بۇل تۋرالى كينولوگيالىق قىزمەت ورتالىعى باستىعىنىڭ مىندەتىن اتقارۋشى, پوليتسيا كاپيتانى الەكساندر انوحين بىلاي دەيدى: «كوپ جاعدايدا قىزمەتتىك-ىزدەستىرۋ يتتەرى م ۇلىكتىك قىلمىستاردى اشۋعا كومەكتەسەدى. وتكەن جىلى جەدەل-ىزدەستىرۋ ءىس-شارالارى اياسىندا قىزمەتتىك-ىزدەستىرۋ يتتەرى 1359 رەت قولدانىلدى. ولاردىڭ كومەگىمەن 869 قىلمىس, ونىڭ ىشىندە 480 ۇرلىق, 28 توناۋ, 5 قاراقشىلىق اشىلدى».
قىزمەتتىك يتتەردىڭ تورتەۋى ءىز كەسۋمەن, تاعى تورتەۋى جارىلعىش زاتتاردى تابۋعا ۇيرەتىلگەن ەكەن. ەسىرتكى ىزدەستىرۋگە بەسەۋى «ماماندانعان», قالعاندارى ءيىس بويىنشا ىزدەپ تابۋعا ماشىقتاندىرىلعان.
2019 جىلى سقو-دا ەسىرتكى بيزنەسىنە قارسى ءىس-قيمىل جانە ناشاقورلىقتىڭ الدىن الۋ جونىندەگى ۆەدومستۆوارالىق باعدارلاماسىنىڭ شەڭبەرىندە قىزمەتتىك يتتەردى سينتەتيكالىق ەسىرتكىلەردى ىزدەۋگە ۇيرەتۋ قولعا الىندى. سولاردىڭ ءبىرى «بەللا» اتتى لابرادور وتكەن جىلى «سپايس» اتتى جاساندى ەسىرتكى جاساۋشى مەن تاراتۋشىنى ۇستاۋعا كومەكتەسىپ, ىزشىلدەرگە ۇلكەن پايدا كورسەتكەن. ول ىشكى ىستەر ورگاندارىنا ەكى جىل بۇرىن اكەلىنىپ, بارلىعى 150 رەت ساپارجايلار مەن «قازپوشتا» بولىمشەلەرىندەگى كەزەكشىلىككە, جەدەل-ىزدەستىرۋ ءىس-شارالارىنا تارتىلىپتى. سونىڭ ىشىندە ول 10 ەسىرتكى قىلمىسىن اشۋعا جاردەم بەرگەن. پەتروپاۆل قالاسىنداعى جەر ۇيلەردىڭ بىرىندە اسا ءىرى مولشەردە جاسىرىنىلعان ءۇش تۇيىنشەك گەرويندى دا يىسپەن تاپقان سول. «جەر ۇيدە جۇرگىزىلەتىن ىزدەستىرۋ جۇمىسىنىڭ وزىندىك ەرەكشەلىكتەرى بار. باستى قيىندىق ۇيدەگى جانۋارلاردىڭ ءيىسى بولادى, ولار ءيىس الۋعا كەدەرگى كەلتىرەدى. اتالعان ۇيدەن بۇدان باسقا الكوگولدىڭ ءيىسى دە شىعىپ تۇرعان. سوعان قاراماي بەللا مىندەتىن ويداعىداي اتقاردى, ۇيرەنگەن داعدىلارى ءوز ناتيجەسىن بەردى», دەيدى بەللامەن جۇمىس ىستەيتىن پوليتسيا لەيتەنانتى بولات بەكماعامبەتوۆ.
جالپى ايتقاندا, 2019 جىلى قىزمەتتىك-ىزدەستىرۋ يتتەرى 22 ەسىرتكى قىلمىسىن اشۋعا كومەكتەسكەن. ولاردىڭ قاتىسۋىمەن 80 كگ ەسىرتكى زاتى, ونىڭ ىشىندە 4,09 گر گەروين, 6,02 گر سينتەتيكالىق ەسىرتكى الىنعان.
سولتۇستىك قازاقستان وبلىسى
