سىرتقى ىستەر مينيسترلىگىنىڭ مالىمەتى بويىنشا, بۇگىندە ۋحان قالاسىندا 98 قازاقستاندىق ستۋدەنت بار. جانداربەك بەكشين ولاردىڭ 61-ءى ارنايى بورتپەن ەلگە جەتكىزىلەتىنىن جانە ولار ەكى اپتا بويى كارانتيندىك ستاتسيونارعا ورنالاستىرىلاتىنىن ايتتى. «پرەمەر-ءمينيستردىڭ كەڭسەسىندە وتكەن بريفينگتە ءبىزدىڭ ۇكىمەت قىتاي حالىق رەسپۋبليكاسى ۇكىمەتىنە ۋحاننان 61 ستۋدەنتتى الىپ كەلۋدى ۇيىمداستىرۋعا نيەتىن ءبىلدىردى. قىتايعا ارنايى بورتپەن باراتىن ءبىزدىڭ دارىگەرلەر قورعانىس كوستيۋمدەرىمەن, ماسكالارمەن جابدىقتالادى. بورت كەلگەننەن كەيىن دە دەزينفەكتسيادان وتەدى. ستۋدەنتتەر 14 كۇندىك كارانتيندىك ستاتسيونارعا ورنالاستىرىلادى. قازىر قىتاي تاراپىنان ءبىزدىڭ ۇشاقتىڭ ۇشۋى تۋرالى كەلىسىم كۇتۋدەمىز. تۋريستەر مەن ءىسساپاردا جۇرگەندەردى قايتارۋىمىز كەرەك. سوندىقتان قازىرگى تاڭدا شەكارانى جابۋ مۇمكىن ەمەس», دەدى ول.
باس سانيتارلىق دارىگەردىڭ ايتۋىنشا, ەلىمىزدە ماسكالار, ارنايى كوستيۋمدەر, دارىلەر بارلىعى جەتكىلىكتى. سونداي-اق وتاندىق وندىرۋشىلەرگە داكە تاڭعىشتارىن جاپپاي وندىرۋگە تاپسىرىس تا بەرىلگەن.
سونداي-اق ول كوروناۆيرۋستىڭ العاشقى بەلگىلەرى جەدەل رەسپيراتورلىق ۆيرۋستىق ينفەكتسيامەن (جرۆي/ورۆي) جانە تۇماۋمەن ۇقساس بولاتىنىن اتاپ ءوتتى. «جاڭا ۆيرۋستىڭ تارالۋى بىزدە جىل سايىن بولاتىن ماۋسىمدىق جەدەل رەسپيراتورلىق-ۆيرۋستىق ينفەكتسيانىڭ, تۇماۋدىڭ ءورشۋ كەزەڭىمەن تۇسپا-تۇس كەلىپ وتىر. ۇشەۋىنىڭ دە العاشقى بەلگىلەرى بىردەي. بۇگىن ساعات 11-دەگى اقپارات بويىنشا, ەلىمىزدە 4 ناۋقاس اۋرۋحاناعا جاتقىزىلدى. الماتى قالاسىنداعى ەكى ناۋقاس مەديتسينالىق كومەك العاننان كەيىن, ۇيلەرىنە قايتتى. اتىراۋ وبلىسى قىزىلقوعا اۋدانىنداعى ءبىر ناۋقاس تا ورۆي دياگنوزى بويىنشا ەم قابىلداۋدا. بۇگىن تاڭەرتەڭ نۇر-سۇلتانعا بەيجىڭ قالاسىنان كەلگەن 16 جاستاعى وقۋشى بالالار ينفەكتسياسى اۋرۋحاناسىنا جاتقىزىلدى. وعان دا ءبىزدىڭ ينفەكتسيونيست كەڭەسشىلەر وسى دياگنوزدى قويدى. تۇستەن كەيىن حايناندا دەمالىستا بولعان اقمولالىق ءبىر وتباسى كەلدى. ەكى بالاسىنىڭ قىزۋىنىڭ كوتەرىلۋىنە بايلانىستى بارلىق وتباسى اۋرۋحاناعا جاتقىزىلدى», دەدى ج.بەكشين.
دەنساۋلىق ساقتاۋ مينيسترلىگى 6 قاڭتاردان باستاپ قىتايدان كەلگەن بارلىق شەتەلدىك ازاماتتارمەن بايلانىس ورناتقان. ولارمەن جەرگىلىكتى مەديتسينا قىزمەتكەرلەرى تىكەلەي بايلانىستا. وسىنى ايتقان جانداربەك بەكشين قىتايدان كەلگەن بارلىق كىسىلەردىڭ ەمحانالارعا وزدىگىنەن بارىپ ەسەپكە تۇرۋى كەرەك ەكەنىن جەتكىزدى.
سونداي-اق ول اۋرۋ بەلگىلەرى بايقالعان كىسىلەردىڭ قان سىنامالارى بىردەن ارنايى زەرتحاناعا جىبەرىلىپ, ءۇش كۇن ىشىندە انىقتالاتىنىن اتاپ ءوتتى. «انىقتاۋ قيىنعا سوققان جاعدايدا ءوزىمىزدىڭ الگوريتمىمىز بويىنشا دۇنيەجۇزىلىك دەنساۋلىق ساقتاۋ ۇيىمىنىڭ بەكىتىلگەن زەرتحاناسىنا سىنامالاردى جىبەرەمىز. بۇگىندە بيوتەحنولوگيا عالىمدارىمەن بىرلەسىپ, ەلىمىز بويىنشا الماتى مەن نۇر-سۇلتان قالالارىندا وتاندىق ارنايى دياگنوستيكا ورتالىعى جاساقتالۋدا. سونداي-اق ءبىز رەسەي فەدەراتسياسىنداعى ارىپتەستەرمەن كەلىسىمگە كەلدىك. كەرەك كەزدە سىنامالاردى ماسكەۋگە جانە ءنوۆوسىبىر قالاسىنا جىبەرەمىز. 30 قاڭتارعا دەيىن ءوزىمىزدىڭ دياگنوستيكالىق زاتتاردى ازىرلەپ شىعۋعا مۇمكىندىگىمىز بار. ءبىز الدىن الۋ شارالارىنىڭ بارلىعىن جۇرگىزىپ جاتىرمىز», دەدى ج.بەكشين.
