رۋحانيات • 30 قاڭتار، 2020

«تۋعان جەر» باعدارلاماسى اياسىندا 825 جاڭا نىسان سالىندى

67 رەتكورسەتىلدى

بۇل باستاما اياسىندا قولعا الىنعان جوبا قازاقستاندىقتاردى تۋعان ولكەسىن دامىتۋعا تارتۋدى، جەرگىلىكتى جەرلەردەگى الەۋمەتتىك ماسەلەلەردى شەشۋدە مەملەكەت پەن ازاماتتىق قوعامدى جۇمىلدىرۋدى ماقسات ەتەدى. بۇل تۋرالى پرەمەر-ءمينيستردىڭ رەسمي اقپاراتتىق رەسۋرسى حابارلادى.

ول قازىرگى تاڭدا ەكى باعىت بويىنشا جۇزەگە اسىرىلىپ جاتىر: ولكەتانۋلىق قىزمەت جانە مەتسەناتتىقتى دامىتۋ. 

2019 جىلى «تۋعان جەر» باعدارلاماسى اياسىندا رەسپۋبليكا دەڭگەيىندە 12 مىڭنان اسا ءىس-شارا وتكىزىلدى. وسى ماقساتتا جالپى كولەمى 62 ملرد تەڭگەدەن استام قاراجات قاراستىرىلعان بولاتىن. سونىڭ ىشىندە 14 ملرد تەڭگە مەملەكەتتىك بيۋدجەتتەن جۇمسالسا، قالعان 48 ملرد تەڭگە دەمەۋشىلەر مەن مەتسەناتتار قاراجاتى ەسەبىنەن تارتىلدى.

جالپى، 2017-2019 جىلدارى ەلىمىز بويىنشا 11 173 مەتسەنات جانە 274 ملرد تەڭگە كولەمىندە قاراجات تارتىلعان. سونىمەن قاتار 2019 جىلى 825 جاڭا نىسان سالىندى جانە 547 نىسان جاڭارتىلدى.

مەتسەناتتاردىڭ قولداۋىمەن مەكتەپتەر، بالاباقشالار، اۋرۋحانالار، ەمحانالار، مادەنيەت ۇيلەرى، سپورت نىساندارى ت.ب. سالىنعان جانە جوندەۋدەن وتكىزىلگەن.

ماسەلەن، قىركۇيەك ايىندا قوستاناي وبلىسىندا مەتسەناتتاردىڭ اتسالىسۋىمەن مەكتەپ وقۋشىلارىنىڭ جاڭا زاماناۋي تەحنولوگيالاردى ەركىن يگەرۋى ءۇشىن 3 IT-تەحنولوگيا جانە روبوتوتەحنيكا كابينەتى جاساقتالدى.

قاراعاندى وبلىسى ستەپنوە اۋىلىندا مادەنيەت ءۇيىنىڭ عيماراتى  دەمەۋشىلەر ەسەبىنەن جوندەۋدەن وتكىزىلىپ، پايدالانۋعا بەرىلدى.

اقمولا وبلىسىندا «نۇر استىق» جشس ەسەبىنەن مىقتىكول اۋىلدىق مەكتەبىنىڭ عيماراتى جوندەۋدەن وتكىزىلدى. 

سولتۇستىك قازاقستان وبلىسىندا «دايىندىق اگرو» جشس-نىڭ دەمەۋشىلىك كومەگىمەن دايىندىق اۋىلىنىڭ جولدارى 60 ملن تەڭگەگە جوندەۋدەن وتكىزىلدى.

اقتوبە وبلىسىنىڭ تەمىر اۋدانىندا ء«سات» شارۋا قوجالىعى باسشىسىنىڭ قولداۋىمەن بىرلىك اۋىلىندا كوپىر سالىندى. الماتى قالاسىندا دەمەۋشىلەر مەن مەتسەناتتار قاراجاتى ەسەبىنەن 1200 ورىنعا ارنالعان مەكتەپ، 500 ادامعا ارنالعان ەمحانا، «جارىس ارەنا» كەشەنى سالىندى. ورتالىق مادەنيەت جانە دەمالىس ساياباعىن جوندەۋ جۇمىستارى اياقتالدى.

قىزىلوردا وبلىسىندا دەمەۋشىلەر مەن مەتسەناتتار قاراجاتى ەسەبىنەن:  شيەلى اۋدانىندا سپورتتىق-ساۋىقتىرۋ كەشەنى قۇرىلىسىنا قولداۋ كورسەتىلدى; اقۇيەك جانە وزگەنت اۋىلدىق وكرۋگتەرىندە مەديتسينالىق امبۋلاتوريالار قولدانىسقا بەرىلدى; قارماقشى اۋدانىنىڭ داۋىلكول اۋىلدىق وكرۋگىندە 80 ورىنعا ارنالعان بالاباقشا سالىندى.

ماڭعىستاۋ وبلىسىندا دەمەۋشىلەر مەن مەتسەناتتار قاراجاتى ەسەبىنەن 500 ورىنعا ارنالعان مادەنيەت ءۇيى، 12 سپورت كەشەنى مەن 39 بالالار ويىن الاڭى سالىندى.

«ولكەتانۋلىق قىزمەت» باعىتى بويىنشا تۋعان ولكەنىڭ تاريحىن، تابيعاتىن، مادەنيەتىن وسكەلەڭ ۇرپاقتىڭ ساناسىنا ءسىڭىرۋ ماقساتىمەن 5-7 سىنىپتاردىڭ مەكتەپ باعدارلاماسىنا «ولكەتانۋ» وقۋ كۋرسى ەنگىزىلدى. جالپى ءبىلىم بەرەتىن ورتا مەكتەپتەردە 1670 مەكتەپ مۋزەيى ، 2179 ولكەتانۋ ۇيىرمەسى جۇمىس ىستەيدى. ولاردىڭ جۇمىسىنا 46،9 مىڭ بالا، 93 وقۋشىلار سارايى، 4 جاس ناتۋراليست سارايى، 18 اۋلا كلۋبى تارتىلعان. 3 جىل ىشىندە (2017-2019 جىلدارى) 1 ملن استام وقۋشى قامتىلدى.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار