- 2020 جىلعى 11 قاڭتاردان باستاپ «قىلمىستىق, قىلمىستىق-پروتسەستىك زاڭنامالاردى جەتىلدىرۋ جانە ادامنىڭ قۇقىقتارىن كۇشەيتۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» جاڭا زاڭ كۇشىنە ەندى. بۇل زاڭ العاش رەت جاڭاقالا اۋدانىندا قولدانىلدى, - دەيدى باتىس قازاقستان وبلىسى پروكۋرورىنىڭ اعا كومەكشىسى باۋىرجان احمەتجان.
جاڭاقالا اۋداندىق پروكۋراتۋراسى كولىك جۇرگىزۋ قۇقىعى بولماسا دا ونى ماس كۇيىندە باسقارىپ, جول-كولىك اپاتىن جاساعان ت. دەگەن ازاماتتى تەرگەۋ كەزىندە 2 ايعا قاماۋ تۋرالى تەرگەۋشىنىڭ سانكتسياسىن قولداعان. ءسويتىپ, سوت شەشىمىمەن جۇگەنسىز جۇرگىزۋشى قاماۋعا الىنىپتى.
بقو پروكۋراتۋراسى ۇسىنعان مالىمەتكە قاراعاندا, جاڭاقالالىق جۇرگىزۋشى بۇدان بۇرىن دا تالاي مارتە كوزگە تۇسكەن: 2014 جىلعى 28 تامىزدا «كولىك قۇرالىن ماساڭ كۇيدە باسقارعانى» ءۇشىن كىنالى دەپ تانىلىپ, 5 جىلعا كولىك قۇرالىن باسقارۋ قۇقىعىنان ايرىلعان. 2018 جىلعى 16 قىركۇيەكتە ول تاعى دا ماس كۇيىندە جول-كولىك وقيعاسىن جاساپ, سول ءۇشىن سوتتىڭ ۇكىمىمەن 3 جىلعا كولىك قۇرالىن باسقارۋ قۇقىعىنان ايىرىلىپ, 100 ساعاتقا قوعامدىق جۇمىستارعا تارتىلعان. الايدا, بۇل وقيعالاردان قورىتىندى شىعارماپتى.
«2020 جىلدىڭ 18 قاڭتارىندا جاڭاقالا-سايحىن تاس جولىندا ت. جول ءجۇرۋ ەرەجەسىن بۇزىپ, اۆتوكولىگىمەن جولدىڭ قارسى بەتىنە شىعىپ, ازامات ا.-نىڭ باسقارۋىنداعى اۆتوكولىكپەن سوقتىعىسىپ, ونى ءبۇلدىرىپ, ماتەريالدىق شىعىن كەلتىرىلگەن» دەلىنگەن سوڭعى دەرەكتە.
قازىر بۇل فاكتى بويىنشا تەرگەۋ ارەكەتى ءجۇرىپ جاتىر.
ايتا كەتەيىك, قىلمىستىق كودەكسكە وزگەرىس ەنگىزىلمەي تۇرىپ مۇنداي قىلمىسكەردى قامالمايتىن, سەبەبى مۇنداي قىلمىستاردىڭ ساناتى «قىلمىستىق تەرىس قىلىق» دەپ ەسەپتەلگەن. ال ەندى وزگەرىستەردەن كەيىن بۇل «اۋىر قىلمىس» دەپ دارەجەلەنەدى. جانە كىنالى تۇلعا كولىك قۇرالىن باسقارۋ قۇقىعىنان ءومىر بويىنا ايىرىلادى.
باتىس قازاقستان
