قوعامدىق دەنساۋلىق ساقتاۋ باسقارماسىنىڭ باسشىسى ساۋلە قيسىقوۆا ەلورداداعى دەنساۋلىق ساقتاۋ سالاسىنىڭ وتكەن جىلداعى كورسەتكىشتەرىنە وڭ باعا بەردى. «2018 جىلمەن سالىستىرعاندا اۋرۋشاڭدىق 9,3%-عا, جالپى ءولىم-ءجىتىم 2,5%-عا تومەندەدى. انا مەن بالا ءولىمىنىڭ ايتارلىقتاي تومەندەۋى بايقالادى, بالا تۋ كورسەتكىشى ارتتى. بۇعان قاتەرلى ىسىكتەر كەزىندە مەديتسينالىق كومەك كورسەتۋدىڭ ينتەگراتسيالانعان مودەلىن ەنگىزۋ سوڭعى كەزەكتە اسەر ەتكەن جوق. سونداي-اق سوزىلمالى اۋرۋلار كەزىندە ەمدەۋ مەن ءدارى-دارمەكپەن قامتاماسىز ەتۋ اتالمىش كورسەتكىشتەردىڭ ازايۋىنا سەبەپ بولدى. ناتيجەسىندە, تۋبەركۋلەزبەن اۋىرۋ 8,3%-عا, تۋبەركۋلەزدەن ءولىم-ءجىتىم 54%-عا ازايدى.
بالالار اراسىندا تۋبەركۋلەزبەن اۋرۋ 19%-عا تومەندەدى», دەدى ساۋلە قيسىقوۆا. بۇگىنگى تاڭدا نۇر-سۇلتان قالاسىندا باستاپقى سانيتارلىق-مەديتسينالىق كومەكتى كورسەتەتىن 31 ۇيىم جۇمىس اتقارادى. 2019 جىلى 12 «قولجەتىمدى دارىگەر» جوباسى, جانە «كوپبەيىندى مەديتسينالىق ورتالىعىندا» «ينسۋلت ورتالىعى» اشىلعان بولاتىن. 2018 جىلمەن سالىستىرعاندا ينسۋلت ورتالىقتارىندا ەمدەلگەن ادامداردىڭ كورسەتكىشى كوبەيگەن. قازاقستاندا اعىمداعى جىلدىڭ 1 قاڭتارىنان باستاپ مىندەتتى الەۋمەتتىك مەديتسينالىق ساقتاندىرۋ جۇيەسىن ەنگىزۋ القا وتىرىسىندا تالقىلانعان ماڭىزدى تاقىرىپتاردىڭ ءبىرى بولدى.
قوعامدىق دەنساۋلىق ساقتاۋ باسقارماسى باسشىسى ءمامس شەتەلدەردە كەڭىنەن قولدانىلاتىن وزىق تاجىريبە ەكەندىگىن, جۇيەنىڭ ءبىزدىڭ ەلدە دە جاقسى ناتيجە بەرەتىندىگىن اتاپ ءوتتى. ستاتيستيكالىق مالىمەتتەرگە سايكەس, 1 قاڭتاردا 1 162 878 استانالىق ەمحانالارعا تىركەلگەن. 2020 جىلى ءمامس اياسىندا 8,1 ملرد تەڭگە قاراستىرىلعان. وتىرىستا سونداي-اق ەلىمىزدىڭ دەنساۋلىق ساقتاۋ سالاسىن كەشەندى دامىتۋعا باعىتتالعان «دەنساۋلىق 2020-2025» باعدارلاماسى تالقىلاندى. قازاقستاندىقتاردىڭ دەنساۋلىعىن نىعايتۋ ماقساتىندا مەديتسينالىق مەكەمەلەر قىزمەتىنىڭ ناتيجەلەرىن جاقسارتۋ قاجەتتىلىگىمەن قاتار, اتالعان باعدارلامادا مەديتسينا قىزمەتكەرىنىڭ مارتەبەسىن ارتتىرۋعا جانە ماماندار ءۇشىن حالىقارالىق تالاپتار مەن ستاندارتتارعا سايكەس جاعدايلار جاساۋعا ۇلكەن كوڭىل بولىنەدى. ماتەريالدىق-تەحنيكالىق بازانى ۇنەمى جاڭارتۋمەن قاتار, مەديتسينا ۇيىمدارىنىڭ باسشىلارى كادر تاپشىلىعى ماسەلەسىن كوتەردى.
وتكەن جىلى دارىگەرلەر تاپشىلىعى 494 بىرلىكتى قۇرادى, ونىڭ ىشىندە ماماندىقتار بويىنشا: جالپى پراكتيكا دارىگەرلەرى – 107, پەدياترلار – 36, تەراپەۆتەر – 52, اكۋشەر-گينەكولوگتار – 42, انەستەزيولوگ-رەانيماتولوگتار – 41, كارديولوگتار – 16, پسيحياترلار – 3, ونكولوگتار – 16, نەوناتولوگتار – 28 جانە باسقالار. وسى ماسەلەنى شەشۋ ماقساتىندا 2019 جىلى ەلوردالىق دەنساۋلىق ساقتاۋ ۇيىمدارىنا 217 جاس مامان جۇمىسقا ورنالاستىرىلدى. مەديتسينا كادرلاردىڭ تاپشىلىعى 44%-عا تومەندەدى, ونىڭ ىشىندە جالپى پراكتيكا دارىگەرلەرى – 41%-عا, پەدياترلار – 36,1%-عا, تەراپەۆتەر – 42,3%-عا, اكۋشەر – گينەكولوگتار – 69%-عا, انەستەزيولوگ-رەانيماتولوگتار – 22%-عا, كارديولوگتار – 56,3%-عا, نەوناتولوگتار – 3,6%-عا تومەندەدى. باحتيار ماكەن وتىرىسقا قاتىسۋشىلاردى كادر تاپشىلىعى ماسەلەسىن قاراستىرىپ, مەديتسينالىق ۇيىمدارى باسشىلارىنىڭ وسى ماسەلەنى شەشۋگە اتسالىسۋ قاجەتتىگىن ەسكەرتتى.
«مەديتسينالىق ۇيىمداردىڭ باسشىلىعى بۇل ماسەلەگە بەي-جاي قاراماۋ قاجەت. ءبىز بىرلەسىپ مەديتسينالىق مەكەمەلەرگە جاس مامانداردى تارتۋدىڭ جۇيەلى مەحانيزمدەرى مەن ادىستەرىن شەشۋىمىز ءتيىس», دەدى ول. ءسوز سوڭىندا اكىم ورىنباسارى بارلىق مەديتسينا قىزمەتكەرلەرىنە حالىقپەن كەرى بايلانىس جاساپ, ساپالى قىزمەت كورسەتۋدى تاپسىردى.
