ايماقتار • 28 قاڭتار، 2020

تارازدا تاعى دا 80 پاتەرلى ءۇي پايدالانۋعا بەرىلدى

105 رەتكورسەتىلدى

بۇگىندە مەملەكەت باسشىسى قاسىم-جومارت توقاەۆتىڭ حالىقتى تۇرعىن ۇيمەن قامتاماسىز ەتۋ تۋرالى تاپسىرماسى جامبىل وبلىسىندا جۇيەلى جۇزەگە اسىپ كەلەدى. جىل باسىنان بەرى تارازدىق تۇرعىندار ۇزدىكسىز قونىس تويىن تويلاۋدا.

تاراز قالاسىندا «نۇرلى  جەر» باعدارلاماسى اياسىندا جاڭا سالىنعان 15-شاعىن اۋداننان تاعى دا 80 پاتەرلى تۇرعىن ءۇي پايدالانۋعا بەرىلدى. 5 قاباتتى تۇرعىن ۇيدەگى پاتەرلەردى نەگىزىنەن حالىقتىڭ الەۋمەتتىك جاعىنان وسال توپتارى يەلەندى. ولار تۇرعىن ءۇي كەزەگىندە كوپ جىلدان بەرى تۇرعان بالالار ءۇيىنىڭ تۇلەكتەرى، جەتىمدەر جانە 29 جاسقا دەيىنگى قامقورلىقسىز قالعاندار، الەۋمەتتىك وسال توپتارعا جاتاتىن ازاماتتار، بيۋدجەتتىك ۇيىمدار قىزمەتكەرلەرى، مەملەكەتتىك قىزمەتشىلەر مەن اسكەري سالانىڭ ماماندارى. تۇرعىن ءۇي ارەندالىق، ساتىپ الۋ قۇقىعىنسىز جالعا بەرىلىپ وتىر.

اتالعان شاعىن اۋدانداعى القاپتا كەلەشەكتە 280  كوپپاتەرلى جانە 969 جەكە  تۇرعىن ءۇي سالىنادى دەپ جوسپارلانۋدا. بۇعان دەيىن مۇندا 26 كوپقاباتتى  تۇرعىن ءۇي ەل يگىلىگىنە بەرىلسە، اعىمداعى جىلى تاعى 35 ءۇيدىڭ قۇرىلىسى باستالادى دەپ كۇتىلۋدە. سونداي-اق كوپبالالى وتباسىلارعا ارنالعان «باقىتتى وتباسى» باعدارلاماسى بويىنشا  وتكەن جىلى 323 پاتەر بەرىلگەن بولاتىن. جەرگىلىكتى بيۋدجەتتەن بولىنگەن 1 ميلليارد 360 ميلليون تەڭگەگە  قايتالاما نارىقتان  144 پاتەر ساتىپ الىنعان. تاعى ءبىر ايتا كەتەرلىگى، وبلىس بويىنشا باسپاناعا مۇقتاج از قامتىلعان جانە كوپبالالى وتباسىن تۇرعىن ۇيمەن قامتاماسىز ەتۋ ماقساتىندا وسى ۋاقىتقا دەيىن 8 كوپپاتەرلى جاتاقحانا پايدالانۋعا بەرىلسە، وسى ماقساتتا تاعى 4 جاتاقحانانىڭ قۇرىلىسى جۇرگىزىلۋدە. ول جاتاقحانالاردىڭ ىشكى قۇرىلىسى ەكى بولمەلى پاتەرلەردەن تۇرادى. ءبىر پاتەردىڭ جالپى اۋدانى 35-40 شارشى مەتردى قۇرايدى. جالپى، بۇگىنگى تاڭدا تۇرعىن ءۇي كەزەگىندە 18565 ادام تۇرعان بولسا، ونىڭ ىشىندە 1784 كوپبالالى وتباسى جانە 8593 الەۋمەتتىك وسال توپتارعا جاتاتىن ازاماتتار بار.

 

جامبىل وبلىسى

سوڭعى جاڭالىقتار

ەسىك نەگە «تەسىك»؟

قوعام • كەشە

ۇقساس جاڭالىقتار