«Shymkent City» اۋماعىندا تۇرعىن ءۇي قۇرىلىسىن باستاعان كورەيالىق كومپانيا وكىلدەرى قالا باسشىسىنا اتقارىلىپ جاتقان جۇمىستار جايىن بايانداپ, تۇرعىن ءۇي كەشەنى بويىنشا جوبالارىمەن تانىستىرىپ ءوتتى.
ينۆەستيتسيا قۇنى - 1 ملرد. 350 ملن. اقش دوللارىن قۇرايتىن بۇل جوبا بويىنشا اتالعان قالاشىقتا كومپانيا 7 مىڭنان استام پاتەر بولاتىن تۇرعىن ءۇي كەشەنىن سالاتىن بولادى. بۇگىنگى كۇنگە تۇرعىن ۇيلەردىڭ جەر قازبا جۇمىستارى جۇرگىزىلۋدە.
شەتەلدىك ينۆەستورلارعا تۇرعىن ءۇي قۇرىلىسىن جۇرگىزۋدە ەشقانداي كەدەرگىنىڭ بولمايتىنىن ايتقان قالا باسشىسى تۇرعىن ءۇيدىڭ ساپاسىنان بولەك, ونىڭ سەيسميكالىق جاعدايعا دا ءتوزىمدى بولۋىن ەسكەرۋ قاجەت ەكەنىن ايتتى.
ايتا كەتەيىك, «Shymkent City» – مەگاپوليستىڭ سولتۇستىك ايماعىندا ورنالاسقان, 12 ورامنان تۇراتىن شاعىناۋدان. وندا تۇرعىن ءۇي مەن بيزنەس ورتالىقتارىنان بولەك, ساۋدا ورىندارى, ەمحانا, ويىن-ساۋىق ورتالىعى, گۇلزار مەن دەمالىس ايماعى بولادى دەپ جوسپارلانعان.
