بەلگيانىڭ ايەلدەر قۇراماسى فەدەراتسيا كۋبوگىندا 1963 جىلدان بەرى باق سىناسۋدا. سول ارالىقتا نەبارى ءتورت رەت قانا (1995, 2014, 2015, 2016) ەليتالىق ديۆيزيوندا ونەر كورسەتە العان جوق. ال قالعان جارىستاردىڭ بارلىعىندا ولار ۇزدىكسىز بوي كورسەتۋدە. بۇل رەتتە قول جەتكىزگەن تابىستارى دا ەلەۋلى. اتاپ ايتساق, 2001 جىلى بەلگيالىقتار باس جۇلدەنى ولجالادى. قۇرامىندا كيم كلەيستەرس, جيۋستين ەنەن, ەلس كاللەنس جانە لورانس كۋرتۋا سىندى مىقتىلارى بار اتالعان ەلدىڭ وكىلدەرى اقتىق سايىستا رەسەي كومانداسىنان 2:1 ەسەبىمەن باسىم ءتۇستى.
2006 جىلى دا بەلگيا تەننيسشىلەرىنىڭ فەدەراتسيا كۋبوگىن جەڭىپ الۋىنا تاماشا مۇمكىندىگى بولدى. بارلىق قارسىلاستارىن وڭاي ەڭسەرگەن ولار فينالدا يتاليامەن جولىقتى. بۇل باسەكە 3:2 ەسەبىمەن اپەننين تۇبەگىنەن كەلگەن ارۋلاردىڭ پايداسىنا شەشىلدى. سونىمەن قاتار بەلگيالىقتار توعىز رەت (1970, 1972, 1974, 1975, 1977, 1988, 1997, 2003, 2011) جارتىلاي فينالدا كۇش سىناستى.
بىلتىرعى جارىستا بەلگيا قۇراماسى ۇزدىك سەگىز كوماندانىڭ قاتارىنا قوسىلعانىمەن, الەمدىك توپتاعى ءتۋرنيردىڭ العاشقى اينالىمىندا فرانتسيانىڭ ارۋلارىنان ايلالارىن اسىرا المادى. ەسەپ – 1:3.
قازىرگى كەزدە «توپ-100» تەننيسشىنىڭ قاتارىنا اتالعان مەملەكەتتىڭ ءۇش وكىلى ەنىپ وتىر. سولاردىڭ اراسىنداعى ەڭ مىقتىسى – ەليزە مەرتەنس. بەلگيانىڭ ءبىرىنشى راكەتكاسى سانالاتىن 24 جاستاعى ەليزە 2018 جىلى اۋستراليانىڭ اشىق بىرىنشىلىگىنىڭ جارتىلاي فينالىنا شىقسا, 2019 جىلى اقش-تىڭ اشىق بىرىنشىلىگىندە ۇزدىك سەگىز ويىنشىنىڭ قاتارىنان كورىندى. WTA تۋرنيرلەرىندە بەس رەت جانە ITF جارىستارىندا 11 مارتە جەڭىمپاز اتاندى. وسى جارىستاردا تابىستى ونەر كورسەتكەنىنىڭ ارقاسىندا 6 ميلليون دوللار كولەمىندە تابىس تاپتى. قازىرگى كەزدە ول الەمدىك رەيتينگتە 14-ورىندى يەلەنۋدە. بىلتىر مەرتەنس اقش-تىڭ اشىق بىرىنشىلىگىنىڭ جۇپتىق سايىسىندا جەڭىمپاز اتاندى.
25 جاستاعى اليسون ۆان ەيتۆانك الەمدىك رەيتينگتە 47-ورىندا تۇر. ۆيلۆوردەنىڭ تۋماسىنىڭ ەڭ ۇزدىك كورسەتكىشى – 2015 جىلى رولان گارروستىڭ شيرەك فينالىنا دەيىن جەتۋى. WTA تۋرنيرلەرىندە ءتورت مارتە جانە ITF جارىستارىندا 12 رەت توپ جاردى.
بەلگيانىڭ ءۇشىنشى راكەتكاسى كيرستەن فليپكەنس – وتە تاجىريبەلى ويىنشى. 34 جاستاعى تەننيسشى 2013 جىلى ۋيمبلدوننىڭ جارتىلاي فينالىندا ونەر كورسەتىپ, «توپ-15» ويىنشىنىڭ قاتارىنا قوسىلعان. ولاردان بولەك, يسالين بوناۆانتيۋر (الەمنىڭ 115-راكەتكاسى), گرەتە ميننەنەن (الەمنىڭ 119-راكەتكاسى) جانە يانينا ۆيكمايەردى (الەمنىڭ 147-راكەتكاسى) اتاپ وتۋگە بولادى. ولار دا تالاي دۇرمەكتى كورگەن ساقا سپورتشىلار. مىنە, فەدەراتسيا كۋبوگى جولىنداعى جارىستاعى قازاقستان قۇراماسىنا قارسىلاس كوماندا اتانعان جايىندا قىسقاشا مالىمەتتەر وسىنداي.
ال اتالعان جارىستىڭ وزگە ىرىكتەۋ باسەكەلەرىندە مىنا كوماندالار ءوزارا شەبەرلىك بايقاسادى: اقش-لاتۆيا, نيدەرلاند-بەلارۋس, رۋمىنيا-رەسەي, برازيليا-گەرمانيا, يسپانيا-جاپونيا, شۆەيتساريا-كانادا جانە سلوۆاكيا- ۇلىبريتانيا.
