باعدارلامالىق ماقالادا ايتىلعانداي, اقىن مۇرالارى ەل ىشىندە عانا ەمەس, شەت مەملەكەتتەردە دە كەڭىنەن ناسيحاتتالعانى دۇرىس. بۇل ورايدا ەلورداداعى ۇلتتىق اكادەميالىق كىتاپحانا مادەنيەت جانە سپورت, سىرتقى ىستەر مينيسترلىكتەرىمەن جانە شەت مەملەكەتتەردىڭ بىرنەشە ەلشىلىگىمەن بىرلەسە وتىرىپ «اباي» مادەني-اقپاراتتىق ورتالىعىن اشۋ جوباسىن قولعا الدى. پەداگوگيكا عىلىمدارىنىڭ دوكتورى, پروفەسسور, ۇلتتىق اكادەميالىق كىتاپحاناسىنىڭ باسشىسى ءۇمىتحان داۋرەنبەكقىزىنىڭ باستاماسىمەن جۇزەگە اسىپ وتىرعان يگى شارا ەڭ الدىمەن ەۋروپانىڭ ەڭ كونە دە كورىكتى قالالارىنىڭ ءبىرى پراگادا, كلەمەنتينۋم اتىنداعى ۇلتتىق كىتاپحانادا باستالدى.
ورتالىقتىڭ تۇساۋكەسەر راسىمىنە چەحيانىڭ بىرقاتار زيالى قاۋىم وكىلى, ەلشىلىكتىڭ لاۋازىمدى تۇلعالارى, سونداي-اق, ەلىمىزدەن بارعان ءبىر توپ دەلەگاتسيا قاتىستى.
شارانىڭ شىمىلدىعىن قازاقستان رەسپۋبليكاسىنىڭ چەح رەسپۋبليكاسىنداعى توتەنشە جانە وكىلەتتى ەلشىسى مارات ءتاجين اشىپ بەردى.
ء«بىز اباي اتامىزدىڭ مەرەيتويىن مەملەكەت اياسىندا عانا ەمەس, شەت ەلدەردە دە ناسيحاتتاۋدى قولعا الىپ وتىرمىز. بۇل رەتتە چەح ۇلتتىق كىتاپحاناسىنا ريزاشىلىعىمىزدى بىلدىرەمىز. سونىمەن قاتار ەلىمىزدەن كەلگەن ۇلكەن دەلەگاتسياعا العىس ايتقىمىز كەلەدى. اباي ولەڭدەرىنە, قارا سوزدەرىنە, دەرەكتى قۇجاتتارعا, اۋديو, ۆيدەو ماتەريالدارعا تولى ۇلكەن ورتالىق اباي تاعىلىمىمەن قوسا قازاق ۇلتىنىڭ دا ءداستۇر-سالتى مەن ادەپ-عۇرپىنان كوپ اقپارات بەرەدى. ءۇش ايدىڭ اياسىندا ابايمەن بايلانىستى تاريحي-مادەني قارىم-قاتىناس ەكى ەل اراسىندا ايرىقشا ارتا تۇسەدى. ءبىز التىن پراگاداعى بارلىق دوسىمىزعا راحمەت ايتامىز» دەدى ەلشى مارات ءتاجين.
ەلىمىزدەن بارعان دەلەگاتسيانىڭ وكىلى, قازاقستان جازۋشىلار وداعىنىڭ توراعاسى ۇلىقبەك ەسداۋلەت تە سالتاناتتى شاراعا ارنايى قاتىسىپ, جاڭا ورتالىقتىڭ ادەبي-مادەني ماڭىزىنا ەرەكشە توقتالىپ ءوتتى. ءوز سوزىندە اقىن ۇلىقبەك ەسداۋلەت وسى ىسكە مۇرىندىق بولعان ازاماتتارعا العىسىن ءبىلدىردى.
ء«ار ۇلتتىڭ تۋىنا, مورىنە اينالاتىن تۇلعالار بولادى. سولاردىڭ ءبىرى – اباي حاكىم. ءبىز اباي ارقىلى ءوزىمىزدىڭ ۇلتتىق قۇندىلىقتارىمىزدى بايىتىپ كەلەمىز. ەۋروپا تورىندە اباي تاعىلىمى قانات جايعان بۇنداي شارالار جاڭا ۇرپاققا ۇلكەن ونەگە سىيلايدى» دەدى اقىن ۇ.ەسداۋلەت.
جۇرەكجاردى لەبىزىنەن كەيىن جازۋشىلار وداعىنىڭ توراعاسى چەحيا ۇلتتىق كىتاپحاناسىنىڭ ديرەكتورى م.كوساندرو مەن چەحياداعى ەلشى مارات تاجينگە بيىل الماتى قالاسىندا باسىلىپ شىققان «اباي» اتتى ەرەكشە كۇنتىزبەنى سىيعا تارتىپ, مارتين مىرزا مەن ابايدىڭ قارا سوزدەرىن چەح تىلىنە ءتارجىمالاپ جاتقان كينورەجيسسەر, دراماتۋرگ ۆلاديسلاۆ كۋيچەكتىڭ يىعىنا شاپان جاپتى.
