قازاقستان • 23 قاڭتار، 2020

قازاقپارات جانە ANSA يتاليالىق اقپارات اگەنتتىگى مەموراندۋمعا قول قويدى

27 رەتكورسەتىلدى

ANSA اگەنتتىگىنىڭ باسقارما توراعاسى Mr. Stefano Piero Carlo De Alessandri مەن «قازاقپارات» اق باسقارما توراعاسى اسقار قۋانىش ۇلى ۋماروۆ ىنتىماقتاستىق تۋرالى مەموراندۋمعا قول قويدى.

مەموراندۋم اياسىندا ANSA اگەنتتىگى ءوز سايتىندا يتاليان تىلىندەگى «قازاقستان جاڭالىقتارى» ايدارىن اشۋدى جوسپارلاپ وتىر. ءوز كەزەگىندە، «قازاقپارات» حاا سايتىنىڭ اعىلشىن تىلىندەگى نۇسقاسىندا يتاليا رەسپۋبليكاسىنىڭ ساياسات، ەكونوميكا، مادەنيەت سالالارىنداعى جاڭالىقتارى جاريالانباق.

ايتا كەتەيىك، ANSA – مەملەكەتتىك جانە حالىقارالىق ءىس-شارالار تۋرالى اقپارات تاراتاتىن يتاليانىڭ جەتەكشى اقپارات اگەنتتىگى. اقپارات اگەنتتىگىنىڭ مەملەكەت اۋماعىندا 22 جەكە كەڭسەسى بار، ول الەمنىڭ 74 مەملەكەتىندەگى 80-نان استام قالادا ءوز قىزمەتىن جۇزەگە اسىرىپ كەلەدى. ANSA كۇن سايىن 3 مىڭنان استام اقپارات تاراتىپ، 700-دەن استام فوتو جانە ۆيدەوروليكتەر جاريالايدى.

اگەنتتىك يتاليان تىلىنەن باسقا اعىلشىن، يسپان، نەمىس، پورتۋگال جانە اراب تىلدەرىندە حابار تاراتادى.

قازاقپارات – قازاقستانداعى العاشقى حالىقارالىق مارتەبە العان مەملەكەتتىك اقپارات اگەنتتىگى. بيىل اقپارات اگەنتتىگىنىڭ قۇرىلعانىنا 100 جىل تولادى.

«بۇگىن ءبىز ماڭىزدى مەموراندۋمعا قول قويىپ وتىرمىز. بۇل مەموراندۋم بويىنشا يتاليالىق ANSA اگەنتتىگىمەن ىنتىماقتاستىقتى باستايمىز. قۇجات بويىنشا ANSA اگەنتتىگىندە بولەك اعىلشىن جانە يتاليان تىلىندە بولەك ايدار اشىلادى. بۇگىنگى كەلىسىمدى ەكى ەلدىڭ اقپاراتتىق تۇرعىدا جاقىنداي ءتۇسۋ پروتسەسىنىڭ ۇلكەن قادامى دەپ ەسەپتەيمىز. ءبىزدىڭ يتاليالىق ارىپتەستەرىمىز قازاقستاننىڭ ەكونوميكاسى مەن تۋريزم سالاسىنا قاتتى قىزىعۋشىلىق ءبىلدىرىپ وتىر. بۇل قۇجات ەۋروپالىق اگەنتتىكتەرمەن جاسالعان العاشقى مەموراندۋم» دەدى اسقار ۋماروۆ.

قازاقپارات ەلىمىزدەگى اقپارات اگەنتتىكتەرى اراسىندا ەڭ اۋقىمدى تىلشىلەر قوسىنىنا يە. قازاقستاننىڭ بارلىق ءوڭىرىن قامتيتىن 15 مەنشىكتى ءتىلشى مەن رەسەي، قىتاي، تۇركيا، ەۋروپا، ازەربايجان، وزبەكستان، قىرعىزستان، يوردانياداعى وكىلدىكتەر اگەنتتىككە ەلىمىزدە جانە شەتەلدە بولىپ جاتقان وقيعالاردان وبەكتيۆتى ءارى تولىققاندى اقپارات تاراتۋعا مۇمكىندىك بەرەدى.

 

 

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار