ايماقتار • 28 قاڭتار، 2020

اقتوبەدە ءبىر ميلليون شارشى مەتر تۇرعىن ءۇي سالىندى

26 رەتكورسەتىلدى

اقتوبە وبلىسىنىڭ الەۋمەتتىك-ەكونوميكالىق دامۋ قارقىنى جوعارىلاپ كەلەدى. سوڭعى كەزدەرى وڭىردە بەس پايىزدىق كولەمدەگى ەكونوميكالىق ءوسىم تۇراقتى تۇردە ساقتالىپ ءجۇر. ءوز كەزەگىندە بۇل جەتىستىك رەسپۋبليكالىق دەڭگەيدەن جوعارى، ال ەل وڭىرلەرى اراسىندا ەڭ الدىڭعى كورسەتكىش ەكەنىن ايتقان ءجون. بۇل جاعىمدى ءجايت قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ: اقتوبە تۇتاستاي ەل ەكونوميكاسىن العا تارتا الاتىن لوكوموتيۆ ءرولىن اتقارا الادى دەگەن ءسوزى تەكتەن-تەككە ايتىلماعانىن ايعاقتايدى.

وتكەن جىلدىڭ قورىتىندىسى بويىنشا وبلىستا الەۋمەتتىك-ەكونوميكالىق دەڭگەيدىڭ بارلىق سالاسىندا ءوسۋ ديناميكاسى قامتاماسىز ەتىلدى. ال وتكەن 2019 جىلى وبلىستا ءبىر ميلليون شارشى مەتر تۇرعىن ءۇي پايدالانۋعا بەرىلگەنى بولەك ءبىر اڭگىمەنىڭ ەنشىسى. بۇل بيىك بەلەس تە ەل وڭىرلەرى اراسىنداعى رەكوردتىق كورسەتكىش بولىپ وتىر. ارينە بۇل ەسەپكە الماتى مەن نۇرسۇلتان جانە شىمكەنت مەگوپوليستەرى كىرمەيتىنى ايتپاسا دا تۇسىنىكتى.

بۇعان دەيىنگى جاسالعان تالداۋلار مەن ساراپتامالار وڭىردە تابيعي دەموگرافيالىق ءوسىم الدىڭعى جىلدارمەن سالىستىرعاندا ارتىپ كەلە جاتقانىن كورسەتەدى. سونىمەن بىرگە تۇرعىنداردىڭ ديناميكالىق اعىمى مەن ىشكى كوشى-قون ۇدەرىستەرى دە بۇرىن-سوڭدى بولىپ كورمەگەن جوعارى دەڭگەيگە جەتتى. بۇل فاكتورلار قازىرگى كەزدە تۇرعىن ۇيگە دەگەن ۇلكەن سۇرانىس تۋعىزدى.

وتكەن جىلى اقتوبەدە ءبىر ميلليون شارشى مەتر تۇرعىن ءۇي سالۋ كوزدەلىپ، وعان ويداعىداي كول جەتكىزىلگەنىنە وسىنداي سۇرانىستار مەن تالاپتار قوزعاۋ سالعانى دا باسى اشىق ماسەلە.

ارينە وسىمەن بۇكىل ءىستى بىتتىگە ساناۋعا بولمايتىنى بەلگىلى. بيىلعى جىلى دا وڭىردە وسى بيىك مەجەنىڭ دەڭگەيىن تومەن ءتۇسىرىپ الماۋ جولدارى قاراستىرىلعان. اقتوبە وبلىسىنىڭ اكىمى وڭداسىن ءورازاليننىڭ ايتۋىنشا بيىلعى 2020 جىلى تۇرعىنداردىڭ الەۋمەتتىك ءالجۋاز توپتارىنا تۇرعىن ءۇي كومەگىن كورسەتۋگە باسىمدىق بەرۋ باعىتتارى بەلگىلەنگەن. بۇگىنگى كۇنى اقتوبەدە تۇرعىن ۇيگە يە بولۋ جانە ساتىپ الۋ كەزەگىندە 30 000 ادام تۇرعانى، سونىمەن بىرگە 150 000 ازامات وبلىس ورتالىعىنىڭ ىرگەسى مەن ماڭىنان جەكە تۇرعىن ءۇي قۇرىلىسى ءۇشىن جەر تەلىمدەرىن الۋعا ءوتىنىش بەرگەنى دە جاۋاپكەرشىلىك جۇگىن سالماقتاندىرا تۇسەدى.

بۇگىنگى كۇنى اقتوبە اگلومەراتسياسى اۋماعىندا قارقىندى جۇمىس قۇرىلىستارى ودان ءارى جالعاسۋدا. رەسپۋبليكا پرەزيدەنتى قاسىم-جومارت توقاەۆ بيىلعى 2020 جىلدىڭ 27 قاڭتارى كۇنى ۇكىمەتتىڭ كەڭەيتىلگەن وتىرىسىندا الداعى ۋاقىتتا تۇرعىن ءۇي سالۋ ماسەلەسى ۇكىمەت جۇمىسىنىڭ باسىم باعىتى بولۋى ءتيىس ەكەندىگىن اتاپ كورسەتكەنى ءمالىم. بۇل مىندەتتىڭ جەرگىلىكتى اتقارۋشى ورگاندارعا دا تىكەلەي قاتىسى بار ەكەنى كامىل. سوندىقتان دا قازىرگى كەزدە اقتوبەلىك قۇرىلىسشىلار وسى تالاپ دەڭگەيى مەن ۇدەسىنەن كورىنۋگە بەكەم بەل بۋىپ وتىر.

اقتوبە

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020