ازاماتتار 14 ءتۇرلى تولەمدى ەشقايدا بارماي-اق پرواكتيۆتى فورماتتا الا الادى. جالپى العاندا, 2019 جىلى تسيفرلاندىرۋدىڭ الەۋمەتتىك-ەڭبەك سالاسىنا اسەرى 1,5 ملرد تەڭگەگە جۋىق سومانى قۇرادى.
2020 جىلى تاعى 6 قىزمەت پرواكتيۆتى فورماتتا ۇسىنىلاتىن بولادى جانە كادرلاردى قايتا دايىنداۋ پورتالى قۇرىلادى. ەلباسى تاراپىنان 2018 جىلى قولداۋ تاپقان Smart Data Ukimet جوباسىنا 5 مەملەكەتتىك ورگان قوسىلىپ, ولاردىڭ دەرەكقورلارىنا تالداۋ جاسالدى.
سونىڭ ناتيجەسىندە بىرقاتار ەكونوميكالىق مودەل ىسكە اسىرىلدى. حالىقتى جۇمىسقا ورنالاستىرۋ, تەگىن دارىلىك زاتتاردى ءبولۋ, «بولاشاق» باعدارلاماسى بويىنشا گرانتتار ءبولۋ جانە ت.ب. وسى جوبا جاساندى زەردە ەلەمەنتتەرىن پايدالانىپ, بيۋدجەت قاراجاتىن ۇنەمدەۋگە جول اشتى.
سونداي-اق ا. جۇماعاليەۆ جاساندى زەردە سالاسىندا جۇمىس باستالعانىن مالىمدەدى. ول ءۇشىن ارنايى زاڭ جوباسى ازىرلەندى. نازارباەۆ ۋنيۆەرسيتەتى جانە دۇنيەجۇزىلىك بانكپەن بىرگە ينستيتۋت قۇرىلىپ, باعدارلاما جاسالۋدا.
«مەملەكەتتىك ورگاندارمەن بىرلەسىپ, ءبىز 2020 جىل ىشىندە وسى جوبا اياسىندا جۇمىس ىستەيتىن بولامىز. بۇل جاڭا ەكونوميكالىق مودەلدەردى قۇرۋعا مۇمكىندىك بەرەدى. جاساندى زەردە تەحنولوگياسى بار Smart Data Ukimet جوباسى 180 ملرد تەڭگەدەن استام سوماعا جاناما اسەر بەرۋگە مۇمكىندىك بەرەدى», — دەپ اتاپ ءوتتى مينيستر.
ەكونوميكانىڭ ناقتى سەكتورىنا ەلىمىزدە ەرەكشە ءمان بەرىلەدى. وسى رەتتە «ەكونوميكا سالالارىن تسيفرلاندىرۋ» باعىتى بويىنشا وتىن-ەنەرگەتيكا, ونەركاسىپ جانە اۋىل شارۋاشىلىعى سەكتورلارىن تسيفرلاندىرۋدىڭ جيىنتىق اسەرى 92,4 ملرد تەڭگەنى قۇرادى. 200 كاسىپورىن مەن فەرمالاردا 230-دان استام تسيفرلىق جوبا ەنگىزىلۋدە.
بۇل تۇرعىدان «سامرۇق-قازىنا» ۇلتتىق ءال-اۋقات قورىنىڭ قۇرامىنا كىرەتىن كومپانيالار جاقسى ناتيجەلەرگە قول جەتكىزدى.
