كەشە سىرتقى ىستەر مينيسترلىگىنىڭ ءباسپاسوز حاتشىسى نۇرجان ايتماحانوۆتىڭ قاتىسۋىمەن اتالعان ۆەدومستۆونىڭ ءداستۇرلى بريفينگى ءوتتى. وندا ەكى ماسەلە توڭىرەگىندە اڭگىمە قوزعالدى.
كەشە سىرتقى ىستەر مينيسترلىگىنىڭ ءباسپاسوز حاتشىسى نۇرجان ايتماحانوۆتىڭ قاتىسۋىمەن اتالعان ۆەدومستۆونىڭ ءداستۇرلى بريفينگى ءوتتى. وندا ەكى ماسەلە توڭىرەگىندە اڭگىمە قوزعالدى.
«قازاقستان رەسپۋبليكاسىنىڭ نيۋ-يوركتەگى باس كونسۋلدىعىنان كەلىپ تۇسكەن اقپاراتقا سايكەس, 2013 جىلعى 8 تامىزدا ماسساچۋسەتس شتاتىنىڭ ۆورچەستەر جوعارعى سوتى قازاقستاننان اسىراپ الىنعان ەكى بالاعا قارسى جىنىستىق سيپاتتاعى قىلمىستىڭ كوپتەگەن تارماقتارى بويىنشا ايىپتالۋشى دجوزەف جانە ليندا مەيوتتى كىنالى دەپ تانىدى», دەدى العاشقى ماسەلە توڭىرەگىندە ءباسپاسوز حاتشىسى. ونىڭ ايتۋىنشا, قازىرگى ۋاقىتتا د. مەيوتت تۇتقىندالعان, ال ونىڭ زايىبى اۋرۋحانادان شىققاننان كەيىن تۇتقىندالماق.
«سوتتىڭ ۇكىم شىعارۋ كۇنى 22 تامىزعا بەلگىلەنگەن. بۇل ماسەلە قر ءسىم-ءنىڭ قاتاڭ باقىلاۋىندا تۇر. جاڭا مالىمەت كەلىپ تۇسكەن جاعدايدا, قوسىمشا حابارلايتىن بولامىز», دەدى ءوز سوزىندە ن.ايتماحانوۆ.
بريفينگتە كوتەرىلگەن ەكىنشى ماسەلە, قازاقستان رەسپۋبليكاسىنىڭ ازاماتتارى ازامات تاجاياقوۆ پەن دياس قادىرباەۆقا قاتىستى بولدى. ءباسپاسوز حاتشىسىنىڭ ايتۋىنشا, قازاقستان رەسپۋبليكاسىنىڭ نيۋ-يوركتەگى باس كونسۋلدىعىنىڭ اقپاراتىنا سايكەس, 2013 جىلعى 8 تامىزدا فەدەرالدى ءۇلكەن ادىلقازى (Grand Jury) قازاقستاندىق ازاماتتار ازامات تاجاياقوۆ پەن دياس قادىرباەۆقا قاتىستى ايىپ تاعۋدى قولداعان. ايىپ ەكى تارماقتان تۇراتىن كورىنەدى. ءبىرىنشىسى – تەرگەۋگە كەدەرگى كەلتىرۋ ماقساتى بويىنشا الدىن الا كەلىسىم, ەكىنشىسى – تەرگەۋگە كەدەرگى جاساۋ, قىلمىسكەرگە كومەك كورسەتۋ جانە ارانداتۋشىلىق.
«اتالعان ايىپتار بويىنشا ولار 25 جىل مەرزىمگە باس بوستاندىعىنان ايىرىلۋى مۇمكىن (1-تارماق بويىنشا 20 جىل, 2-تارماق بويىنشا 5 جىل). سونىمەن قاتار, سول جازانى وتەگەننەن كەيىن كەزەكتى 3 جىل باقىلاۋدا بولىپ, 250 مىڭ اقش دوللارى كولەمىندە ايىپپۇل جازاسى كەسىلمەك. سوت وتىرىسى 13 تامىزعا كوزدەلگەن, وندا ايىپتالۋشىلار (ا.تاجاياقوۆ پەن د.قادىرباەۆ) ءوز كىنالارىن مويىنداماي, باسقا ءىس-جۇرگىزۋ فورمالدىلىعى ساقتالاتىن بولادى دەپ كۇتىلۋدە. ايىپتالۋشىلار ءوز كىنالارىن مويىنداماعاننان سوڭ, سوت ۇدەرىسى بارلىق جاعدايلارمەن تانىسۋ فازاسىنا جانە جەكەلەگەن دالەلدەر بويىنشا نارازىلىق بىلدىرۋگە كوشەتىن بولادى. اتالعان ۇدەرىس ءداستۇر بويىنشا ايتارلىقتاي ۇزاق ۋاقىتتى تالاپ ەتەدى, سوندىقتان بەلگىسىز ۋاقىتقا سوزىلۋى مۇمكىن ەكەندىگىن اتاپ وتكىمىز كەلەدى», دەدى ن.ايتماحانوۆ.
ءباسپاسوز حاتشىسى, سونداي-اق, ەلىمىزدىڭ سىرتقى ىستەر مينيسترلىگى بۇل ماسەلەنى باقىلاۋدا ۇستاپ وتىرعانىنا, باس كونسۋلدىقتىڭ قىزمەتكەرلەرى ءبىزدىڭ ازاماتتارىمىزدىڭ اتا-انالارىمەن جانە ادۆوكاتتارىمەن تۇراقتى تۇردە بايلانىستا ەكەنىنە توقتالىپ ءوتتى.
ءلايلا ەدىلقىزى,
«ەگەمەن قازاقستان».
