«جالپى وتكەن جىلى 100-دەن اسا ءىرى جوبالار ىسكە اسىرىلدى. بۇل قاتاردا بەلگىلى ەتنوگراف, مۋزىكاتانۋ مەن كومپوزيتورلىق مەكتەپتىڭ نەگىزىن قالاۋشىلاردىڭ ءبىرى الەكساندر زاتاەۆيچ 150 جىلدىق مەرەيتويى, كسرو حالىق ءارتىسى بيبىگۇل تولەگەنوۆانىڭ 90 جىلدىعىنا ارنالعان جىل بويى «وپەراليا» حالىقارالىق فەستيۆالى اياسىندا بىرقاتار ءىس-شارالار, قازاقستاننىڭ حالىق جازۋشىسى ءابدىجامىل نۇرپەيىسوۆتىڭ 95 جىلدىق مەرەيتويىنا ارنالعان شىعارماشىلىق كونتسەرتى, تۇنعىش پرەزيدەنت كۇنىنە ارنالعان «ەلىن سۇيگەن, ەلى سۇيگەن ەلباسى» اتتى مەرەكەلىك كونتسەرت, قازاقستاننىڭ رەسەيدەگى مادەنيەت كۇندەرى, جاس ءانشى ەرجان ماكسيمنىڭ كونتسەرتى, «Voice of Nur-Sultan» ەسترادالىق ورىنداۋشىلاردىڭ حالىقارالىق فەستيۆالى, «بالا داۋىسى» ۇلتتىق بالالار ءان بايقاۋى ت.ب. بار. 2019 جىلى «التىن ادامنىڭ شەرۋى» جوباسى تاتارستان, وزبەكستان, مالايزيا, گرەكيا, تۇركيا, پولشادا ۇيىمداستىرىلسا, 2020-2021 جىلدارى ۇلىبريتانيا, جاپونيا, اقش, گرۋزيا, يتاليا, فرانتسيا, اۆستريا ەلدەرىندە وتەدى» دەدى نۇرعيسا داۋەشوۆ.
سونىمەن قاتار ۆيتسە-مينيستر بۇگىندە قازاقستاندىق ۇلتتىق ەلەكتروندىق كىتاپحاناسىنىڭ كونتەنتى 60 مىڭ داناعا جەتكەندىگىن ايتتى.
«سونداي-اق 2019 جىلى ەلەكتروندىق كىتاپحانا قىزمەتىن الەمنىڭ 115 ەلىنەن 200 مىڭعا جۋىق ادام پايدالانعان. ءال-ءفارابيدىڭ 1150 جىلدىعىن تويلاۋ قارساڭىندا عۇلاما ويشىلدىڭ ەڭبەكتەرى قازاق تىلىندە 7 توم, ورىس تىلىندە 7 توم جانە اعىلشىن تىلىندەگى اۋدارماسى ءبىر توم بولىپ باسىلىپ شىقتى. سونىمەن قاتار 2019 جىلى 144 اتالىم كىتاپ جالپى تارالىمى 647 500 مىڭ دانامەن رەسپۋبليكا كىتاپحانالارىنا قايتارىمسىز تاراتىلدى» دەدى ول.
