتەر بولۋى كەرەك. كومەككە مۇقتاج ادامدار كوپ. ماسەلە ماتەريالدىق كومەكتە ەمەس. جىلى ءسوز ايتىپ, قولداعانىڭنىڭ ءوزى ۆولونتەرلىك. بۇل دا ۇلكەن ساۋاپ. ء«بارى جاقسى بولادى» دەگەندى ەستىگىسى كەلەتىندەر قانشاما.
جاۋاپكەرشىلىك تە ءار ادامنىڭ مىندەتى. بۇل تەك ۆولونتەرلەردىڭ شەڭبەرىندە قارايتىن ماسەلە ەمەس. ءار ازامات تۇرىپ جاتقان جەرىمىزدىڭ بىزگە تەك ۋاقىتشا بەرىلگەنىن ەسىنەن شىعارماعانى ءجون. قوعامنىڭ, بالالارىمىزدىڭ الدىنداعى جاۋاپكەرشىلىكتى سەزىنۋىمىز كەرەك. ۇرپاعىمىزعا بىزدەن نە قالاتىنىن ءجيى ويلاۋ قاجەت. جەردەگى قوقىستى كوتەرگەننەن ازاماتتاردىڭ ارلانباعانى دۇرىس. سوندىقتان ۆولونتەرلەر دەپ جاۋاپكەرشىلىك پەن مىندەتتى شەكتەمەگەن ءجون. بۇل بارلىعىمىز بىرگە, جۇمىلىپ كىرىسەتىن جۇمىس.
قۋاندىق جانىسباەۆ,
Shymkent Volunteers توبىنىڭ جەتەكشىسى:
– نۇر-سۇلتان قالاسىنداعى ەكسپو كورمەسىنىڭ «Art Hub» پاۆيلونىندا ورنالاسقان ۆولونتەرلەردىڭ «Birgemiz» رەسپۋبليكالىق فرونت-كەڭسەسىنىڭ اشىلۋ سالتاناتىنا جانە ونداعى سالالىق 7 باعىتتىڭ تانىستىرىلىمىنا شاقىرتۋ العانىما قۋانىشتىمىن.
وزدەرىڭىزگە بەلگىلى, شىمكەنت قالاسى ەلىمىزدەگى جاستار كوپ شوعىرلانعان مەگاپوليستەردىڭ ءبىرى. سوندىقتان قالامىزدا ۆولونتەر جاستاردىڭ قاتارى وتە كوپ. قازىرگى تاڭدا شاھاردا 40-قا جۋىق ۆولونتەرلىك توپ جۇمىس ىستەۋدە. ارينە پرەزيدەنتىمىز قاسىم-جومارت توقاەۆ ەلىمىزدەگى ۆولونتەرلەر سانىن 100 مىڭعا دەيىن جەتكىزۋ كەرەكتىگىن ايتتى. وسى تاريحي ماڭىزى زور ءىس-شارادان قايتقان سوڭ شىمكەنتتەگى ارىپتەستەرىمىزدى وسى ساۋاپتى ىسكە قاتىسۋعا شاقىراتىن بولامىز.
ۆولونتەرلەر ساپىنا قوسىلعانىما 5 جىلدان استى. ەڭ العاش 2015 جىلى وسى سالادا قايىرىمدىلىقپەن جانە ءوزىن ءوزى باسقارۋ باعىتىمەن جۇمىس ىستەي باستادىم. قازىرگى تاڭدا شىمكەنت قالاسى «جاستار رەسۋرستىق ورتالىعى» كمم جانىنان قۇرىلعان Shymkent Volunteers توبىنىڭ جەتەكشىسىمىن. ۆولونتەرلىك كلۋبىمىزدىڭ قۇرىلىپ, جۇمىس باستاعانىنا 6 ايدان استى. پرەزيدەنتىمىز «ۆولونتەر جىلى» دەپ جاريالاعاننان بەرى شىمقالادا ۆولونتەرلىك توپتار كۇن ساناپ كوبەيىپ كەلەدى. اتالعان ۆولونتەرلەر توبىمىزدا 200-گە تارتا جاس 3 باعىت («Qamqor», «Sabaktastyq», «Saýlyq») بويىنشا جۇمىس ىستەپ كەلەمىز. ناقتىراق ايتار بولساق,
6 اي ىشىندە 60-قا جۋىق ءىس-شارا وتكىزدىك. مۇنىڭ كوبىسى جاعدايى تومەن وتباسىلارعا جانە ارداگەرلەر ۇيىنە, بالالار ءۇيىنىڭ تاربيەلەنۋشىلەرىنە كونتسەرتتىك قويىلىمدار ۇيىمداستىرۋ بولدى.
سونداي-اق ۆولونتەرلەردىڭ باستاماسىمەن وڭىرىمىزدەن شىققان ونەر جۇلدىزدارىمەن بىرلەسە وتىرىپ «جانعا جىلۋ» اكتسياسىن ۇيىمداستىردىق. ناتيجەسىندە, جاعدايى تومەن 50 وتباسىن ازىق-ت ۇلىك, قاجەتتى زاتتارمەن قامتاماسىز ەتتىك. بۇل اكتسيا ءالى دە جالعاسىن تابا-
دى.
سابىرجان كەڭشىلىك,
قىزىلوردا قالالىق جاستار رەسۋرستىق ورتالىعىنىڭ ديرەكتورى:
– مەملەكەت باسشىسى بيىلعى جىلدىڭ باستى ۇرانى «Birgemiz» ەكەندىگىن اتاپ ءوتىپ, وسى جىل اياسىنداعى بارلىق باستامالار مەن يگى ىستەر حالقىمىزدىڭ بىرلىگىن بەكەمدەيدى دەگەن سەنىمىن ءبىلدىردى.
ۆولونتەر جىلىندا ءبىزدىڭ قوعامداعى ناقتى ماسەلەلەردى شەشۋگە ارنالعان بىرقاتار اتاۋلى جوبالار جۇزەگە اساتىنى ايتىلدى. مىسالى, ۆولونتەرلىك جۇمىس ەندى ەڭبەك وتىلىنە ەسەپتەلىپ, ەرىكتىلەر ىسىنە ۇلەس قوسقان ستۋدەنتتەرگە ءتۇرلى جەڭىلدىكتەر جاسالاتىنىن قۋانا قۇپتادىق.
وسى سالادا جۇمىس ىستەيتىن ۇكىمەتتىك ەمەس ۇيىمدارعا دا قارجىلاي كومەك بەرىلىپ, بارلىق جوبالارعا مەملەكەتتىك ورگاندار مەن بيزنەس تاراپىنان قولداۋ بولاتىنى ءبارىمىزدى ءبىر سەرپىلتىپ تاستادى. مەن بۇل شارادا «جەڭىس» جوباسى اياسىنداعى قىزىلوردالىق ۆولونتەرلەر جۇمىسى جايلى ايتىپ ءوتتىم. ۇلى وتان سوعىسى, تىل ارداگەرلەرى مەن الەۋمەتتىك وسال توپتار وكىلدەرىنە جاردەم بەرەتىن بۇل قوزعالىس قالادا 4 جىل كولەمىندە تۇراقتى جۇمىس ىستەپ, جۇزدەگەن جانعا كومەك كورسەتتى.
وسى ساپارىمىزدا ۆولونتەرلەر جۇمىسىن ۇيلەستىرۋدىڭ ءتۇرلى تاجىريبەلەرىمەن تانىستىق. ەندى سونى ەلگە جەتكىزىپ, يگى ىسپەن اينالىسۋعا نيەت بىلدىرگەندەر اراسىندا ناسيحاتتايمىز.
قازىر قىزىلوردا قالاسىنىڭ وزىندە عانا ۆولونتەرلىكپەن اينالىسىپ جۇرگەن 20-عا جۋىق ۇيىم بار. الداعى ۋاقىتتا وسى ۇيىم مۇشەلەرىن وقىتىپ, باعىتتارىمىزدى ناقتىلاي تۇسەمىز. قينالعانعا قول ۇشىن سوزاتىن يگى ءداستۇرىمىزدى جاڭعىرتاتىن جاستاردىڭ قاتارى ءالى دە كوبەيە تۇسەتىنىنە كۇمان جوق. ويتكەنى ۆولونتەر بولۋ ەلىڭە دەگەن سۇيىسپەنشىلىكتىڭ كورىنىسى.
