كەزدەسۋ بارىسىندا قازاقستاننىڭ تۇڭعىش پرەزيدەنتى ميحايل ءميشۋستيندى جاۋاپتى جانە ماڭىزدى لاۋازىمعا تاعايىندالۋىمەن قۇتتىقتادى.
– ءسىز بۇل قىزمەتكە وتە قيىن كەزەڭدە كەلىپ وتىرسىز. قازىر جاعداي وڭاي ەمەس. جاڭا لاۋازىمدا ءسىزدىڭ مول تاجىريبەڭىز پايدالى بولادى دەپ سەنەمىن. كەشە الماتىدا تسيفرلاندىرۋ جانە جاساندى ينتەللەكتىنى دامىتۋ ماسەلەلەرىن تالقىلادىڭىزدار, - دەدى ەلباسى.
نۇرسۇلتان نازارباەۆ قازاقستان تاۋەلسىزدىك العاننان بەرى رەسەي فەدەراتسياسىمەن تاتۋ كورشىلىك قارىم-قاتىناس ورناتقانىن اتاپ ءوتتى.
– مەن جۇمىس ىستەگەن جىلداردىڭ بارىندە قازاقستان مەن رەسەي اراسىنداعى ىنتىماقتاستىقتى نىعايتۋعا تىرىستىم. بۇگىنگى تاڭدا ءبىزدىڭ بايلانىستارىمىز ۇلگى ەتۋگە تۇرارلىق دەپ ەسەپتەيمىن. الداعى ۋاقىتتا دا وسىلاي بولعانىن قالايمىن, - دەدى قازاقستاننىڭ تۇڭعىش پرەزيدەنتى.
ءوز كەزەگىندە ميحايل ميشۋستين ەلباسىعا كەزدەسۋ ءۇشىن العىس ءبىلدىرىپ, رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ جىلى لەبىزدەرىن جەتكىزدى.
– مەن العاشقى شەتەلدىك ساپارىمدى قازاقستاننان باستادىم. ءبىزدىڭ قارىم-قاتىناسىمىز وتە جاقسى. وسى مۇمكىندىكتى پايدالانىپ, مەن رەسەي فەدەراتسياسى پرەزيدەنتىنىڭ ەڭ ىزگى تىلەكتەرىن جەتكىزگىم كەلەدى, - دەدى رەسەي فەدەراتسياسىنىڭ پرەمەر-ءمينيسترى.
كەزدەسۋ بارىسىندا تاراپتار ەۋرازيا ەكونوميكالىق وداعى اياسىنداعى ىنتىماقتاستىقتى دامىتۋدىڭ قازىرگى جاعدايى مەن پەرسپەكتيۆالارىن تالقىلادى. سونداي-اق, ينفراقۇرىلىمدى دامىتۋ جوبالارىن ىسكە اسىرۋ جانە قۇرلىق ەلدەرى اراسىنداعى ساۋدا قاتىناستارىن ودان ءارى نىعايتۋ ماسەلەلەرىنە توقتالدى.
