قوعام • 28 قاڭتار، 2020

نۇر-سۇلتاندا توتەنشە جاعدايلار رەجيمى اياسىندا قولعا الىنعان شارالار باياندالدى

8 رەتكورسەتىلدى

اۋا رايىنىڭ كۇرت وزگەرۋىنە بايلانىستى نۇر-سۇلتان قالاسىندا توتەنشە جاعداي رەجيمى ەنگىزىلدى. بۇل ورايدا قالانىڭ قۇتقارۋ قىزمەتتەرى ەلوردا تۇرعىندارىنا قاۋىپسىزدىك شارالارىن ساقتاۋدى ەسكەرتەدى، دەپ حابارلادى قالا اكىمدىگىنىڭ رەسمي سايتى.

بۇگىن نۇر-سۇلتان قالاسىنىڭ اكىمدىگىندە وتكەن ءباسپاسوز ءماسليحاتىندا كۇن رايىنىڭ كۇرت وزگەرۋىنە بايلانىستى اتقارىلىپ جاتقان جۇمىستار بايان ەتىلدى. قازىرگى تاڭدا ەل استاناسىندا اۋا رايىنىڭ قولايسىزدىعىنا بايلانىستى تاس جولدار جابىلىپ، اۋە رەيستەرىنىڭ ۇشۋىنا شەك قويىلدى، 0-11-سىنىپ وقۋشىلارى مەن كوللەدجدىڭ بارلىق كۋرس ستۋدەنتتەرىنە ساباق توقتاتىلدى.

سونداي-اق زارداپ شەككەن تۇرعىندارعا كومەك كورسەتۋ ماقساتىندا قۇتقارۋشىلار توبىنان جاساقتالعان جەدەل شتاب قۇرىلىپ، ءۇش قاۋىرت جەلى (24-52-12، 24-51-47، 24-51-71) ىسكە قوسىلدى. قالالىق توتەنشە جاعدايلار دەپارتامەنتىنىڭ باسشىسى باۋىرجان سىزدىقوۆتىڭ ايتۋىنشا، بۇگىندە قار قۇرساۋىنان 645 ادام قۇتقارىلىپ، 133 كولىك شىعارىلدى.

«23 قاڭتاردان باستاپ بۇگىنگە دەيىن ازاماتتىق قورعاۋدىڭ بارلىق جۇيەلەرىنىڭ كومەگىمەن 645 ادام قۇتقارىلدى. ءبىر قۋانارىمىز، قازا بولعان ادام جوق. بۇل ۇلكەن جەتىستىك. سونداي-اق اقمولا وبلىسىنا قاراستى ەلدى مەكەندەرىنىڭ تۇرعىندارىنا كومەك كورسەتۋ ءۇشىن 32 شاقىرۋدى جۇزەگە اسىردى، وندا 426 ادام، ونىڭ ىشىندە 5 جۇكتى ايەل مەن 36 بالا قۇتقارىلدى. تاۋلىك بويى بارلىق جۇيە جۇمىس ىستەدى. توتەنشە جاعداي رەجيمىن ەنگىزگەننەن كەيىن نۇر-سۇلتان قالاسى اۋماعىندا تج الدىن الۋ جانە جويۋ بويىنشا مەملەكەتتىك جۇيە جۇمىس ىستەيدى»، - دەدى ول.

ەلوردا اكىمدىگىمەن تج كەزىندە زارداپ شەككەندەردى ورنالاستىرۋ ءۇشىن 4 قوناق ءۇي دايىندالدى، اتاپ ايتقاندا «جىگەر»، ء«ال قۋات»، «نۇرعاليەۆ» جك جانە «ايۋ» حوستەلى. قوناقۇيلەردىڭ جالپى سانى 1000 ورىن. اۋدان اكىمدىكتەرىمەن بىرلەسىپ 11 ۋوپ (ۋاقىتشا ورنالاستىرۋ پۋنكتتەرى) دايىندالدى. بۇگىن ۋوپ-قا 6 ادام ورنالاستىرىلدى. سونداي-اق قالا بويىنشا 70 جەدەل مەديتسينالىق جاردەم بريگاداسى جۇمىس ىستەيدى، ونىڭ ىشىندە 10 دارىگەرلىك جانە 60 فەلدشەرلىك بريگادا بار. قازىرگى ۋاقىتتا 8 فەلدشەرلىك بريگادا (قوسىمشا بريگادا) جۇمىس ىستەيدى. سونىمەن قاتار، تجد باسشىسى اۋا رايىنا بايلانىستى جۇمىسىنا جەتە الماي قالعان تۇرعىندارعا «قازگيدرومەت» رمك ارنايى انىقتاما بەرە الاتىندىعىن اتاپ ءوتتى.

«بۇگىننەن باستاپ ەلوردادا توتەنشە جاعداي رەجيمى ەنگىزىلگەنىن ۇمىتپاۋىمىز كەرەك. مۇنداي جاعدايدا «قازگيدرومەت» رمك-دا ازاماتتارعا اۋا رايىنىڭ قيىندىعىنا بايلانىستى جۇمىسىنا جەتە الماي قالعانى جونىندە ارنايى انىقتاما بەرەتىن قىزمەتى بار. كەز كەلگەن قالا تۇرعىنى بۇل انىقتامانى الىپ، باسشىلىعىنا وتكىزە الادى. تج رەجيمى ەنگىزىلگەن جاعدايدا ازامات ءوز ەركىمەن جۇمىسقا شىعا المايدى، بۇل رەتتە مۇنداي شەشىمدى تج جويۋ باسشىسى قابىلدايدى. بۇعان زاڭدى نەگىز بار»، - دەيدى باۋىرجان سىزدىقوۆ.

«قازگيدرومەت» رمك اۋا رايىن قىسقا مەرزىمگە بولجاۋ باسقارماسىنىڭ باسشىسى الۋا ساحانوۆانىڭ ايتۋىنشا، 27 قاڭتاردا جاۋىن-شاشىننىڭ مولشەرى ايلىق نورمادان ءۇش ەسە ارتىق تۇسكەن.

«ال 28 قاڭتاردا قالا اۋماعىندا كۇن بۇلتتى، قار جاۋىپ، بوران سوعادى، وڭتۇستىك-باتىستان، باتىستان 9-14 م/س جەل سوعادى. اۋا تەمپەراتۋراسى تۇندە -18-20°س جانە كۇندىز -8-10°س بولادى»، - دەيدى الۋا ساحانوۆا.

ايتا كەتسەك، «112» شۇعىل تەلەفون قىزمەتىنە 23 قاڭتاردان باستاپ 25 623 قوڭىراۋ كەلىپ ءتۇستى، ونىڭ ىشىندە 6290 قوڭىراۋ (75%) تاس جولداردىڭ اشىلۋى/جابىلۋى، اۆتوجولداردىڭ جاي-كۇيى تۋرالى بولدى. ودان بولەك، قالا ىشىندە جانە تاسجولدا تج دەپارتامەنتتەرى 74 باعىتتا پاترۋلدەۋ ۇيىمداستىردى. ولار ارنايى تەحنيكانىڭ كوشەلەردى جىلدام تازارتۋىنا كومەكتەسەدى.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار