رۋحانيات • 09 اقپان، 2020

ادامزاتتىڭ الىبىنا ارنالعان ايتىس

470 رەت كورسەتىلدى

نۇر-سۇلتان قالاسىندا اباي قۇنانباي ۇلىنىڭ 175 جىلدىعىنا ارنالعان العاشقى الامان ايتىس مارەگە جەتتى. Nur Otan پارتياسىنىڭ قولداۋىمەن، مادەنيەت جانە سپورت مينيسترلىگىنىڭ جانە نۇر-سۇلتان قالاسى اكىمدىگىنىڭ ۇيىمداستىرۋىمەن «ادامزاتتىڭ الىبى – حاكىم اباي» دەگەن اتپەن وتكەن جىر جەكپە-جەگىندە ەلىمىزگە تانىمال 16 اقىن باق سىنادى. 

ايتىستىڭ شىمىلدىعىن اشقان حالىقارالىق جىرشى-تەرمەشىلەر جانە ايتىس اقىندارى وداعىنىڭ توراعاسى ءجۇرسىن ەرمان بىرقاتار جاڭا ەرەجەلەردى اتاپ ءوتتى. اتاپ ايتقاندا، بۇل جولعى جىر دوداسىندا اقىنداردىڭ جۇبى الدىن الا انىقتالماعان. ولاردى كورەرمەن سول ساتتە جەرەبە سۋىرۋ ارقىلى جۇپتاستىرىپ وتىردى. سوندىقتان دا ايتىسكەرلەردىڭ تاپقىرلىعى مەن سۋىرىپ سالمالىعى بۇرىنعىدان بىرنەشە ەسە سىنعا تۇسكەنى انىق. بۇعان قوسا قازىلار القاسى قاتىسۋشىلاردىڭ ونەرىن ءداستۇرلى بالدىق جۇيەمەن ەمەس، كوك ءتۇستى تۇيمەشىكتى باسۋ ارقىلى باعالاپ، ءار جۇپتىڭ ءبىرىن عانا كەلەسى كەزەڭگە وتكىزىپ وتىردى.

جينالعان جۇرتتىڭ تاڭداۋىمەن، ەڭ الدىمەن، اقتوبەلىك مارات احمەتوۆ پەن شىعىسقازاقستاندىق اسەم ەرەجەقىزى ۇلى ويشىلدىڭ رۋحاني مۇراسىن جىرعا قوسسا، ەلوردالىق ەركەبۇلان قاينازاروۆ پەن اقتوبەلىك ەرشات قايبولدين ءسوز سايىسىن جالعاستىردى. ءۇشىنشى جۇپ بولىپ ساحناعا شىققان الماتىلىق بولاتبەك ورازباەۆ پەن قىزىلوردانىڭ شايىرى مەيىربەك سۇلتانحان ولەڭسۇيەر قاۋىمنىڭ دەلەبەسىن ودان سايىن قوزدىرسا، ءبىرىن ءبىرى قالجىڭمەن قاعىتقان اتىراۋلىق شالقارباي ءىزباساروۆ پەن شىم قالادان كەلگەن نۇرلان ەسەنقۇلوۆ كورەرمەندى كۇلكىگە قارىق قىلدى.

ا

قىز بەن جىگىت ايتىسىن جاساعان «Egemen Qazaqstan» گازەتىنىڭ ءتىلشىسى، اقىن راۋان قايداروۆ پەن سىر ەلىنەن كەلگەن نۇرزات قارۋ دا ادەبيەتتىڭ الىبىن جىرلارىنا ارقاۋ ەتتى. ايتىستىڭ التىنشى جۇبى قاراعاندىلىق ايتباي جۇماعۇلوۆ پەن قىزىلوردالىق مۇحتار نيازوۆ تا ايانىپ قالعان جوق. ەكى دۇركىن التىن دومبىرانىڭ يەسى اتانعان مۇحتار نيازوۆ اۆارياعا تۇسكەنىنە قاراماستان ابايدىڭ تويىنا امان-ەسەن جەتكەنىنە شۇكىرشىلىك ەتە وتىرىپ، ءوزى جىرلاعانداي «ارىستان جال اقىنداردىڭ» ايباتىن كورسەتتى. جەتىنشى جەرەبەدە جۇپتاسقان پاۆلودارلىق اسپانبەك شۇعاتاەۆ پەن قاراعاندىلىق تىلەگەن ءادىلوۆ اباي عاقليالارىن جاڭا عاسىرمەن ۇشتاستىرا جىرلاسا، شىعىستىڭ قوس اقىنى رۇستەم قايىرتاي مەن سەرىك قۋانعان ۇلى ايتىستىڭ العاشقى اينالىمىن قورىتىندىلادى.

قازىلار القاسىنىڭ شەشىمىمەن ەكىنشى اينالىمعا وتكەن 8 اقىننىڭ ىشىنەن العاشقى اينالىمدا ۇزدىك ونەر كورسەتكەن تورتەۋى تاڭدالىپ الىنىپ، بىردەن فينالدا ونەر كورسەتتى. ناقتىراق ايتقاندا، شەشۋشى كەزەڭدە مۇحتار نيازوۆ پەن سەرىك قۋانعان ۇلى ايتىسسا، ەركەبۇلان قاينازاروۆ پەن مەيىربەك سۇلتانحان تارتىسقا تولى جىر سايىسىن وتكىزدى.

ا

ءسويتىپ، جىر جەكپە-جەگىندە جەر اپشىسىن قۋىرعان كىل جۇيرىكتەردىڭ ونەرىن كورەرمەن جۇرت 8 ساعات بويى تىرپ ەتپەستەن تامسانا تاماشالادى. ءبارى دە ادەبيەت الىبى ابايدىڭ جاۋھار جىرىن تەرمەلەپ، تەرەڭ تولعامدارىنا بويلاي ءبىلدى، ۇلى ويشىلدىڭ ۇلاعاتتى ويىن بۇگىنگى قوعاممەن بايلانىستىرىپ، ەلدىك مۇددە مەن بەكەم بىرلىكتىڭ باياندى بولۋىن تىلەدى.

قازىلار القاسىنىڭ توراعاسى، اقىن نەسىپبەك ايت ۇلى ايتىستىڭ جوعارى دەڭگەيدە وتكەنىن ايتىپ، ايتىسكەرلەرگە العىسىن جەتكىزدى.

« ۇلى ابايدىڭ رۋحىنا ارنالعان بۇل ايتىس بۇكىل حالىقتىڭ جۇرەگىنەن شىقتى. ابايدىڭ قاسيەتى، قادىرى، ونىڭ الەمدەگى، ادەبيەتتەگى، تاريحتاعى ورنى اقىندارىنىڭ اۋزىنان جاقسى ايتىلدى. ايتىستىڭ العا قويعان نەگىزگى ماقساتى ورىندالدى. اقىندار قاشاندا ەلدىڭ، ەلدىكتىڭ، مەملەكەتتىڭ مۇددەسىن ايتىپ وتىرۋى كەرەك. حالىقتىڭ كەۋدەسىندەگى قىجىلدى جەتكىزۋى ءتيىس. بۇگىن اقىندار تارازىنىڭ ەكى باسىن ۇستاپ، ۇلكەن سابىرمەن، اقىلمەن، كەرەمەت ورنەكتى تىلمەنەن تاماشا جەتكىزدى» دەدى ول.

ل

قازىلار القاسىنىڭ شەشىمىمەن باس جۇلدەنى (3 ملن تەڭگە) تاپ بەرمەدە تارتىمدى ونەر كورسەتكەن مۇحتار نيازوۆ جەڭىپ الدى. ءبىرىنشى ورىندى (2 ملن تەڭگە) مەيىربەك سۇلتانحان يەلەنسە، ەكىنشى ورىندى (1 ملن تەڭگە) ەركەبۇلان قاينازاروۆ پەن سەرىك قۋانعان ۇلى ەنشىلەدى. ءۇشىنشى ورىن (500 مىڭ تەڭگە) راۋان قايداروۆ، تىلەگەن ءادىلوۆ جانە اسەم ەرەجەقىزىنا بۇيىردى. ايتىستىڭ ارنايى جۇلدەسىن (300 مىڭ تەڭگە) نۇرلان ەسەنقۇلوۆ السا، ە.قايبولدين، ش.ءىزباساروۆ، م.احمەتوۆ، ن.قارۋ، ب.ورازباەۆ، ا.جۇماعۇلوۆ، ا.شۇعاتاەۆ، ر.قايىرتاي قاتارلى 8 اقىنعا شابىتتاندىرۋ سىيلىعى بەرىلدى. سونداي-اق ءدۇبىرلى بايگەگە العاش رەت قاتىسسا دا، ەشكىمنەن قايمىقپاي ءسوز ساپتاعان نۇرزات قارۋعا «ادەمى-اي» كومپانياسىنىڭ ارنايى سىيلىعى تابىستالدى.

ا

ايتىستى جۇرگىزگەن اقىن ءجۇرسىن ەرمان بۇل دودا ادامزاتتىڭ الىبى – حاكىم ابايعا ارنالعان بيىلعى العاشقى ايتىس ەكەنىن اتاپ ءوتتى. ايتىسقا ارنالعان ءباسپاسوز ءماسليحاتىندا دا وسىنى ايتقان Nur Otan پارتياسى ساياسي جۇمىس دەپارتامەنتىنىڭ ديرەكتورى ەرلان قارابالاەۆ: «2020 جىلى ەلىمىزدە ءارتۇرلى دەڭگەيدەگى 80-گە جۋىق اقىندار ايتىسى وتەدى دەپ جوسپارلانۋدا. ونىڭ ۇشەۋى حالىقارالىق، 21-ءى رەسپۋبليكالىق دەڭگەيدە بولماق. سونداي-اق 21-ءى ابايدىڭ 175 جىلدىق مەرەيتويىنا، ۇشەۋى ءال-ءفارابيدىڭ 1150 جىلدىعىنا، ال بەسەۋى ۇلى جەڭىستىڭ 75 جىلدىعىنا ارنالادى» دەگەن بولاتىن.  

ا

 سۋرەتتەردى تۇسىرگەن ەرلان ومار، «Egemen Qazaqstan»

 

سوڭعى جاڭالىقتار

ەڭبەكتىڭ ەلەنگەنى جاقسى

پىكىر • بۇگىن، 20:33

«رولان گارروس» باستالدى

سپورت • بۇگىن، 20:26

ءالجاننىڭ كىسە بەلبەۋى

تاريح • بۇگىن، 20:23

ۇقساس جاڭالىقتار