سوناۋ 2000 جىلداردىڭ العاشقى تۇسىندا رەسپۋبليكا وبلىستارىندا تىلدەردى دامىتۋ باسقارمالارى قۇرىلعان كەزدە جاڭا مەملەكەتتىك قۇرىلىمنىڭ الدىندا تىلدەردىڭ مارتەبەسىن ءوسىرۋ مىندەتى تۇردى. سونداي-اق مەملەكەتتىك ءتىلدىڭ قولدانىلۋ دەڭگەيىن كەڭەيتۋ ارقىلى ەلىمىزدى مەكەندەيتىن وزگە ەتنوس وكىلدەرى تىلدەرىنىڭ دە ۇمىت قالماۋىن قامداستىرۋ كوزدەلدى. وسىنداي جاۋاپتى شاقتا اتالعان باسقارمانىڭ ءبولىم مەڭگەرۋشىسى, باسشىنىڭ ورىنباسار قىزمەتتەرىن گ.تولەباەۆا ابىرويمەن اتقارا ءبىلدى. سونداي-اق ءتىل جاناشىرى 2011 جىلى اقتوبە وبلىستىق تىلدەردى دامىتۋ باسقارماسىنىڭ باسشىسى بولىپ تاعايىندالعان سوڭ, ونىڭ تىكەلەي ارالاسۋىمەن وسى ماسەلەگە قاتىستى وڭىرلىك باعدارلاما قابىلداندى. ءارى تىلدەردى دامىتۋدىڭ وزەكتى ءارى كوكەيكەستى ماسەلەلەرى ايقىندالدى.
سونىڭ ىشىندە وبلىستا مەملەكەتتىك ءتىلدى ورنىقتىرۋدىڭ تىڭ جوبالارى مەن تاسىلدەرى بەلگىلەندى. ونىڭ بەل ورتاسى مەن باسى-قاسىندا بۇگىنگى اڭگىمەمىزدىڭ كەيىپكەرى, حالقىمىزدىڭ نامىستى ءور قىزدارىنىڭ ءبىرى بولعان ەدى. سونىڭ ناتيجەسىندە وبلىستا تىلدەرگە قاتىستى ماسەلەلەر ءار ءتۇرلى ەتنوس وكىلدەرى تاراپىنان تەرەڭ تۇسىنىستىكپەن شەشىمىن تابا بىلگەننىڭ ءوزى ءبىر مەرەي. بۇدان سوڭ وبلىستا ونىڭ باستاماسى بويىنشا تىلدەردى وقىتۋ مەن ادىستەمەسىن جەتىلدىرۋ ماسەلەلەرى قولعا الىندى. سوعان سايكەس باسقارما جانىنان تىلدەردى وقىتۋ ورتالىعى قۇرىلدى.
لاتىن الىپبيىنە كوشۋ ماسەلەسى قازاقستاندىق قوعامدا العاشقىدا ءار ءتۇرلى پىكىرلەر تۋعىزدى. وسى كەزدە باسقارما باسشىسى تۇرعىندار اراسىندا كەڭ اۋقىمدى تۇسىنىك جۇمىستارىنىڭ ورىستەۋىنە ۇيىتقى بولا ءبىلدى. البەتتە, كەز كەلگەن ءىستىڭ دەڭگەيىن تۇپكى ناتيجە عانا ايقىنداي الادى. وسى ورايدا رەسپۋبليكا جۇرتشىلىعى اراسىندا لاتىن قارپىن قولداۋ ىسىندە ەل وڭىرلەرى دەڭگەيىنە شاققاندا اقتوبە وبلىسى الدىڭعى كەزەككە شىقسا, بۇل ىستە گۇلايىم تەلمانقىزىنىڭ لايىقتى ءارى قوماقتى ۇلەسى مەن قولتاڭباسى بار ەكەنى ايدان انىق. سونداي-اق ۇلتتىق ونەرىمىزدى ارداقتاۋ مەن ۇلىقتاۋ جانە قاستەرلەي ءبىلۋ ماسەلەلەرى دە ۇلتتىڭ جاناشىر قىزىنىڭ قانىنا و باستا سىڭگەن قاسيەت دەسەك, قاتەلەسە قويماسپىز. ايتالىق, اتا-بابالاردان جەتكەن اسىل مۇرامىز – ەجەلگى ايتىس ونەرى دەپ تۇيسەك, ارايلى اقتوبەدە سوڭعى جىلدارى رەسپۋبليكالىق جانە حالىقارالىق ايتىستاردىڭ شىمىلدىعى تۇرىلۋىنە دە گۇلايىمنىڭ تيگىزگەن سەپتىگى كوپ. بۇل تۇرعىداعى ەڭبەگى دە ەلەۋلى.
مەملەكتتىك قىزمەتشى رەتىندە وعان ءتان باستى قاسيەتتەر – بيىك ادامگەرشىلىك, وزىنە تاپسىرىلعان مىندەتتەرگە قاي كەزدە دە جاۋاپكەرشىلىكپەن قاراي ءبىلۋ ءارى ونىڭ ساپالى تۇردە ورىندالۋىن كوزدەۋ ەكەنىن ارىپتەستەرى ۇدايى ايتىپ ءجۇر. سونىمەن بىرگە تىلدەر باسقارماسىندا جۇمىس ۋاقىتىن ءتيىمدى, وڭتايلى ءارى ۇقىپتى تۇردە پايدالانۋدىڭ وڭتايلى تارتىپتەرى ورنىققانى دا وزگە مەملەكەتتىك مەكەمەلەر ۇيرەنۋگە, ءتالىم الۋعا تۇرارلىقتاي ءىس دەي الامىز. بۇگىنگى كەزدە جەرگىلىكتى مەملەكەتتىك قىزمەتتە جۇرگەن بىرقاتار باسشىنىڭ بويىندا كوپ جاعدايلاردا باستاماشىلدىق قاسيەت جەتىسە بەرمەيتىندىگى ايتىلىپ قالىپ ءجۇر. بۇل جونىنەن دە ونىڭ مارتەبەسى مەن مەرەيى ۇستەم. ويتكەنى جوعارىدا ايتىلعان جايتتار ونىڭ باستاماشىلدىعى مەن تالاپشىلدىعىنىڭ جانە جەكە ونەگەسىنىڭ كورىنىسى ەكەنى حاق.
بۇگىندە وڭىردەگى جاس جانە ورتا بۋىن مەملەكەتتىك قىزمەتشىلەر گۇلايىم تولەباەۆانى ۇستاز ءارى تالىمگەر سانايدى. سولاردىڭ ءبىرى – مارجان جاناسوۆا. ول ءوز تالىمگەرىنىڭ لايىقتى باعىت-باعدار مەن ءجون-جوبا كورسەتە بىلگەنىن ريزاشىلىق سەزىممەن ايتىپ بەردى. ولارعا ۇزدىك مەملەكەتتىك قىزمەتشى ۇنەمى: "تاپسىرما ورىندالۋىمەن قۇندى. ونى اتقارۋ پارىز ءارى مىندەت. ايتسە دە ونى ورىنداۋ بارىسىندا مەملەكەتتىك قىزمەتىشىنىڭ وزىنە ءتان ءىسى مەن ءىزى جانە ءتيىستى قولتاڭباسى قالىپ جاتسا – مەملەكەتتىك قىزمەتتىڭ ابىرويى مەن مارتەبەسى ودان ءارى بيىكتەي تۇسەدى" دەيدى ەكەن. نەسى بار, بۇل ويلى دا ورامدى, ۇتىمدى دا ۇتقىر تۇجىرىم ەكەنى انىق. ەندەشە وسى تۇيىنمەن بۇگىنگى ماتەريالىمىزدىڭ نۇكتەسىن قويعاندى ءجون كورەمىز.
