ء«وز بوستاندىعىڭدى باعالا» دەپ اتالعان اكتسياعا وبلىستاعى مەملەكەتتىك ورگانداردىڭ 25 باسشىسى قاتىسقان.
ءىس-شارا بارىسىندا قازاقستان رەسپۋبليكاسى ىشكى ىستەر مينيسترلىگى قىلمىستىق اتقارۋ جۇيەسىنە قاراستى رۋ-170/1 مەكەمەسىنىڭ قىزمەتكەرلەرى قاماۋداعىلاردىڭ مەكەنجايىن, تۇرمىس-جاعدايىن كورسەتتى. حالىق اراسىندا «تۇرمە» دەپ اتالاتىن ارنايى مەكەمەلەردىڭ تار دالىزدەرى, قىلمىسكەرلەردىڭ سەرۋەندەۋ الاڭدارى, تەرگەۋ-ورنالاستىرۋ ورىندارى ورنالاسقان كامەرالار كەلۋشىلەرگە ەرەكشە اسەر ەتكەنى انىق.
- بۇل اكتسيا مەملەكەتتىك قىزمەتكەرلەردىڭ سىبايلاس جەمقورلىققا قارسى يممۋنيتەتىن ارتتىرۋعا باعىتتالعان. ولار سوتتالعانداردى بۇگىنگى ءحالىن ءوز كوزىمەن كورىپ, سىبايلاس جەمقورلىققا اپاراتىن قۇقىق بۇزۋشىلىقتىڭ سالدارى قانداي بولاتىنىن سەزىنۋى قاجەت» دەلىنگەن سىبايلاس جەمقورلىققا قارسى قىزمەت دەپارتامەنتى تاراتقان ءباسپاسوز پاراعىندا.
«تۇرمە تۋرالى تۇسىرىلگەن تالاي فيلم بار, ول جايىندا ايتىلاتىن اڭگىمە دە كوپ. بىراق ءوز كوزىڭمەن كورگەننىڭ اسەرى بولەك ەكەن» دەيدى اتى-ءجونىن ايتۋدى قالاماعان مەملەكەتتىك مەكەمە باسشىلارىنىڭ ءبىرى.
«بۇل اكتسيا بولاشاقتا دا تۇراقتى ءوتىپ تۇرادى» دەيدى سىبايلاس جەمقورلىققا قارسى قىزمەت دەپارتامەنتى وكىلدەرى.
